¹ Ten un runhesa ki ten odjadu dibaxu di sol, y kel-li é difisil pa ómis. ² Deus pode da posi, rikeza y onra pa un ómi, di manera ki ka ta falta-l nada ki e ta dizeja pa el; ma, omesmu tenpu, Deus ka ta da-l abilidadi pa e pruveta di es. Inves di kel-li, otu algen ta uzufrui di ses kuzas. Kel-li é sima un vapor, un aflison runhu. ³ Si un ómi ten sen fidju y el vivi txeu tenpu, nda ki se tenpu di vida é kunpridu, ma si se kurason ka fika sastifeitu ku kuzas dretu, y e ka nteradu ku onra, nton N ta fla ki un bebé ki nase mortu sta na midjor situason di ki el. ⁴ Mesmu ki es bebé nase purakazu, y bai sen odja lus, y se nomi fika na anonimatu. ⁵ Apezar di kel kriansa ka odja sol o ka konxe nada, e ta diskansa, nkuantu kel ómi nau. ⁶ Mesmu ki un ómi vive pa dos mil anu, ma si e ka prende pruveta di kuzas dretu, e ta bai pa omesmu lugar ki tudu algen. ⁷ Sikre tudu trabadju di un ómi é ntxi se stômagu, se apetiti nda ka ta fika satisfeitu. ⁸ Na verdadi, ki vantaji ten un algen sabidu en relason a un algen tolu? Ki vantaji ten un ómi pobri, mesmu ki e sabe moki e ta aji dianti di otus algen? ⁹ É midjor bu kontenta ku kuze ki bus odju pode odja di ki dizeja kuze ki un apititi ta dilera, ki tanbe é sima vapor y sima un tentatitva di pastoreia bentu. ¹⁰ Kalker kuza ki dja izistiba dja rasebe se nomi, y kuze ki umanidadi é, dja staba konxedu antis. Asi, bira inutil briga ku kel ki é puderozu juis di tudu. ¹¹ Kantu mas palavra é papiadu, mas futilidadi ta omenta; Nton kal ki é vantaji di kel-li pa un ómi? ¹² Pamodi kenha ki sabe kuze ki é dretu pa ómi na se vida duranti ses futil y monti dias, pa kal ki e ta pasa sima un sonbra? Kenha ki pode fla pa un ómi kuze ki e ta odja dibaxu di sol dipos ki e bai?