¹ Kel-li é palavra di pregador, disendenti di Davidi y rei na Jeruzalen. ² Pregador ta fla: Sima un vapor di niblina. sima un briza di bentu, tudu ta pasa, ta dexa monti dúvida. ³ Ki lukru ki ómi ta ganha ku tudu trabadju ki e ta fadiga ku el dibaxu di sol? ⁴ Un jerason ta bai, otu jerason ta ben, ma tera ta mante pa senpri. ⁵ Sol ta nanse y ta kanba, y di nobu e ta fadiga pa e volta pa lugar undi ki e nase. ⁶ Ventu ta sopra pa sul y e ta sirkula pa norti, senpri ta bai pa se kaminhu y e ta volta di nobu. ⁷ Tudu riu ta kore pa mar, ma mar nunka ka ta ntxi. Na lugar undi riu ta bai, pa la es ta torna bai di nobu. ⁸ Tudu ta bira kansera y ningen ka ta pode splika kel-la. Odju ka ta farta ku kuze ki es ta odja, nen obidu ku kuze ki es ta obi. ⁹ Kel ki dja era, é kel ki ta ser y kel ki dja fazedu é kel ki ta torna fazedu. Ka ten nada di nobu dibaxu di sol. ¹⁰ Ten kuza ki pode fladu:"odja, kel-li é nobu?" Tudu kel ki izisti, dja staba ta izisti desdi monti tenpu, na tenpu antigu ki ben monti anus antis di nos. ¹¹ Ningen ka ta parse ma sta lenbra di kuza ki kuntise na tenpu antigu y nen di kuzas ki kuntise txeu tenpu dipos y kuze ki ta ben kuntise na futuru, sertamenti, tanben ka ta ser lenbradu. ¹² Ami é pregador, y N reina riba Israel na Jiruzalen. ¹³ N pui nha menti na studa y na djobe ku sabiduria sobri tudu kuza ki fazedu dibaxu di séu. Djobe tudu es kuza é un trabadju ki ta kansa, ki Deus ntrega pa fidjus di ómi pa es ukupa na el. ¹⁴ N ten odjadu tudu obras ki fazedu dibaxu di sol y, odja, tudu es é sima vapor y sima tentativas di pastoria bentu. ¹⁵ Kuze ki sta tortu ka ta pode ndiretadu; kuze ki sa ta falta ka ta pode ser kontadu! ¹⁶ N ten papiadu pa nha kurason, ta fla:"Odja! N kunsigi mas sabiduria di ki tudu kes ki ben antis di mi, na Jeruzalen. Nha menti ten odjadu grandi sabiduria y kunhesimentu". ¹⁷ Nton, N aplika nha kurason pa konxe sabiduria y tanbe lokura ku nosentesa. N txiga konprienson di ki kel-li tanbe era un tentativa di kore tras di bentu. ¹⁸ Pamodi na txeu sabiduria ten txeu frustrason, y kel ki ta omenta sabiduria, ta omenta sufrimentu.