¹ Nhos obi palavra ki Nhordes sa ta papia kontra nhos, povu di Israel, kontra tudu familia ki N tra di tera di Ijitu: ² "N skodje-u so bo, na meiu di tudu familia na tera. Purisu, N ta kastiga-u pa tudu bus pekadus. ³ Ta anda dos djuntu, si es ka sta di akordu? ⁴ Lion ta ruji na floresta, ora ki e ka tini preza? Fidju di lion pode rasmunga di se kau di sukundi, se ka panha nada? ⁵ Un pásaru pode kai na un armadilha na tera, se armadilha sta baziu? Un armadilha ta labanta di txon, se ka panha nada? ⁶ Algen ka ta treme, si tokadu tronbeta na sidadi? Pode kuntise un dizastri riba sidadi ki Nhordes ka manda? ⁷ Di verdadi Nhordes ka ta fazi nada, timenti E ka mostra se planu pa ses servu, y profetas. ⁸ Lion dja ruji; kenha ki ka ta tremi? Nhordes dja papia; kenha ki ka ta profetiza? ⁹ Nhos anunsia na fortalezas di Asdode y na fortalezas na tera di Ijitu. Fla: "Nhos djunta na munti di Samaria y nhos odja grandi kunfuson y abusu ki sta na meiu di bu povu. ¹⁰ Pamodi es ka sabi fazi kuzas dretu". Si ki Nhordes fla: "Es ta djunta violensia y distruson na ses fortaleza". ¹¹ Purisu, si ki Nhordes fla: "Un inimigu ta ben serka tera y ta ben distrui ses sidadi y furta ses fortaleza". ¹² Si ki Nhordes fla: "Sima pastor ki ta tra di boka di lion so dos perna, o un padaz di oredja, si ki povu di Israel ki ta vivi na Samaria ta ben ser libertadu, so ku un kantu di sufa, o so ku un padaz di kama". ^{13 14} Obi y tistimunha kontra kaza di Jako - Keli ke diclarason di Nhordes, Deus di Izérsitu: "Na dia ki N kastiga pekadus di Israel, N ta kastiga tanbe altar di Betel, y txifris di altar ta ben ser kortadus y es ta ben kai na txon. ¹⁵ N ta ben distrui kaza di invernu djuntu ku kaza di veron. Kazas di marfin ta ben sufri, y kes grandis kazas ta ben dizaparesi" - si ki Nhordes fla.