¹ Ago amde inye agobo ng'alek che nyoljini konetiset ne bo iman. ² Inet boisiek che kagoechegitu, koek che bo teegisto, che bou kabwatutikwai, che bo iman eng kayanet, eng chamyet, ak eng muitaet. ³ Ko u noto chebiosok che kagoechekitu , ingoek che teegisotin eng atebosiekwai, che ma kataamik, anan che ratyinigei divaik che chang, konetik che bo tuguk che kororon, ⁴ si kobiit konet chepyosok che mengechen kocham boisiekwai , kocham legukwai, ⁵ koek che bou kabwatutikwai , che tililen, che boisiei eng gorikwai, che taloen, che kase it boisiekwai, si ma kimwaitae ng'olyotab Jehovah kiy ne ya. ⁶ Ko u noto anyun, cheer murenik agiche koek che bo u kabwatutikwai. ⁷ Ibartege inyendet eng tuguk tugul iegu kaborunet ne bo boisionik che kororon. Ibarte tegisto ak atebet ne ma ng'emakse eng konetisieng'ung, ⁸ ak ng'alek che bo iman che magimuchi kiruokchi, si kobiit kolilan inendet ne kirindech, ko matinyei kiy ne ya ne mwaitaenech. ⁹ Ingogas iit otwogik che bo u icheket, ak kobaibai icheket komie eng tuguk tugul , amaek che wolu kiy, ¹⁰ amaek che chorse, ago kobarta kayanet tugul ne mie ; si kobiit kogochi icheket tegisto konetisietab Jehovah ne yetindennyo eng tuguk tugul. ¹¹ Amu kigotook mieindab Jehovah, ne ipchini biko tugul sarunet. ¹² Inetech kole ketoiye oret ne matokchinige Jehovah, ak magutik che bo ng'weny, ak ketebi eng ng'omnatet ne litit, ak eng imanda , ak eng oret ne tokchinigei Jehovah eng betusiechu, ¹³ keganye kamang'unet ne iberurot, noto ko toogunetab torornatetab Jehovah nenyo ne o ak Yetindennyo Jeiso Kristo. ¹⁴ Kiigoitoge Jeiso inendet agobo ache , si kobiit kotiachech eng tengekto tugul , ak kotililjige biko koek chechi, che lewenotin, che igiiligei koyai boisionik che kororon. ¹⁵ Mwa tuguchuto, cheer ak iteechi ak iger kong eng' kimnatet tugul. Amata sasin chi age tugul.