¹ Pa tudu ten un tenpu sertu, un tenpu pa kada prupózitu dibaxu di séu. ² Ten um tenpu pa nase y un tenpu pa more; um tenpu pa planta y un tenpu pa kodje kel ki simiadu. ³ Un tenpu pa mata y un tenpu pa kura, um tenpu pa ronba y un tenpu pa kunstrui. ⁵ Ten un tenpu pa txora y un tenpu pa ri; un tenpu pa lamenta y un tenpu pa badja; ⁴ un tenpu pa spadja pedra y un tenpu pa djunta pedra, um tenpu pa abrasa algen y un tenpu pa dexa di abrasa. ⁶ Un tenpu pa kore tras di kuzas y un tenpu di para di kore tras di kuzas; un tenpu pa guarda kuzas y un tenpu pa fulia kuzas fora; ⁷ Un tenpu pa ratxa ropas y un tenpu pa kustura ropas; un tenpu pa fika kaladu y un tenpu pa papia. ⁸ Ten un tenpu pa ama y un tenpu pa ódia; un tenpu pa gera y un tenpu pa pas. ⁹ Ki vantaji ki trabadjador ten di se trabadju? ¹⁰ N odja obra ki Deus da ómi pa rializa. ¹¹ Deus faze tudu adikuadu pa se tenpu sertu. E pui Tanbe internidadi na kurason di ómi; ma ómis ka ta kunsigi ntende obras ki Deus faze desdi kumesu ti fin. ¹² N ntende ma ka ten nada midjor pa algen di ki fika filis na faze ben timenti e sta bibu, ¹³ y ki tudu kel ki ta kume y ta bebe ntende mo ki e ta goza di ben ki ta ben di se trabadju. Kel-li é prizenti di Deus. ¹⁴ N sabe ki tudu kuza ki Deus ta faze ta dura pa senpri. Nada pode ser akrisentadu o tradu di kel-la, pamodi é Deus ki ta faze kel-la pa pesoas txiga na El ku onra. ¹⁵ Kel ki izisti dja tenba y kuze ki ta ser, dja izistiba. Deus ta faze ómi buska kuzas sukundidu.[Inves di "Deus ta faze ómi buska kuzas sukundidu", otus verson mudernas ta nterpreta es versu di diferentis manera] ¹⁶ N odja runhesa ki izisti dibaxu di sol, na lugar undi ki dibia staba justisa y na lugar di retidon, staba runhesa. ¹⁷ N fla na nha kurason: Deus ta julga justu ku ínpiu, na tenpu sertu, pa kada kuza y kada obra. ¹⁸ N fla na nha kurason: Deus ta testa ómi pa mostra-s ki es é sima limaria. ¹⁹ Pamodi distinu di fidju di ómis ku distinu di fidjus di animal é kel me. Morti di un é sima morti di kel otu. ²⁰ Manera di rispira é kel me pa es moku. Ka ten vantaji di ómis riba di limaria, pamodi es ka ten mesmu folgu? Es tudu sa ta bai pa mesmu lugar. Es tudu es ben di po di tera y pa po di tera es tudu es ta volta. ²¹ Kenha ki sabe si spritu di ómi ta bai pa riba y spritu di limarias ta bai pa baxu di tera? [Alguns verson mudernas ta traze " Kenha ki konxe sprtitu di ómi, ki ta bai pa riba, y spritu di limarias, ki ta bai pa baxu di tera?"] ²² Nton, otu bes, N txiga konkluzon ki ka ten nada midjor pa algen di ki ten prazer na se trabadju, pamodi kel-li é se pagamentu. Kenha ki ta faze-l volta pa e odja kuze ki ta kuntise dipos di el?