¹ Ma kel-li dizagrada Jonas, y e fika uma xatiadu. ² Nton Jonas ora pa Nhordes y e fla: Nhordes, é ka era kel-li ki N flaba kantu N volta pa nha própri país? Purisu N fuji na faxi pa Társis, pamodi N sabeba ki Abo é un Deus grasiozu, konpasivu, longánimu, ku txeu fidelidadi, y ki ta rapende di mal. ³ Purisu, Nhordes, gosi N ta pidi, tra-m nha vida, pamodi é midjor pa N sta mortu di ki vive. ⁴ Nhordes fla: Bu atxa ma é bon bu sta xatiadua asi? ⁵ Nton Jonas sai di sidadi y xinta na ladu orienti di sidadi. Y la é faze pa el un gazadju y e xinta dibaxu di se sonbra, pa e odjaba kuze ki ta kuntiseba ku sidadi. ⁶ Nhordes pripara un planta y faze-l krese riba Jonas pa sirbi di se sobra riba di se kabesa pa alivia-l di se aflison. Jonas fika txeu kontenti trokadu di kel planta. ⁷ Ma Deus pripara un bitxinhu kantu sol nase na otu dia, ki ataka planta y e seka. ⁸ Kuntise ki kantu sol nase na otu dia, Deus manda un bentu oriental uma kenti. Nton sol bate na kabesa di Jonas ti ki Jonas fika kuazi ta dismaia. Nton Jonas dizeja more. E fla pa el em: Midjor pa N staba mortu di ki vive. ⁹ Nton Deus fla Jonas: "Bu atxa ma é bon bu sta xatiadua trokadu di es planta? Nton Jonas fla: É justu pa N sta xatiadu ti N more." ¹⁰ Nhordes fla: Bu kunpadese di planta, ki bu ka trabadja na el, nen bu ka faze-l krese. E krese na un noti y na otu noti é more. ¹¹ Nton Ami N ka debia xinti konpaxon di grandi sidadi di Nínivi, na undi izisti mas di sentu y vinti mil pesoas ki ka sabe diferensa entri se mon ndreta y se mon skerda, y inda di monti limaria?