¹ Paulo, otwogindetab Jehovah ak ne kiyoktoi ne bo Jeiso Kristo, ko u kayanetab che kigilewen che bo Jehovah, ak naetab imanit ne namegei ak kaiyweet ne kiywei Jehovah, ² eng kamang'unet ne bo sobondab koigeny, ne kiiyomis Jehovah , ne maimuchi kokenis kotomo kotoigee kasarwek tugul chebo ebenwek. ³ Ago king'any ng'olyondennyi eng kasarta ne chamat eng amdaet ne kigitororwo ko u ng'atetab Jehovah Yetindennyo. ⁴ Asirun Tito, werinnyu ne bo iman eng kayanet ne kiemtoi: ingotebi koboten mieindo ak kalyet ne bunu Jehovah Kwanda ak Kristo Jeiso yetindennyo. ⁵ Kiabagakten eng Krete amu ng'olyondeni , si kobiit ichul tuguk che kirartootin, ak itoror boisiek eng nganaset age tugul, ko u ye kiang'atin. ⁶ Boiyot age tugul ne bo Kaniset ko magat ne matiny, ko chi ne matinye lelut, ne manongotiotab osotiot agenge, ne tinyei leguk che iyanotin che magimwaitae yaitio, anan che makase iit. ⁷ Amu kanyolji ribindetab kaniset koek chi ne matinyei lelut, inendet ne ribindetab boisietab Jehovah ma ne rube magennyi, ne ma sib konerechi , ne ma kibokityo, ne mabirisiei, ak ne ma kipsuryotio. ⁸ Ago ne taachei toek , ne chamei che kororon, bou kabwatutikchi, ne bo imanda, ne tilil, ako ribege. ⁹ Ne namei ng'olyot ne kiyani ko u ole teptoi konetisiet, si komuch koteechi eng konetisiet ne bo iman, ak koterter che kirindoi inendet. ¹⁰ Amu mi biko che chang che magastoi, ng'ololikab ng'alek chebo buch ak kenik, mising ko icheket che bo kamuratanet. ¹¹ Che kanyol keger kutuswekwai. Iserieti kapchi komugul , koneti tuguk che ma sikchini amu makchinige keljinoik che bo tewernatet. ¹² Kile age eng icheket ne maotiong'wai, "kiplembechonik Kretik kotugul, tiong'ik che yaachen , chemoetin ako chemeatin." ¹³ Bo iman baornatanita. Ker kong anyun eng kimnatet amu noto, si kobiit koek che bo iman eng kayanet, ¹⁴ ame ebchi iit atindonikab Yahudik, ak ng'atutikab biko che istoegei imanit. ¹⁵ Tililen tuguk tugul eng icheket che tililen. Ago mami kiy ne tilil eng icheket che muruonen ak che maiyoni, ago muruonen eng kabwateng'wai ak kabwotutikwai. ¹⁶ Mwaei kole ingen Jehovah, ago taisot inendet eng boisionikwai. Kigoek che machomu, ak che magase iit , ama tilei kiy eng boisiet age tugul ne kararan.