¹ N fla na nha kurason: "Ben gosi, N ta ben prova-u ku nha filisidadi. Nton sprumenta aligria". Ma, odja, kel-li tanbe é so un iluzon. ² N papia serka di surizu: "Kel-li é lokura"; y sobri prazer: " ³ N djobe na nha kurason modi ki N ta satisfaze nha dizeju ku vinhu. N dexa nha menti gia-m ku sabiduria, mesmu ki inda N staba pegadu na tulisi. N djobe diskubri kal ki é bon pa algen faze dibaxu di séu duranti bus dias di bida. ⁴ N faze kuzas grandi. N faze kaza y N planta vinha pa mi mesmu. ⁵ N planta monti di árvoris di fruta pa mi; N planta tudu tipu di árvori di fruta na el. ⁶ N kria tanki pa guarda águ pa rega floresta undi árvoris staba ta krese. ⁷ N kunpra skravus y skravas; N tivi skravus ki nase na nha palasiu. Tanbe N tivi txeu ribanhu y gadu, mas txeu ki otu rei ki guverna Jiruzalen antis di mi. ⁸ Tanbe, N djunta pa nha kabesa prata y oru, di reis y pruvinsia. N skodje kantoris y kantoras y N tivi kunkubinas - prazeris di fidjus di omi. ["tudu ki ta agrada pesoas" o kunkubinas y tudu ki ta agrada ómis" (Verson mudernu ta nterpreta ultimu parti di es versu na manera diferenti)] ⁹ Nton, N bira mas puderozu y riku di ki tudu kes ki vivi antis di mi na Jiruzalen, ta konserba ku mi sabiduria. ¹⁰ Tudukes ki nha odju dizeja, N ka nega-s. N ka nega pa nha kurason ninhun prazer, pamodi nha kurason ntxi di alegria ku tudu nha trabadju y prazer bira rikonpensa di tudu nhas sforsu. ¹¹ Nton, N odja pa tudu kel ki nha mon faze y pa trabadju ki N faze, ma, di nobu, tudu era sima un vapor y sima un tentativa di pastoria bentu. Ka tenba pruvetu dibaxu di sol. ¹² Nton, N volta pa N kunsidera sabiduria y tanbe tulisi di tolu. Kuze ki pode faze rei ki ta susede-m ki nda ka fazedu? ¹³ Nton, N kumesa ta ntende ki sabiduria é midjor di ki tulisi, izatamenti, sima lus é midjor ki sukuru. ¹⁴ Ómi sabidu ta uza ses odju pa tenta odja undi ki e sa ta bai, ma tolu é sima algen ki ta anda na sukuru. Nton, N ntende ki tudu ten mesmu distinu. ¹⁵ Nton, N fla na nha kurason: "Kuze ki ta kuntisi ku tolu tanbe ta kuntise ku mi. Nton, ki diferensa ta faze na ser txeu sabidu?". N kunklui na nha kurason: " kel-li tanbe é so iluzon". ¹⁶ Tantu ómi sabidu y ómi tolu ka ta ser lenbradu pa txeu tenpu. Na dias ki sa ta ben tudu ta ser skesidu. Asi sima tolu, ómi sabidu tanbe ta more. ¹⁷ Nton, N ditesta vida pamodi N atxa ma é mau tudu trabadju fetu dibaxu di sol, pamodi tudu é sima vapor y sima un tentativa di pastoria bentu. ¹⁸ N ódia tudu nhas rializason ki N trabadja dibaxu di sol, pamodi N ten ki dexa-s pa tras pa algen ki ta ben toma nha lugar. ¹⁹ Kenha ki sabe si e ta ser un sabidu o un tolu? Ma, e ta bira sinhor di tudu ki nha trabadu ku sabiduria kunstrui. Kel-li é tanbe iluzon. ²⁰ Nton, nha kurason kumesa ta dizispera pa tudu sforsu ki N faze dibaxu di sol. ²¹ Ma, podi ten algen ki ta trabadja ku sabedori, ku kunhisimentu y talentu, ma e ta dexa tudu kel ke faze pa kenha ki ka faze nada. Keli tanbe e iluzon y un grandi tragedia. ²² Ki pruvetu algen ten di trabadja duru y tenta na se kurason kontenpla duru trabadju ke faze dibaxu sol? ²³ Tudu dia se trabadju e kansadu y stresanti y, di noti, se alma ka ta diskansa. Keli tanbe e iluzon. ²⁴ Ka ten nada midjor da algen di ki sinplismenti kume ku bebe y sta satisfetu na se trabadju. N odja na verdadi ma tudu ta ben di mon di Deus. ²⁵ Pamodi kenha ki pode kume o kenha ki pode ten kalker tipu di prazer lonji di Deus? ²⁶ Pamodi tudu ki ta agrada-L, Deus ta da sabiduria, kunhisimentu y aligria. Ma, pa pekador E ta da trabadju di djunta y guarda, pa ntrega pa otu di kenha ki Deus ta agrada. Kel-li tanbe é sima vapor y sima un tentativa di pastoria bentu.