¹ Ak kiageer anyun eng’ eutab tai ne bo inendet ne kitebee ng’echeranato bo laitornatet, bukuit ne kigisiir tai ak batai, ne kiging’och eng ngoksosiek tisab. ² Ak kiageer anyun malaikayat ne kim kobarastoi eng’ kutit ne o, kole, "Ng’o ne nyolu koyaatk bukuit ak kotiach ng’oksosiekyi? ³ Ak kima komi chi kipsengwet, anan ng’weny, anan ko kureretab ng’weny ne kiimuchi koyaat bukuinoto, anan kosoman. ⁴ Ak kiarir missing amu kima biit chi ne nyolu koyaat bukuinoto anan kogeer kosoman. ⁵ Ak kilejo age eng’ boisliechoto, "Ameterir. Keer anyun! Kigoterter Ng’etundo ne bo oretab Juda, Tigitiotab Daudi, ko kigoturis. Ako imuchi inendet koyaat ng’oksosiechoto tisab." ⁶ Ak kiageer Aruet ne kitononi eng’ kwenutab ng’echeranato bo laitornatet ak tiong’ichoto angwan saptos, ak eng kwenuta boisiechoto. kitoogu ko u ne kegaa kebar. Kitinye kuinoik tisab ak konyek tisab, choto ko tamirmirik tisab che bo Jehova che kigiyokto koba ng’weny komugul. ⁷ Kiwo anyun ak koib bukuit eng’ eutab tai ne bo inendet ne tebee ng’echeranato bo laitornatet. ⁸ Ak ye kingo kagoib bukuinoto, kobutyi taitab Arwet tiong'ichoto ang’wanu saptos ak boisiechoto tiptemu ak ang’wan. Ak kitinye age tugul ketubet ak tabet ne bo tahabu ne nyiitotin nyamdutik, che kebeelei, che choto ko sautikab bikab Jehovah che tililen. ⁹ Ak kitienyo tiendo ne leel: kolen "nyoljinin inam bukuit ak iyaat ng’oksosiekyi. Amu kigienyin, ak eng korotiguk ko kiialji Jehova biko kobun bororiet age tugul, ak che bo kutit age tugul, ak che bo bik alak tugul, ak che bo ematunwek tugul. ¹⁰ Ak kiiyai icheket koek bororiet ak tisiik eng’ Jehova nenyo, ak kobounisie eng’ ng’weny." ¹¹ Ak kiageerte anyun ak kiagas kutitab malaikaisiek che chang’ che kiimut ng’echeranato bo laitornatet ak tiong’ik che saptos ak boisiek. Ak koitengwai ko ki elfusiek tamanusiek konyil elfusiek konyil elfusiek che bo elfusiek. ¹² Kimwaei eng’ tuget ne o kole, "Nyolunot Aruet, ne kigieny, kotaach bounatet, magornatosiek, ng’omnatet, kimnatet, teegisto, torornatet ak kalosunet." ¹³ Ak kiagas kito age tugul ne kigiyai ne kimi kipsengwet, ak ne mi ng’weny, ak ne mi kureretab ng’weny, ak eng’ araraita-ak tuguk tugul che mi oring'wai-kolen, "Ingobunji inendet ne tebe ng’echeretab laitornatet ako inendet Aruet, kalosunet, tegisto, torornatet, ak bounatet koigeny ak koigeny. ¹⁴ Ak kimwa tiong'ichoto ang’wanu saptos kole," Amen!" Ak kobutyi ng’weny boisiechoto ak kukutungchi.