¹ Ak kinyo age eng' malaikaisiechoto tisab ne kitinyei ketubosiek tisab, konyo kong'alolwo, kole, "Nyo, si aborun kiruogetab chepkugoniot ne o ne tebe beko che chang, ² nee kiyai sokset akaitorinikab ng'weny ak inendet, ako kibogityo meng'ikab ng'weny, eng' divaikab soksenyi." ³ Ak kiimuta malaikaiyat eng' Tamirmiriet agoi surkwen, ak kiageer chebioso ne kitebe tiondo ne birir, ne nyiitat kainaikab chubisiet. Kitinye tionyoto metowek tisab ak kuinoik taman. ⁴ Ak kiilaachi chebiosonato ngoroik che arusen ne birir ak che biriren, ak kigilelesonjine tahabu ak koik che bo kamanutiet ne o mising' ak sanaek che kororon. Kitinye eng' eunyi kikombet ne bo tahabu ne nyiitat tuguk che sasotin ak tugukab simdo che bo soksenyi. ⁵ Ak kigisirji togenyi kainet ako ne ung'at kele: "Ung'otiet, Babulon ne o, kametab chepkugonik ak ne bo tuguk tugul che kesase che bo ng'weny." ⁶ Ak kiageer kwonyoto ko kagobogit eng' korotikab biko che tililen che bo Jehovah, ak eng korotikab baorinikab Jeiso. Ak ye kingageer inendet, akwong' eng' kwonget ne o. ⁷ Ak kilejo malaikaiyat, "Kekwong' amu nee? Amache amwaun ung'otietab kwonyito ak ne bo tiondo ne keseni inendet, ne tinyei metowek tisab ak kuinoik taman. ⁸ Tionyi kegeere ko kimi, ama mami ra, ak ko legit komong' eng' kebenet ne lo ama ng'ete let. Ak kowendi luset. Ak kwong'dos icheket che menye ngweny, che makisirji kainaikwai Bukuitab Sobondo kong'ete ngab kelumda ng'weny---ye keer tiondo, amu Kimi, ama Komi raa, ak kota konyonii. ⁹ Mi yu kaguiyet ne bo ng'omnatet. Metowechoto tisab ko tulondok tisab, che tebe kwonyoto. ¹⁰ Ak choto ko laitorinik tisab. Kigobutyo mut, mito agenge, tomo konyo age; ak ye nyo, konyoljini kotebi ne matia. ¹¹ Ak tionyoto kimi, ama komi, inendet ko laitoriat ne bo sisiit. Ak ko agenge eng' chun tisab ak ko wendi ng'emisiet. ¹² Ak kuinoichoto taman che kegeer ko laitorinik taman che tomo konam bounatet, ak konyoru kimnatet ko u laitorinik koboto tiondo, eng' boroindab sait agenge. ¹³ Tinyei kabwatet agenge, ak kogochini icheket tiondo kamuget ak kimnateng'wai. ¹⁴ Baregei chuto ak Aruet. Ak koterteri Aruet icheket amu inendet ko Kiptaiyatab kiptainik ak ko Laitoriatab laitolrinik--ak icheget che mi koboto inendet ko che kigeguur, che kigelewen ak che kiyani." ¹⁵ Ak kilejo malaikaiyat, "Beechu Kegeere, che katebee chepkugoniot, ko biko, ak tuiyosiek, ak bororiosiek, ak kutuswek. ¹⁶ Ak kuinoichu kegeere taman ak tiondo, ko tun sasei chepkugoniot. Ak kometo kotebi inegei komi aach ngor, ak koam banyekyi, ak kobeel inendet eng' mat kogesgei. ¹⁷ Amu kiindeno Jehova mugulelwekwai koyai magenyi ak kosich tugul kabwatet agenge, ak kokoshin kogochi tiondo bounatengwai, agoi kosulda ng'alekab Jehova. ¹⁸ Ako chepyosoni kegeere ko nganaset ne o, ne bou laitorinikab ng'weny."