¹ Mas unbes, N pensa sobri tudu opreson ki ta kuntise dibaxu di sol. Sta li láguas di algen ki sta ser oprimidu y es ka tenba ningen pa konsola-s. Puder staba na mon di ses opresoris, y ka tenba ningen pa traze-s konsolu! ² Asi, N kunsidera mas sortiadu kes pesoas ki dja more di ki ku kes ki nda sta bibu. ³ Ma, mas sortiadu nda di ki es dos, é kes ki nda ka nase, kes ki ka odja kalker atu di maldadi ki ta fazedu dibaxu di sol. ⁴ Nton, N odja ma tudu atu di fadiga y tudu trabadju abilidozu bira mutivu di nveja pa kes ki ta ben dipos. Kel-li tanbe é sima vapor y sima un tentativa di pastoria bentu. ⁵ Tolu ta fitxa se mon y ka ta trabadja; Nton se propri karni ta pasa ta ser se kumida. ⁶ Ma é midjor un mon xeiu di lukru, ku trabadju trankilu, di ki dos mon xeiu, ku trabadju di tenta pastoria bentu. ⁷ Nton, N rifliti novamenti sobri mas futilidadis y mas vapor ki ta dizaparese dibaxu di sol. ⁸ Ten un tipu di ómi ki é solitariu. E ka ten ningen, nen fidju o irmon. Ka ten fin pa tudu se trabadju y ses odju ka ta fika satisfeitu ku rikeza konsigidu. Nton, e purgunta: pa kenha ki N sta ta trabadja duramenti y ta pruibi nha kabesa di prazer? Kel-li tanbe é moda vapor, un mau situason . ⁹ Dos algen djuntu ta trabadja midjor ki un. Djuntu es pode atxa midjor pagamentu pa ses trabadju. ¹⁰ Pamodi, si un kai, kel otu pode labanta-l. Ma tristeza ta sigi kel ki sta el so; Oras ki e kai, ka ta ten ningen pa labanta-l. ¹¹ Si dos algen deta djuntu, es ta pode skenta kunpanheru, ma modi ki un pode skenta el so? ¹² Un ómi el so pode ser dominadu, ma dos pode rizisti un atake. Un korda triplu ka ta rabentadu faxi. ¹³ É midjor ser un joven pobri, ma sériu, di ki un rei bedju tolu ki ka sabe mas obi konsedjus. ¹⁴ kel-li é verdadi, sikre ki joven bira rei dipos di sai di un kadia o sikre ki e tenba nasidu pobri na se reinu. ¹⁵ Ma, N odja tudu kes ki staba bibu y ta anda dibaxu di sol, ta obidese un otu joven ki labantadu sima rei. ¹⁶ Ka ten ninhun fin pa tudu pesoas ki kre obedese novu rei, ma, dipos, txeu di es ka ta ngaba-l mas. Sertamenti, es situason é sima vapor, y sima un tentativa di pastoria bentu.