¹ Nton, ómis ku ses spoza labanta un grandi gritu kontra ses kunpanheru judeus. ² Pamodi tenba alguns ki sa ta flaba: Ku nos fidjus y fidjas, anos é monti. Nton, dexa-nu pega gron pa nu ka mori y nu mante vivu. ³ Tanbe tenba alguns ki sa ta flaba: Nu sa ta da garantia, nos kanpu, nos vinhedu y nos kaza pa nu troka ku gron pa nu ka pasa fomi. ⁴ Otus tanbe sa ta flaba: Nu inprista dinheru pa paga inpostu di rei riba nos kanpu y nos vinhedu. ⁵ Ma, anos é di mesmu karni ku sangi sima es, nos kriansa é mesmu ki nhos kriansa. Nu sa ta ser forsadu pa bende nos fidju ku nos fidjas pa es bai torna skravu. Alguns di nos fidja dja sta ta ser skravizadu. Y nu ka tini puder di djuda pamodi kes otus ómis, gosi, é donu di nos kanpu y nos vinhedu. ⁶ N fika txeu iradu kantu N obi se gritu y kes palavra la. ⁷ Nton, N matuta sobri kel-li y N traze akuzason kontra nobris ku ofisiais. N fla-s: Nhos ta kobra juru, kada un di nhos propri irmon. N organiza un grandi asenbleia kontra es ⁸ y N fla-s: Anos, tudu nos ki tenba kondison, nu kunpra di volta nos irmão judeus di skravidon, ki es bendedu pa povus, ma nhos di nobu nhos ta bende nhos irmon ku nhos irma, o es ta ser bendedu di volta pa nos? Es fika kaladu y es ka atxa un palavra pa es rusponde. ⁹ Ami tanbe N fla: Kuza ki nhos sa ta faze é ka bon. Nhos ka debeba andaba na temor di nos Deus, pa ivita difamason di povus ki é nos inimigus? ¹⁰ Ami, nhas irmon y nhas servus nu inprista-s dinheru ku gron. Ma nu debe para di kobra juru riba nos inprestimu. ¹¹ Nhos divolve-s oji me, ses kanpu, ses vinhedus, ses pomaris di olivia, ses kazas y pursentajen di dinheru, di gron, di vinhu nobu y di azeti ki nhos tra di es. ¹² Nton, es fla: Nu ta divolve kuze ki nu tra di es y nu ka ta pidi-s nada. Nu ta faze sima bu fla. Nton, N txoma saserdotis y N faze-s jura pa es faze sima es prumete. ¹³ N sakudi dobra di nha mantu y N fla: Nton, ki Deus sakudi di kaza i di posi, tudu ómi ki ka mante se prumesa. Ki el pode ser sakudidu y svaziadu. Tudu asenbleia fla: Amen, y es lova Nhordes y pesoas faze sima es tenba prumetidu. ¹⁴ Nton, di tenpu ki N indikadu pa ser guvernador na tera di Juda, di anu vinti ti anu trinta y dos di Artaxersis, ki era rei, duze anu, nen ami, nen nhas irmon nu kume kumida guvernador ten direitu. ¹⁵ Ma guvernadoris ki ben antis, ki staba antis di mi, pui obrigason pizadu riba povu y es toma di es kuarenta siklus di prata pa se kumida ku vinhu diáriu. Ti ses servus ta oprimiba pesoas. Ma ami N ka faze asi trokadu di temor pa Deus. ¹⁶ Ami tanbe N kuntinua ta trabadja na muru, y nu ka kunpra ninhun tera. Y tudu nhas servu staba djuntadu la pa trabadja. ¹⁷ Na nha meza staba judeus ku ofisiais, sentu y sinkuenta ómis, alen di kes ki ben ti nos na meiu di povus ki staba na nos redor. ¹⁸ Nton, kuze ki era priparadu tudu dia era un boi, sais ovelhas ki era skodjedu y tanbe avis, y pa kada des dia, tudu tipu di vinhu avontadi. Y sime, pa tudu kel-li, N ka iziji alimentu di governador, pamodi izijensia era txeu pizadu riba di povu. ¹⁹ Lenbra di mi, nha Deus, pa senpri, pa tudu ki N faze pa es pesoas.