¹ Un bon nomi é midjor di ki purfumi karu, y dia di morti é midjor di ki dia di nasimentu? ² É midjor bai un kaza na dia di lutu di ki na dia di festa, pamodi lutu ta ben pa tudu algen na final di vida; Purtantu vivus debe leba kel-li na se kurason. ³ Tristeza é midjor é di ki rizu , pamodi dipos di tristeza di rostu ta ben alegria na kurason. ⁴ Kurason di sabidu sta na kaza di lutu, ma kurason di tolu sta na kaza di festa. ⁵ Midjor é obi kureson di sabidu di ki múzika di tolus. ⁶ Pamodi sima son di lenha ta kema baxu panela, asi ki é rizu di tolu. kel-li tanbe é sima vapor. ⁷ Storson, sertamenti, ta faze ómi sabidu bira tolu y un subornu ta koronpe kurason. ⁸ Midjor é final di un kuza di ki kumesu; y pesoas pasienti di spritu é midjor di pesoas orgulhozu. ⁹ Ka bu fadiga na fika ku raiba na bu spritu, pamodi raiba ta mora na kurason tolu. ¹⁰ Ka bu fla: " Pamodi ki dia ki dja pasa era midjor ki dias di oji?" Pamodi ka ta fika dretu faze kel tipu di purgunta li. ¹¹ Sabiduria ta bali txeu sima kuzas ki nu ta erda di nos antipasadus. E ta pruporsiona benifisius pa kes ki ta odja sol. ¹² Pamodi sabiduria ta pruporsiona pruteson sima dinheru pode pruporsiona tanbe, ma vantaji di kunhesimentu é ki sabiduria ta da vida pa kenha ki ta pusui-l. ¹³ Konsidera obras di Deus. Kenha ki pode ndreta kalker kuza ki E faze tortu ? ¹⁴ Oras ki tenpu for dretu, vive filis na el; ma oras ki tenpu for mariadu, matuta na kel-li: Deus pirmiti ki tudu es dos izisti ladu-ladu. Pamodi kel-li, ningen ka ta diskubri nada ki ta ben dipos di el. ¹⁵ N ten odjadu monti kuzas sen xintidu na nhas dias. Ten algen justu sa ta perese, apezar di se justisa, y ten algen runhu ki ta vive un vida longu, apezar di se runhesa. ¹⁶ Ka bu ser ipókrita, nem sabidu pa bus propri odjus. Pamodi ki bu debe distrui bo me? ¹⁷ Ka bu ser runhu dimais o tolu. Pamodi ki bu debe more antis txiga bu dia? ¹⁸ É bon ki bu adikiri sabiduria y ki bu ka dexa justisa. Pamodi algen ki ta teme Deus ta kumpri tudu ses obrigason. ¹⁹ Sabiduria é puderozu pa ómi sabidu, mas di ki des guvernanti na un sidadi. ²⁰ Ka ten un ómi justu na tera ki ta faze ben y ki nunka peka. ²¹ Ka bu obi tudu palavra ki ta fladu, pamodi bu pode obi bu servu ta maldisua-u. ²² Di omesmu manera, bo me bu sabe ki na bu kurason, tudu ora bu ten maldisuadu otus. ²³ Tudu kel-li N prova pa sabiduria. N fla: N ta ser sabidu; ma kel-la era mas di ki kel ki N pudeba ser. ²⁴ Sabiduria sta lonji y txeu fundu. Kenha ki pode atxa-l? ²⁵ N volta nha kurason pa prende, izamina y djobe sabiduria y splikason di rialidadi, pa na fin, N ntende ki mal é stúpidu y ki tulisi é lokura. ²⁶ N diskubri ki mas amargu di ki amor é kalker mudjer ki se kurason sta xeiu di armadilhas y lasu, y ki se mon sta akorrentadu. Kenha ki ta agrada Deus ta skapa di el, ma pekador e ta pega. ²⁷ Kunsidera kuze ki N diskubri, pregador fla. N ten djuntadu un diskuberta riba di otu pa N pode atxa un splikason di realidadi. ²⁸ Kel-li é kuze ki nda N sa ta djobe, ma N ka atxa: "N atxa un ómi justu na meiu di mil, ma N djobe un mudjer na meiu di tudu es, N ka atxa. ²⁹ N diskubri so kel-li: Deus kria umanidadi justu, ma e disvia, ta djobe pa txeu difikuldadi.