¹ Ak kiageer kipsengwet ne leel ak ng'weny ne leel, amu kigakosirto kipsengwet ne bo tai ak ng'wenyut ne bo tai, ago kima komi araraita kogeny. ² Ak kiageer emet ne tilil, Jerusalem ne leel, kowolu eng kipsengwet Kobunu Jehova, ko kagechob ko u mureret ne kagelelesanji sandenyi. ³ Ak kiagas kutit ne o komong'une ng'echeretab laitornatet kolen, "Ogeer anyun! Mi ole tebee Jehova ak biko, ago meng'isie koboto icheket. Egu icheket bikchi, ak kotebi Jehova inendet ak icheket ak koek Jehova neng'wai. ⁴ Ak kobukchi inendet beekab Kong' alak tugul eng konyekwai, ama komi meet kogeny, anan ko kateet kogeny, nda ko rirek, nda ko ng'wanindo. Kigosirto tuguk che bo tai. ⁵ Ak kimwa inendet ne tebee ng'echeretab laitornatet, kole, "Ogeero! ayae tuguk tugul koleelagitu." Ak kile, "Sir tuguchu amu ngalechu ko che kiyani ak kobo iman." ⁶ Ak kolejo, "Kagosulda tuguch! Ai Alpha ako aii Omega, taunet ak kagesunet. Agochini buch inendet ne ame melelda che bunu kondab beekab sobondo. ⁷ Inendet ne iterteri konamu tuguchu, ak aegu Jehova nenyi ak koek inendet werinyu. ⁸ Ago icheketet che nyogoren, ak che matinye kayanet, ak che kisase, ak rumik, ak che sokse, ak boniik, ak che sae kanamonik, ak kiplembechonik tugul, kotinye kebebertang'wai eng araraita ne lale matab koik che laldos. Nito ko meet ne bo aeng." ⁹ Ak kinyo agenge eng malaikaisiechoto tisab che kitinye ketubonik tisab che ki nyiitotin korotwek tisabu che bo let, ak kole, "Nyo yu. Awendi aborun mureret, osotiotab Aruet." ¹⁰ Ak kiimuta eng' Tamirmiriet agoi tulwet ne o ago koi ak kiboruo emet ne tilil Jerusalem kowolu eng kipsengwet Kobunu Jehovah. ¹¹ Kitinye Jerusalem torornatetab Jehova, ak talilindanyi ko ki kerge ak koita ne bo kamanutiet ne o, ak ko u koita ne bo Jasipi ne tilil ko u krustalo. ¹² Kitinye karwet ne o, ne koi ak kotinye kurgotik taman ak aeng', che kimi malaikaisiek taman ak aeng. Eng kurkotichoto ko kigisir kainaik chebo ortinwek taman ak aeng che bo werikab Israel. ¹³ Kimi komostab kongasis kurgotik somogu, ak kimi komostab murot ne bo katam kurgotik somogu, ak kimi komostab murot ne botai kurgotik somogu, ak kimi komostab cherongo kurgotik somogu. ¹⁴ Ak kitinye karwetab emonoto lumeiywek taman ak aeng, ak kimi kainaikab che bo che kiyoktoi taman ak aeng che bo Aruet. ¹⁵ Ak kitinye inendet ne king'alalwo tegat ne bo tahabu si kokwae emet, ak kurgotikchi ak karwenyi. ¹⁶ Ak kiaechin karwesiek tugul angwanu che bo emet; ak kiaechin koindanyi ak tebeesindo. Ago kiikwae emet tegandanoto, ak kiek mailisiek elfut agenge ak bogol mut koindanyi (koindanyi, tebe sindanyi, ak koindanyi ne wendi barak ko kiaechin). ¹⁷ Ak Kiikwa kora karwenyi, ak kiek kakwoutikab eut bogol ak artam ak agwan eng kakwaetab chito (noto kora ko ne bo malalaikaiyat). ¹⁸ Ak kigitechee jasipi karwenyi, ak nganaset ko kigitechee tahabu che tililen, ko u glasit ne lildoi. ¹⁹ Ak kigilelesonji lumeiywekab karwet ne bo emet eng koik alak tugul che bo kamanutiet ne o. Nebo tai ko ki jasipi, ne bo aeng' ko ki sapire, ne bo somok ko ki kalkedo, ne bo angwan ko sumaragdo, ²⁰ ne bo mut ko sardonukso, ne bo lo Ko sardio, ne bo tisab ko krusolito, ne bo sisit ko beryli, ne bo sokol ko topasi, ne bo taman ko kruspopraso, ne bo taman ak agenge ko huakint, ak ne bo taman ak aeng ko ametusto. ²¹ Ak kurgotik taman ak aeng' ko ki sanaek taman ak aeng' che kororon; age tugul eng kurgotik ko ki chobe sanaiyat agenge. Ak kikichobe tahabu che tililen ko u glasit ne sengelel oretab nganaset. ²² Ama geer hekalut orititab nganaset, amu Kiptaiyat Jehova Kamuktaindet ak Aruet ko hekalunyi. ²³ Ak kima ko mache nganaset asista, nda ko arawet si kobiit kokweny amu ikwenyi torornatetab Jehova, ako tainyi ko Aruet. ²⁴ Ak kobendote bororiosiek lapkeiyetab nganasanato. Ak koibu laitorinikab ngw'eny torornateng'wai kocho orit. ²⁵ Ama kigere kurgotikchi bet ako mami kemout oloto. ²⁶ Ak ibu icheket torornatet ak teegistab bororiosiek kobwa orit, ²⁷ ago machute orit kiy age tugul ne ma tilil nda ko ne yae kiy ne kisase, anan ko kenisiet, ago kobate icheket che kigisirji kainaikwai Bukuitab Sobondo ne bo Aruet.