¹ Y Jonas ora Nhordes, se Deus, di dentu di pexi. ² Y e fla: Na nha angústia N grita pa Nhordes y E rusponde-m; di bariga di Infernu N grita pa sukoru y Bu obi nha vos. ³ Bu fulha-m la na fundu, na kurason di mar, y kurenti rudia-m; tudu Bus onda y Bus kurenti pasa riba mi. ⁴ Nton N fla: fulhadu N sta di dianti di bus odjus; purventura N ta torna odja Bu santu tenplu? ⁵ Águ serka-m ti piskos; abismu staba na nha volta, algas nrola na volta di nha kabesa. ⁶ N dixi ti pa bazi di muntanha; bara di prizon di tera prende-m pa senpri. Mesmu asi, bu traze nha vida di volta di koba, Nhordes, nha Deus! ⁷ Kantu nha alma dja staba disfalesidu dentu di mi, N lenbra di Nhordes; nton nha orason subi pa Bo, na Bu santu tenplu. ⁸ Kes ki gosta di falsus ídulus ta afasta di es me Bu mizerikordia. ⁹ Ma ami, N ta oferese-U sakrifisiu ku vos di agradesimentu; kuza ki N prumeti, N ta kunpri. Di Nhordes ta ben salvason. ¹⁰ Nhordes papia ku pexi, y pexi vomita Jonas riba tera seku.