¹ Nhos obi es palavra ki N sa traze sima un lamentu riba nhos, kaza di Israel. ² Virjen di Israel dja kai; e ka ta labanta mas; dja e skesedu na si tera; ka ten ningen pa labanta-l. ³ Pamodi é si ki Nhordes fla: "kel sidadi ki sai ku mil ta resta sen, y kel ki sai ku sen ta resta des di kes ki ta faze parti di kaza di Israel". ⁴ Purisu ki Nhordes fla pa kaza di Israel; "Nhos buska-m y nhos ta vivi! ⁵ Ka nhos buska Betel; ka nhos entra na Gilgal; nen ka nhos pasa pa Berseba. Pamodi Gilgal ta ben lebadu prezu, y Betel ta bira nada. ⁶ Nhos buska Nhordes y nhos ta vivi, o E ta entra sima lumi na kaza di Juze. E ta kaba ku tudu, y ka ta ten ningen pa paga-l na Betel. ⁷ Kes algen es muda justisa pa kuza malgos y es bota na txon kuzas dretu!". ⁸ Deus faze Pleiades ku Orion; E ta muda sukuru pa klareza; E ta bira dia sukuru ku noti y e ta txoma águ di mar; E ta lansa-s riba tera. Se nomi é Nhordes! ⁹ E ta traze distruison faxi riba di kes ki é forti, pa ki distruison ben riba di fortaleza. ¹⁰ Es ka gosta ki ningen ki ta kuriji-s na porta di sidadi y es ta ditesta tudu kes ki ta papia verdadi. ¹¹ Pamodi nhos ta masa riba pobri y nhos ta toma-s ses poku trigu. Si kre nhos konstrui kazas di pedra ku txeu trabadju, ma nhos ka ta bai mora na el. Nhos ten pe di uvas sabi, ma nhos ka ta bebi se vinhu. ¹² Purisu N sabi kantu ki é nhos ofensa y modi ki é grandi nhos pekadu. Nhos ki ta trata justu mariadu, nhos ta fazi favor pa recebi dinheru y nhos ta da koitadu kosta na porta di sidadi. ¹³ Nton, goci, kes ke spertus sta kaladu pamodi tempu é runhu. ¹⁴ Nhos buska kuzas dretu, ka kuzas mariadu, pa nhos podi vivi. Pamadi Nhordes, Deus di Izérsitu, senpri ta sta ku nhos, sima nhos fla Me sta. ¹⁵ Nhos xinti raiba di kuzas mariadu, nhos ama kuza dretu, nhos pui justisa na porta di cidadi. Manba Nhordes, Deus di Izérsitus, ta ben ser mansu ku gentis di Juze. ¹⁶ Nton, si ki Nhordes fla, Sinhor y Deus di Izérsitu: "Ta ben tem lamentu na tudu kes prasa, y es ta ben fla na tudu kes strada, 'Ai di nos!' Es ta ben txoma tudu kanpunes pa lutu y pa kes ki sta di lutu pes lamenta. ¹⁷ Dentu di tudu lugar ki tem pe di uva ta ba tem lamentu, pamodi N ta bai pasa na nhos meiu". Nhordes fla. ¹⁸ Koitadu di nhos ki ta dizeja pa dia di Nhordes! Pamodi ki nhos sa ta dizeja pa dia di Nhordes? ¹⁹ E Ta ser sukuru, y ka Klaru. Ta ser sima ora ki omi ta kori di leon, y é ta kontra ku ursu; o e ta entra na un kaza, e ta poi mon na paredi, y un kobra ta morde-l. ²⁰ Ka ta ser dia di Nhordes un dia di sukuru, y ka Klaru? Di sukuru sen Klareza? ²¹ N ten raiba y N ka gosta di nhos festas, N ka ten gostu pa nhos sirimonias. ²² Si kre nhos oferesen nhos sakrifisiu y nhos oferta di kumidas, N ka ta aseita, nem N ka djobi pa oferta di paz di nhos animal gordus. ²³ Nhos tra di mi rabolisu di nhos kantigas; N ka ta obi mas son di nhos arpas. ²⁴ Primeru, nhos dexa kuzas dretu nasi sima águ; y justisa, sima rio ki ka ten fin. ²⁵ E pa mi ki nhos trazi kes sakrificiu y ofertas na dizertu pa korenta anu, kaza di Israel? ²⁶ Nhos labanta Sikuti sima nhos rei y Kuiun, nhos deus silesti - imajen ki nhos fazi a nhos me. ²⁷ Purisu, N ta ben leba nhos pa prison, dipos di Damasku", Nhordes fla, y se nomi é Deus di Izérsitu.