¹ Y, kantu Sanbalati obi ki nu staba ta kunstrui muru, dentu di el ardi, e fika txeu iradu y e faze trosa di judeus. ² Na prizensa di ses irmon y di izérsitu di Samaria, e fla: Kuze ki es judeus frakus sa ta faze? Es sa ta bai restaura sidadi pa es me? Es ta bai oferese sakrifisiu? Es ta bai tirmina trabadju na un dia? Es ta bai risusita pedras di monti di lixu, dipos di sta tudu kemadu? ³ Tubias, kel amonita staba ku el y fla-l: Si so un rapoza subi riba di nhos kunstruson, nhos muru di pedra ta kebra. ⁴ Obi, nos Deus, pamodi nu sa ta ser disprezadu. Faze volta es ofensa riba di ses propri kabesa y larga-s pa ki es pode ser lebadu pa un tera undi es ta ser prizioneiru. ⁵ Ka Bu kubri ses malvadesa y ka Bu apaga ses pekadu di Bu dianti, pamodi es provoka ira di kes ki staba ta kunstrui. ⁶ Nton, nu kunstrui muru, y muru interu staba unidu ti metadi di se altura, pamodi povo staba animadu pa trabadja. ⁷ Ma, kantu amonitas ku asdoditas obi ki trabadju di konpu mudu di Jiruzalen staba avansadu y ki kes lugar ki staba kebradu na muru staba ta ser fitxadu, es ardi di ira. ⁸ Es fepu es djunta y es trama; y nton es ben pa es ben luta kontra Jiruzalen y pui kunfuson. ⁹ Ma nu ora pa nos Deus y nu pui guarda pa proteje-nu kontra es di dia ku noti, trokadu ses amiasa. ¹⁰ Nton, pesoas di Juda fla: Forsa di kes ki sa ta karega pezu sa ta diminui, ten txeu lixu y nos é ka kapas di kunstrui muru. ¹¹ Y nos inimigus sa ta fla: Es ka ta sabe o es ka ta odja ti ki nu entra na ses meiu, y nu mata-s, y faze-s para trabadju. ¹² Na kel tenpu, judeus ki ta moraba pertu di es ben di tudu direson y fala ku nos des bes, ta alerta-nu di skema ki es staba ta faze kontra nos. ¹³ Nton, N puzisiona pesoas na kes parti mas baxu di muru, na kes ária ispostu. N puzisiona kada família ku ses spada, seta y arku. ¹⁴ Nton, N odja, N fika sakedu y N fla pa nobris, pa guvernadoris y restu di povu: Ka nhos xinti medu di es. Nhos lenbra di Sinhor, ki é grandi y tremendu. Nhos luta pa nhos família, pa nhos fidjus y pa nhos fidjas, pa nhos spoza ku nhos kaza. ¹⁵ Y kuntise ki, dipos ki nos inimigus obi ki dja nu fika ta sabe di ses planus y ki Deus frustra ses planus, nos tudu nu volta pa muru, kada un pa se trabadju. ¹⁶ Desdi kel dia, metadi di nhas servus trabadja so pa kunstrui muru, y otu metadi di ómis ta siguraba setas, skudu y arku y ta uzaba armadura, timenti líderis ta daba apoiu pa tudu povu di Juda. ¹⁷ Kes mesmu trabadjadoris ki kunstrui muru y ki ta karegaba karga, tanbe ta guardaba ses pozison. Kada un ta trabadjaba ku un mon, y ku kel otu mon, ta siguraba na arma. ¹⁸ Kada kunstrutor ta uzaba se spada na ladu y asi ki es ta trabadjaba. Kel ki ta tokaba trunbeta ta fikaba na nha ladu. ¹⁹ N fla pa nobris, pa ofisiais, y restu di pesoas: Trabadju sta grandi y kunpridu, y nos nu sta siparadu na muru, lonji di kunpanheru. ²⁰ Nhos debe kori pa lugar di undi nhos obi son di trunbeta y nhos djunta la. Nos Deus ta luta pa nos. ²¹ Nton, nu pega na obra pa faze trabadju. Metadi di es ta sigurab seta desdi di antimanxi ti boka-noti. ²² Ami tanbe N fla pa pesoas na kel tenpu: Ki kada ómi ku se servu pasa noti na meiu di Jiruzalen, pa ki es pode ser nos guarda duranti noti y trabadja duranti dia. ²³ Nton, nen ami, nen nhas irmon, nen nhas servus, nen ómis di guarda ki ta sigiba ami, ninhun di nos, nu troka ropa, y kada un di nos ta karegaba se arma, sikre pa bai bebe águ.