¹ Sima un moska mortu ta faze purfumu txera mal, si tanbe ki un bureza pikinoti pode supera sabiduria y onra. ² Kurason di algen sabidu ta bai pa kaminhu dretu, ma kurason di algen tolu ta bai pa kaminhu mariadu. ³ Oras ki un tolu ta anda na rua, se pensamentu é fraku, ta mostra pa tudu algen ma el é un tolu. ⁴ Si imuson di un guvernanti labanta kontra bo, ka bu larga bu trabadju. Kabesa friu ta tadja tudu kuza runhu. ⁵ Sta otu kuza mariadu ki N odja dibaxu di sol, un tipu di eru ki ta ben di guvernanti: ⁶ pa tolus ta dadu kargu di xefi, nkuantu ki pa ómis ben di vida ta podu na postu mas baxu. ⁷ N ten odjadu skravus riba kabalu y ómis ben di vida ta anda ku ses pe na txon, sima skravus. ⁸ Kel ki koba un braku, e pode kai na el, y senpri ki algen ronpa un muru, un kobra pode pika-l. ⁹ Kalker un algen ki ta kebra pedra pode da pankada, y omi ki ta korta madera sta baxu prigu tanbe. ¹⁰ Si un lánima di feru sta segu, y un ómi ka mola-l, nton e debe uza mas forsa; ma sabiduria ta oferese un vantaji pa susesu. ¹¹ Si un kobra morde antis di ser nkantada, ka ten vantaji pa nkantador. ¹² Palavras di boka di un ómi sabidu ta traze grasa, ma boka di tolu ta nheme-l. ¹³ Si ki palavras kumesa ta sai di boka di un tolu, tulisi ta kumesa ta parse y na fin, se boka ta flui ku kuza mariadu. ¹⁴ Un tolu ta multiplika palavras, ma ningen ka sabe kuze ki sta pa ben kuntise. Kenha ki sabe kuze ki ta kuntise ku el? ¹⁵ Trabadju duru di tolu ta dexa-s fadigadu, di manera ki es ka ta sabe modi ki es ta bai pa sidadi. ¹⁶ Paxenxa pa bo, tera, si bu rei é un mininu y si bus líder ta kumesa ta festeja di palmanhan! ¹⁷ Ma, bensuadu é bo, tera, si bu rei é fidju di nobri, y si bus líder ta kume na ora sertu, pa ganha forsa, y nau pa toma moku! ¹⁸ Trokadu prigisa, tetu ta kai, y trokadu mon di malandru kaza ta ten gotera. ¹⁹ Algen ta faze kumida pa e fika sabi; vinhu ta da mas sabura pa vida y dinheru ta paga tudu nisisidadi. ²⁰ Ka bu maldisua rei, nen na bu menti, y nen ka bu maldisua rikus na bu kuartu, pamodi un pásaru di séu pode leba bu konbersu. Tudu ki ten aza pode spadja asuntu.