¹ Ak kiageer ye kingoyaat Aruet agenge eng' ng’ok sosiechoto tisab, ak kiagas agenge eng' tiong’ichoto ang’wan saptos komwa eng’ tuget ne ki tule ko u ilat kole "Nyo!" ² Ak kiageer anyun mbartanyit ne leel. Ak kitinye kianda ketindet, ak kigigochi inendet kutwet. Ak kimong' ko katerterin, ak asi kosich koterteris. ³ Ak ye kingoyaat Arwet ng’okset ne bo aeng, agas tiondo ne bo aeng’ ne sobei kole, "Nyo!" ⁴ Ak kimong’ Mbartanyit age---ne birir ak kigigochi inendet ne kikete koisto kalyet kobet eng’ ng’weny, si kobiit kobargei ichegei eng ichegei.. Kigigochi inendet rotwetab chok ne o. ⁵ Ak ye kingoyaat Arwet ng’okset ne bo somok, agas tiondo ne sobei ne bo somok kole, "Nyo!" Ak kiageer anyun mbartanyit ne tuui, ak kitinyei ratilit eng’ eunyi inendet ne kikete. ⁶ Ak kiagas ne u tuget eng’ kwenutab tiong’ichoto ang’wan che saptos kolen, "kialdoe kibabetab nganok denarit agenge, ak kialdoe kibabok somok che bo sairik denarit agenge. Ameng’em mwaita ak divaik." ⁷ Ak ye kingoyaat Arwet ng’okset ne bo ang’wan, agas tugetab tiondo ne sobei ne bo ang’wan kole, "Nyo!" ⁸ Ak kiageer anyun, mbartanyit ne talelyo. Ak kainetab inendet ne kikete ko kigiguree meet, ak kirube inendet oldab che kigomeiyo. Ak kigigochi ichecket kimnatet koboi kebeberta agenge eng’ ang’wan ne bo ng’weny, kobare rotwetab chok, rubet ak miondo, ak tiong’ikab timdo che yaachen che bo ng’weny. ⁹ Ak kingoyaat Arwet ng’okset ne bo mut, ageer eng’ kureretab kaptisisio sobonwekab icheket che kigibar amu ng’olyotab Jehova, ak baornatet ne kitinyei. ¹⁰ Ak kimwa eng kutit ne o kole, "Agoi ou, ee Bounindetab tugul, ne tilil ak ko bo iman, si iruokyi ak iyaaktoiywech mugetit ogobo korotikyo eng’ ichek che menyei ng’weny?" ¹¹ Ak kigigochi age tugul eng’ icheket ngoriet ne goi ne leel, ak keleji ko ta kogany ne matia, kot kosulda koitetab che otwogik koboto icheket, ak tupchosiekwai, che tun kibarei ko u icheget. ¹² Ak kiageer ye kingoyaat Arwet ng’okset ne bo lo, ak kibiit kiprengreng’it ne o mising. Ak kituuit asista ko u kuniet ne kigiyae kororik che tuuen, ak kikergeit arawet komugul korotik. ¹³ Ak kiroroiyo ng’weny kokelik che mi kipsengwetisiek, ko u ye ibutos eng’ mogoiywet logoekyi, kotomo korurio, ye itumdumi koristo ne o. ¹⁴ Ak kiistogee kipsengwet ko u kartasit ne kakimaman. Ak kigiisto eng komoswekwai tulwet age tugul ak emet age tugul ne kiikwen beko. ¹⁵ Kong'et anyun Laitorinikab ng’weny ak bounik, ak kiptainik che eechen, ak magorek, ak che kimen, ak chi age tugul ne rarat ak chi age tugul ne itiagat, kounygee eng’ kebenonik ak ruandosiek che bo tulonok. ¹⁶ Ak kolejini tulonok ak ruandosiek, "Oluulchech! Ak ounyech eng’ togetab inendet ne tebee ng’echeretab Laitornatet, ak eng’ neregekab Aruet. ¹⁷ Amu kagoit betut ne o ne bo neregekwai. Ak tos ng’o ne imuchi kotonon?"