¹ Gosi go, kantu Sanbalati, Tubias y Gezen, kel árabi, y restu di nos inimigus obi ki N kunstrui muru y ki ka tenba ninhun parti ki dexadu abertu, inda ki N ka tenba pudu portas na portons, ² Sanbalati y Gezen manda-m rekadu, ta fla: Ben inkontra ku nos na algun lugar na planisi di Onu. Es staba ta pretendeba faze-m mal. ³ N manda mensajerus pa es, ta fla: N sta okupadu ta faze un grandi obra y N ka pode bai. Pamodi ki trabadju ta para timenti N ta dexa-l pa N bai atxa nhos? ⁴ Es manda-m kel mesmu kunviti kuatu bes, y N rusponde-s di mesmu manera tudu bes. ⁵ Sanbalati manda se servu pa mi di mesmu manera pa kintu bes, ku un karta abertu na se mon. ⁶ Na karta staba skrebedu: Sa ta fladu na meiu di povus, y Gezen tanbe fla, ki abo ku judeus sa ta planeja rabela, purisu nhos sa ta kunstrui muru. Pamodi es relatoriu sa ta fla, ma bu kre bira ses rei. ⁷ Y bo tanbe bu skodje prufeta pa grita riba bo na Jiruzalen, ta fla: Izisti un rei na Juda! Fika ta sabe di ki rei ta obi es relatóriu. Purtantu, ben y nu kunbersa ku kunpanheru. ⁸ Nton N manda un mensaji pa el, ta fla: Kuzas ka kuntise sima bu fla, pamodi na bu kurason, bu inventa-s. ⁹ Pamodi tudu es kreba dexa-nu ku medu, ta pensa: Es ta bai tra ses mon di faze trabadju, y obra ka tirmina. Ma gosi go, Deus, purfavor, fortalese nhas mon. ¹⁰ N bai kaza di Semaías, fidju di Delaías, fidju di Meetabel, ki staba trankadu na se kaza. E fla: Nu bai inkontra na kaza di Deus, dentu di tenplu, y nu fitxa porta di tenplu, pamodi es sa ta ben pa mata-u. Di noti, es sa ta ben pa mata-u. ¹¹ N ruspondi: Un ómi sima ami, ta fuji? Y un ómi sima ami, ta bai pa tenplu so pa salva se vida? N ka sta bai! ¹² N persebe ki ka era Deus ki manda-l, ma ki e staba ta prufetiza kontra mim. Tubias ku Sanbalati tenba kontratadu el. ¹³ Es kontrata-l pa dexa-m ku medu, pa ki N podeba faze kuze ki es fla y pekaba, y nton es ta tenba mutivu di daba ami N un mau nomi, pa es pode umilha-m. ¹⁴ Lenbra di Tubias ku Senbalati, nha Deus, y di tudu ki es faze. Tanbe, lenbra di prufetisa Noadia y di restanti di prufetas ki tenta dexa-m ku medu. ¹⁵ Nton muru fika finalizadu na dia vinti y sinku di mes di Elul, dipos di sinkuenta y dos dia. ¹⁶ Kantu tudu nos inimigus obi sobri kel-li, tudu povus ki di nos redor, fika ku medu y txeu dizanimadu na ses propri manera di pensa. Pamodi es sabeba ki trabadju fazedu ku djuda di nos Deus. ¹⁷ Tanbe, na kes dia, nobri di Juda manda txeu karta pa Tubias y Tubias tanbe rusponde-s ku karta. ¹⁸ Pamodi izistiba txeu na Juda ki era vinkuladu ku el pa un juramentu, pamodi el era jenru di Sekanias, fidju di Ara. Se fidju, Juanan, toma pa ser se spoza fidja di Mezulon, fidju di Berekias. ¹⁹ Es tanbe fla-m sobri se bon trabadju y es relata nhas palavras di volta pa el. Tubias tanbe skrebe-m kartas pa intxi-m di medu.