¹ Kingobata tuguchu, agas kit ne u tuget ne o ne bo biko che chang eng' kipsengwet ko kurse ak kolen, "Halleluya! Bo Jehova nenyo yetunet, torornatet, ak kamuktaet. ² Amu bo iman ak ko bo imanda kiruogutikyi, amu kagoruokyi chepkugoniot ne o ne kimuruon ng'weny eng' soksenyi. Ak kagoyaakta mugetut ak ko bo korotikab kiboitinkyi eng' eutab Chebiosonato." ³ Ak Kimwa kogeny ne bo aeng kole: "Haleluya! Ak lanyei iyetanyi koigeny ak koigeny." ⁴ Ak kiibutyi ng'weny boisiek tiptemu koboto tiong'ik ang'wan che saptos ak kolos Jehova, inendet ne tebe ng'echeretab laitornatet. Ak kimwae kolen, "Amen. Haleluya!" ⁵ Ak kimong tuget eng' ng'echeretab laitornatet kolen, "Olosu Jehovah nenyo, akwe tugul kiboitinkyi che oiywei inendet, che mengechen ak che eechen." ⁶ Ak kiagas kito ne ki u tugetab tuiyetab biko ne o, ak ko u cheetab beko che chang, ak ko u cheetab tulosiek che kimen, kolen, "Haleluya! Amu laitorani Kiptaiyat Jehova, inendet ne Kamuktaindet. ⁷ Ongeboiboitu ak kegasgei mising ak kigochi torornatet inendet! Amu kagoit katunisietab Aruet, ak kagochopge osotiondenyi. ⁸ Ak Kigigochi inendet kolaachge eng' katanit ne kararan, ne leel ak ko tilil" (amu katanit ne kararan ko boisionikab imanda che bo bikab Jehovah che tililen). ⁹ Ak kilejo malaikaiyat, "Sir chu: Iberurotin icheket che keguurjini igortab katunisietab Aruet." Ak Kilejo, "Chu ko ng'alekab iman che bo Jehova." ¹⁰ Ak kiabutyi kelyekyi alosu inendet, ago kilejo, "Ameyai kou nito! Aii kiboitiot ko u inye koboto tupchosieguk che tinyei baornatet agobo Jeiso. Kutungji Jehova, amu baornatetab Jeiso ko tamirmirietab maoinatet." ¹¹ Ak kiageer koyatak kipsengwet, ak kimi anyun, mbartanyit ne leel. Ako inendet ne kikete ko kigigure ne kiyani ak ko bo iman. Ak koruochi ak koyae luget eng' imanda. ¹² Ak ki u konyekyi liblibenatab mat, ak eng metinyi ko kimi nariosiek che chang. Ak kotinye kainet ne kigisirchi inendet ne mami chi ne ingen kobate inendet inegei. ¹³ Ak ilaachi ngoriet ne koi ako kigichukta korotik, ak kigigure kainenyi Ng'olyotab Jehovah. ¹⁴ Ak kiruboti inendet lugosiek che bo kipsengwet che kitinye mbartanyisiek che leelachen, ako kiilachi katanisiek che kororon che leelachen iman ak ko tililen. ¹⁵ Ak kimong'une kutinyi rotwetab chok ne ng'atib si kobiit kobire bororiosiek, ak koboi icheket eng' kiroktab karnet. Ak kotiech sabibuk eng' ole kituisie che bo koromnatetab neregekab Jehova ne bo kamuktaet. ¹⁶ Ak kotinye eng' ngorienyi ak eng' kebestannyi kainet ne kigisir kele, "LAITORIAT NE BO LAITORINIK, AK KIPTAIYAT NE BO KIPTAINIK." ¹⁷ Ak kiageer malaikaiyat kotononi eng' asista. Ak kigurso eng' tuget ne o kolejini taritik tugul che tirirendos eng barak, "Obwa otuiyechi igorta ne o ne bo Jehova. ¹⁸ Si Kkbiit oaam borwekab laitorinik, ak borwekab kiptainikab luget, ak borwekab biko che kimen, ak borwekab mbartanyisiek ak che bo che ketei , ak borwekab biko tugul, che itiagotin ak che otwogik, ak che mengechen ak che eechen." ¹⁹ Ak kiageer tiondo ak laitorinikab emotinwek, ak lugosiekwai. Ko kairuruchge koyai luget ak inendet ne kiga tebe mbartanyit ak lugenyi. ²⁰ Ak kiginam tiondo koboto maotiondonoto ki bo lembech ne kiyae kaborunoik eng' tainnyi. Eng kaborunoichuto ko Kiiberber che kiga kindeno ng'oksetab tiondo ako icheket che kiilosu kanamwennyi. Kigiwirji choto aeng tuwai kosaptos araraitab mat ne bo koik che laidos. ²¹ Ak kigibar icheket che king'et eng' rotwetab chok ne kimong'une kutitab inendet ne kitebe mbartanyit, ak kibiyongyo taritik tugul eng' borwekwai.