¹ Presta atenson na bu konportamentu oras ki bu bai pa kaza di Deus. Bai la pa bu ba obi. Obi é midjor ki oferese sakrifisiu moda tolus, pamodi es ka sabe kuze ki es sa ta faze, es é runhu na ses vida. ² Ka bu ser fadigadu pa bu papia, nen na bu kurason ka bu ten presa pa traze kalker asuntu dianti di Deus. Deus sta na séu, mas abo bu sta na tera; nton papia poku. ³ Si bu ten monti kuza pa bu priokupa ku el, manba bu ta ten sonhus mariadu. Kantu mas bu papia. Mas tulisis bu ta papia. ⁴ Oras ki bu faze un votu pa Deus, ka bu dura pa bu kunpri-l, pamodi Deus ka ten prazer ku tolus. Kunpri kel ki bu prumete. ⁵ Midjor ka bu faze votu di ki faze-l y bu ka kunpri. ⁶ Ka bu pirmiti ki bu boka faze-u peka. Ka bu fla pa mensajeru di Deus: "Era pa N ka fazeba es votu." Pamodi ki bu ta faze Deus fika iradu, oras ki bu faze juramentu falsu, pa provoka-L pa E distrui trabadju di bu mon? ⁷ Pamodi na monti sonhu, sima na monti palavra, ten vapor sen xintidu. Nton, teme Deus. ⁸ Oras ki bu odja na bu zona, pobri ta ser oprimidu y ta negadu un tratamentu justu y dretu, ka bu spanta sima ki ningem ka sabe di kel-li, pamodi ten algen na puder ki ta vijia kes ki sta dibaxu di es, y nda ten otus ki sta ses. ⁹ Alen di kel-li, tudu prudutu di tera é pa nos tudu, y propri rei ta tra prudutus di ortas. ¹⁰ Kenha ki ta ama prata ka ta fika satisfeitu ku el, y kalker algen ki ta ama rikeza senpri ta kre mas. Kel-li tanbe é vapor. ¹¹ Na midida ki rikeza ta omenta, tambe ta omenta algen pa kunsumi-l. Ki vantaji ta izisti na rikeza pa se donu, sinon na odja-l ku ses odju? ¹² Sonu di un ómi tabadjador é doxi, sikre e kume poku, o e kume txeu; ma rikeza di un algen riku ka ta pirmiti-l durmi dretu. ¹³ Ten un grandi mal ki N odja dibaxu di sol: rikezas djuntadu pa se donu, ki ta rizulta na se propi mizeria. ¹⁴ Oras ki ómi riku perde ses rikeza trokadu di sorti runhu, se propi fidju, kel ki e jera, ta fika sen nada na mon. ¹⁵ Sima un ómi ta nase nunpriti di bariga di se mai, asi tanbe e ta dexa es bida sen leba nada. E ka ta pode leba na se mon nada di se trabadju. ¹⁶ Otu grandi mal é ki, izatamenti sima un algen ben, asi tanbe e ta volta. Ki lukru algen pode ten oras ki e ta trabadja pa bentu? ¹⁷ Duranti ses dia, e ta kume na sukuru, ku txeu angustia, duensa y raiba. ¹⁸ Kuza ki N odja: bon y dretu é kume y bebe, y pruveta lukru di tudu nos trabadju, timenti nu ta trabadja duru dentu sol duranti tudu dia di nos vida ki Deus da-nu. Pamodi kel-li é tarefa di ómi. ¹⁹ Kalker algen ki Deus da rikeza y bens, y kapasidadi di resebe se parti y fika kontenti na se trabadju - kel-li é um prizenti di Deus. ²⁰ Pamodi e ka ta lenbra txeu di dias di se vida, pamodi Deus faze-l fika okupadu ku kuzas ki e gosta di faze.