¹ Palavra di Nhordes ben pa Jonas, sugundu bes, ta fla: ² Labanta, bai pa Nínivi, kel grandi sidadi, y pruklama pa el mensaji ki N ordena-u. ³ Nton Jonas labanta y bai pa Nínivi, na obediensia pa palavra di Nhordes. Nínivi era sidadi uma grandi, y pa anda na el di un ponta pa kel otu, ta mesteba di tres dia. ⁴ Jonas entra na sidsdi y anda na el duranti un dia ta pruklama: Dili kuarenta dia, Nínivi ta botadu na txon. ⁵ Ómis di Nínivi kre na Deus y es pruklama un jijun. Es tudu pui riba di es panu di saku, desdi grandi ti pikinoti. ⁶ Kantu nutisia txiga na rei di Nínivi, e labanta di tronu, e tra ropa di rei, e kubri ku panu di saku y e xinta riba sinzas. ⁷ Nton e faze un pruklamason, ta fla: Na Nínivi, pa otoridadi di rei ku ses nobris, ka ten pirmison pa ómi y nen o nimal, manada o ovelha, di kume algun kuza. Ka nhos dexa-s kume nen bebe águ. ⁸ Nhos dexa es dos, ómi ku animal, kubri ku panu di saku y grita pa Deus. Kada un abandona ses mau kaminhu y violensia ki sta na ses mon. ⁹ Kenha ki sabe ki Deus ka ta abri mon di Se ira y E ta muda Se disizon, pa nu ka ser distruidu? ¹⁰ Y Deus odja kuze ki povu faze, sima es abandona ses mau kaminhu. Nton Deus muda di ideia sobri punison ki E flaba ki E ta fazeba pa es, y E ka faze mas.