¹ Ak kiageer malaikaiyat kowolu eng' Kipsengwet. Kitinyei yateiywotab kebenet ne loo ne man'ete let, ak kotinye sirimdo ne o eng' eunyi. ² Kinam anyun ndaret, erenet ne bo keny, ne inendet ko oindet ago chesawil, ak korat inendet kenyisiek elfut agenge. ³ Ak kowirji inendet kebenet ne loo ne mang'ete let. Ak koger ak kong'och baragunnyi. Si mata koberber bororiosiek kogeny agoi kogesge kenyiksiek elfut agenge. Ye ibata noto, kitiach ne matia. ⁴ Ak kiageer ng'echerokab laitornatet. Ak che kitebe Icheket ko che kigagegochi kimnatet koruoch. Ak kiageer sobonwekab ichekelt che kigitil metewek amu baornatetab Jeiso ak ng'olyotab Jehova. Ak ko icheket che magutungji tiondo anan ko kanamwenyi, ako che kimanyor ng'okset eng' togochikwai anan eng' eunekwai. Kisopcho anyun, ak kolaitoran koboto Kristo kenyisiek elfut. ⁵ Ma sopcho che kiga komeiyo agoi kogesge kenyisiek elfut agenge. Nito ko ng'eetiet ne bo tai. ⁶ Iberurot ako tilil ne tinyei yamdaet eng' ng'etiet ne bo tai! Mabou icheket meet meet ne bo aeng. Egu tisiikab Jehova ak ko bo Kristo ak kolaitorani akoboto inendet kenyisiek elfut agenge. ⁷ Ak ngobek kenyisiek elfut agenge, kitiach Setani komong' eng' korgorennyi. ⁸ Ak komong' koberber bororiosiek che mito luukwek ang'an che bo ng'weny--- Gog ak Magog--- koyumji icheket luget. Ak ko chang'itu kaiteng'wai ko u ng'aniekab araraita. ⁹ Ak kiba kotogosta komut emet ne lebel ak komuut oldab che tililen che bo Jehovah----nganaset ne chamat. Ak kichorgei mat kong'ete kipsengwet ak kotar icheket. ¹⁰ Ak chesawil ne kiiberber icheket, kewirji araraitab mat ne laldos koik, ole kigiwirji agine tiondo ak maotiot ne bo lembech. Ak kinyalili beet ak kemoi koigeny agoi koigeny. ¹¹ Ak kiageer ng'echeret ne o ak ko ne leel ne bo laitornatet koboto inendet ne kitebee. Ak kimwei, ng'weny ak kipsengwet komwee togenyi, ago kimakomi ole bendi. ¹² Ak kiageer che kigobek--- che mengechen ak che eechen, kotonondos eng' taitab ng'echeteretab laitornatet, ak kigiyaat bukuisiek. Ago kigiyaat bukuit age-- noto ko Bukuitab Sobondo. Ak kigiruokyi che kigobek eng' tuguk che kigakisirji bukuisiechoto, ko u boisionikwai. ¹³ Ak kigon araraita che kigomeyo che kimi oritinnyi. Ak kigon meet ak oldab che kigomeiyo icheket che kigomeiyo che kimi oriting'wai, ak kigiruokyi che kigomeiyo tugul ko u boisionikwai. ¹⁴ Ak kigiwirji meet ak oldab che kigomeiyo araraitab mat. Nito ko meet ne bo aeng----araraitab mat. ¹⁵ Ak ngot kenyor chi age tugul ne kima kisirji kainennyi Bukuitab Sobondo kewirjini araraitab mat.