¹ Nhos obi kel palavra, bakas di Basã, nhos ki sta na monti di Samaria, ki oprimi pobri, ki smaga nisisitadu, bo ki ta fla pa nhos maridu: "traze-nu bibidas". ² Sinhor di Izersitu jura pa se santidadi: "Odja, dia ta ben riba nhos, es ta leba nhos ku anzol, kes ultimu di nhos ku arpon. ³ Nhos ta sai pa braku di muru, kada un di nhos ta trabesa y nhos ta ser lansadu na direson di Armon - Si ki Nhordes fla". ⁴ "Nhos ben pa Betel y nhos peka, nhos bai pa Gilgal y nhos multiplika pekadus. Nhos trazi, tudu palmanhan nhos sakrifisiu y nhos dizimus, di tres en tres dia. ⁵ Nhos oferese sakrifisiu di gratidon ku pon; fala di oferta vuluntariu, keli nhos ta fla, pamodi ta agrada nhos, o povu di Israel - Si ki Nhordes fla. ⁶ N dexa nhos ku denti linpu, na tudu nhos sidadi, y N dexa falta pon na tudu nhos lugar. Y sime, nhos ka volta pa Mi, - si ki Nhordes fla. ⁷ Tanbe N ka manda txuba kantu sa ta faltaba tres mes pa kodjeta. N fazi txobi na un sidadi y na otu nou. Txobi na un parti di tera, ma na otu parti di tera ki ka txobi, y E seka. ⁸ Nhos bai pa dos, o tres sidadi ti otu sidadi p bebe agu, ma pisoas ka mata sedi. Y sime, nhos ka volta pa mi - si ki Nhordes fla. ⁹ N kastiga nhos ku feruje ku mofu. Txeu jardin di nhos, nhos videra, nhos figera y nhos olivera, gafanhotu kaba kual. Y sime, nhos ka volta pa Mi", si ki Nhordes fla. ¹⁰ "N manda praga pa nhos, sima na Ijitu. N mata nhos jovens ku spada, N rasta nhos kabalu, y N fazi nhos kanpu txera mal ti txiga nhos naris.Y sime, nhos ka volta pa Mi", si ki Nhordes fla. ¹¹ N pui kai sidadi na bu meiu, sima N pui kai Sudoma y Gumora. Nhos era sima um lenha ki tradu di lumi. Y sime, nhos ka volta pa Mi - si ki Nhordes fla. ¹² Purtantu, N ta fazi kuza terivel ku bo, Israel; pamodi N ta fazi kuza terivel ku bo, pripara pa bu nkontra ku bu Deus, Israel! ¹³ Pamodi é El ki fazi y tanbe kria bentu, ta rivela Ses pensamentu pa umanidadi, ta fazi skuridon di palmanhan y ta piza na lugar altu di Tera. Sinhor, Deus di Izersitu, é Si nomi".