¹ Kingobata tuguchu ageer malaikayat age kochoruge eng' kipsengwet. Kitinye kimnatet ne o, ak kokweny ng'weny eng' talilindanyi. ² Ak Kiwaach eng' kutit ne kim, kole, "Kogolul, kagolul Babulon ne o! Ak kagoek ole menye oik, ak korgoretab tamirmiriet age tugul ne muruon, ak korgoretab tarit age tugul ne muruon, ak korgoretab tiony age tugul ne muruon ak ne kisasei. ³ Amu kigobutyo bororiosek tugul amu kokoee divaikab koromnatetab soksenyi. Kisokso laitorinikab ng'weny ak inendet. Ak kiek mogorek chemung'arainikab ng'weny eng' kimnatetab kaseretab tugukyi." ⁴ Ak kiagas tuget age kobunu kipsengwet, kole, "Omong'une inendet, akwe bikchu, si moemte tengekwogikyi, ak si monyoru korotwekchi. ⁵ Amu kigochang'it kot goit tengekwogikyi kipsengwet, ak kagobwat Jehova yautikchi che yaachen. ⁶ Oweekyi inendet ko u ye kigoyai, ak oyakyi inendet konyil aeng' ko u boisionikyi; eng kikombet ne king'olsee, ong'olji inendet konyil aeng. ⁷ Ko u ye kiilosgei ak komeng'iis eng talbisto, ogochi inendet ng'wanindo ak orogenet ko u noto. Amu mwae inendet eng' muguleldanyi, kole, 'Atebche ko a laitoriat ne kwondo, ma ii mosok, ak magoi ageer rirek.' ⁸ Noto anyun itu korotwekyi eng betut agenge: meiyat, rirek, ak rubet. Ak kebeel inendet eng' mat, amu kim Kiptaiyat Jehova ne kiruokindenyi." ⁹ Ak rirtos ak koteitos agobo inendet laitorinikab ng'weny, che kisokso ak kotebi koboto inendet eng' talbisto, ye keer iyetab lalenyi. ¹⁰ Kotonondos eng' ole loo amu kaiyweetab ng'wanindanyi, ak kolen "Buoi, buoi, wee, nganaset ne o, Babulon, nganaset ne Kim! Amu kait kiruogeng'ung eng' sait agenge kogagoit kergong'ieng'ung." ¹¹ Ak korirtos chemung'arainikab ng'weny ak koteitos agobo inendet amu ma koalei chi kogeny tugukwai che aldoi---- ¹² tugukab tahabu, ak feda, ak koik che bichien eng' alet, ak sanaek che kororon, ak katanisiek che kororon, ak ngoroik che biriren; ak ketit age tugul ne nyamdut, ak kit age tugul ne bo kelekab belek, ak kit age tugul ne kigiyae ketit ne bo kamanutiet ne o, ak che bo sugunonik, ak karik, ak koik che leelachen, ¹³ ak cinamon, ak nyamdutik, ak nyamdutik che kibeelei, ak mwanik che kiilegei, ak tuguk che nyamdut, ak divbaik, ak mwanik, ak busiek che tabululilen, ak nganuk, ak tuga, ak kechirek; ak mbartanyisiek ak karisiekab mbartanyisiek ak atwogik ak sobonwekab bik. ¹⁴ Ak kagobetito logoyat ne kimakyinige eng sobondang'ung tugul. Tuguguk tugul che bo talbisto, che anyinyen ago kororon ko kakomuchunta, ama kenyoru kogeny. ¹⁵ Tonondos eng' ole loo chemung'arainikab tuguchuto che kiek magorek eng inendet amu kaiyweetab ng'wanindanyi, ak korirtos ak koteitos eng' tuget ne o. ¹⁶ Kolen, "Buoi, buoi wee, nganaset ne o, ne kiilachi katanisiek che kororon, ak ngoroik che arusen ne birir, ak che biriren, ago ne kigilelesonjine tahabu, ak koik che bo kamanutiet ne o, ak sanaek che kororon! ¹⁷ Amu eng sait agenge kityo kogagobetyo magornatosiek tugul che eechen." ¹⁸ Ak kiririo ye kingogeer iyetab lalenyi. Komwa kole, "Tos mi nganaset ne kergei ak nganasani o?" Ak kiwirji temburiek metowoikwai, ak kowaaksot, korirtos ak koteeitos, ¹⁹ " Buoi, buoi wee nganasani o ole kiegune magorek biko tugul che kitinyei melisiekwai eng' araraita. Amu oindab kaimutienyi ne kait ngemisiennyi eng' sait agenge." ²⁰ "Baibaitu eng' inendet inye, kipsengwet, ak akwe che tililen, ak che kiyoktoi, ak maotik, amu kagoruokyi Jehovah inendet amu akwe." ²¹ Ak kisut malaikaiyat ne kim koita ne u koitab bai ne o ak kowirji araraita, kolen, "Kiwirtoi Babulon nganaset ne o, kobut ko u noto eng kabutet ne o, ama kegeere kogeny. ²² Ama kegasei kogeny eng' inye butikab ketubosiek ak che itiendos ak che kutei ndurerusiek ak che kutei iriambut. Ama kenyoru muswogindet ne bo muswokindet age tugul eng' inye kogeny agoi. Ama kegasei tugetab koitab bai eng inye kogeny agoi. ²³ Ama kokwenyi lapkeiyetab tait eng' inye kogeny. Ama kegasei kutitab sandet ak ne bo mureret eng' inye kogeny, amu chemung'arainiguk ko ki biko che eechen che bo ng'weny, ako kigigen bororiosiek tugul eng' banisieng'ung'. ²⁴ Ak kiginyorji inendet korotikab maotik ak che bo bikab Jehovah che tililen, ak che bo tugul che kigibar eng' ng'weny."