¹ N pensa txeu na es kazu, pa N tenta ntende kes algen ki é dretu y sabidu, y kuzas ki es ta faze. Tudu es sta na mon di Deus. Ningen ka sabe si amor o ódiu ta ben pa algen. ² Tudu algen ten omesmu distinu. Omesmu distinu algen dretu ta spera, omesmu distinu runhus ta spera, omesmu distinu pa algen dretu ku algen mau [Alguns verson mudernu ta kopia verson antigu. Di es manera, frazi ta bira konpletu. Tradutoris pode disidi kopia-s], algen puru ku npuru, kes ki ta sakrifika, ku kes ki ka ta safrikika. Sima pesoas dretu ta more, asi tanbe pekadoris ta more. Sima kes ki ta jura ta more, tanbe ta more ómi ki ta xinti medu di faze un juramentu. ³ Ten un distinu runhu pa tudu kuza ki sta fazedu dibaxu di sol, un omesmu distinu pa tudu algen. Kurason di ser umanu sta xeiu di maldadi, y tulisi sta na ses kurason timenti es ta vive. Y dipos di tudu, es ta more. ⁴ Ma, pa kalker un algen ki fika bibu na meiu di kes ki sta bibu, izisti speransa, sima un katxor bibu é midjor ki un lion mortu. [Alguns verson mudernu ta traze: "Kuze ki ta prifiridu? Pa tudu viventis, kel-li é sertu: un katxor bibu é midjor ki un lion mortu"]. ⁵ Pamodi tudu bibu sabe ma e ta more, ma mortus nada ka sabe. Es ka ten ninhun rikonpensa, pamodi ses mimoria dja sta skesedu. ⁶ Se amor, ódiu y nveja dja dizaparese dja ten txeu tenpu. Nunka mas es ka ta ten parti di nada ki ta fazedu dibaxu di sol. ⁷ Sigi bu kaminhu, kume bu pon ku sabura, y bebe bu vinhu ku kurason filis, pamodi Deus ta aprova selebrason di kuzas dretu. ⁸ Mante bus ropa senpri branku y bu kabesa unjidu ku óliu. ⁹ Vive kontenti ku mudjer ki bu ta ama, tudu dia di bu vida inútil, dias ki Deus ten dadu bo dibaxu di sol, kes dias inútil. Kel-li é bu rikonpensa na es vida, pa trabadju ki bu faze dibaxu di sol. ¹⁰ Tudu ki bu mon atxa pa faze, trabadja ku bu forsa, pamodi ka ten trabadju o splikason o kunhisimentu o sabiduria na sipultura, pa undi ki bu sa ta bai. ¹¹ N ten odjadu alguns kuza nteresanti dibaxu di sol: kurida ka ta pertense kenha ki é mas rápidu; gera ka ta pertense kenha ki é mas forti; pon ka ta pertense kenha ki é mas sabidu; rikeza ka ta pertense kenha ki é kautelozu; favor ka ta pertense kenha ki é ntendidu. Ma, tenpu ku akazu ta afeta es tudu. ¹² Pamodi ningen ka sabe oras ki e ta more, sima pexi prezu na un redi di morti, o sima pásaru ki ta kai na silada. Sima ta kuntise ku animal, ser umanu ta prizionadu na tenpu mau, ki brisi ta kai riba di es. ¹³ Ami tanbe N ten odjadu sabiduria dibaxu di sol, di manera ki parse-m kuza grandi. ¹⁴ Tenba un sidadi pikinoti ku poku ómi na el, y ben un grandi rei kontra el, y e serka-l, y e faze ranpa grandi kontra el. ¹⁵ Ma, na sidadi atxadu un ómi pobri y sabidu, ki ku se sabiduria e salva kel sidadi. Ma, dipos, ningen ka lenbra mas di kel ómi pobri. ¹⁶ Nton, N kunklui: sabiduria é midjor ki forsa, ma sabiduria di un ómi pobri ka ta dadu valor, y ses konbersu ka ta obidu. ¹⁷ Konbersu di sabidu papiadu na mansu-mansu ta obidu midjor ki gritu di kalker guvernanti na meiu di tolus. ¹⁸ Sabiduria é midjor ki arma di gera, ma un pekador pode kaba ku monti kuza dretu.