¹ Ak kiagas tuget ne o kogurse eng hekalut kolejini malaikasiechoto tisab, "Oba ak orongji ng'weny ketubosiek tisab che bo neregekab Jehovah." ² Ak kiwo malaikayat ne bo tai ak korongji ng'weny ketubenyi: ak kibityo mook che ang'osen ak ko ngwonen eng biko che kitinye ng'oksetab tiondo ak che kisae kanamwenyi. ³ Ak kirongji malaikaiyat ne bo aeng ketubenyi araraita. Ak kiwalak koek korotik, ko u korotikab chito ne kagome, ak kime kiy age tugul ne sobe ne ki mi araraita. ⁴ Ak kirongji malaikaiyat ne bo somok ketubenyi ainosiek ak kong'ikab beeko, ak kiek korotik. ⁵ Ak kiagas malaikaiyat ne bo beeko komwa kole, "Ibo imanda- inye ne imi, ak ko kiimi, Inye ne Itilil-- amu kairuoch ko u noto. ⁶ Amu kitumda korotikab biko che tililen ak che bo maotik, ak kaigochi icheket korotik koe; amu nyoljini icheket ko u noto." ⁷ Ak kiagas kapkorosut komwa kole, "Eeh, Kiptaiyat Jehovah, Kamuktaindet, bo iman ak ko bo imanda kiruogutiguk." ⁸ Ak kirongji malaikaiyat ne bo ang'wan ketubenyi asista, ak kigichamji kobeel biko eng' mat. ⁹ Ak kigibeel biko eng mat ne o, ak kichub kainetab Jehovah, inendet ne tinye kimnatet eng korotwechuto. Ako ma sik anan kogochi inendet torornatet. ¹⁰ Ak kironji malaikaiyat ne bo mut ketubenyi ngecheretab laitornatet ne bo tiondo, ak kotuch tuindo bounatenyi. Ak kinyei ngelyebwekwai amu ngwanindo. ¹¹ Ak kichub Jehovah ne bo kipsengwet amu ng'wonindong'wai ak mookwai, ak kitoiyo kora kosik eng boisionikwai. ¹² Ak Kironji malaikaiyat nebo lo ketube ainet ne o, noto ko Euphrate. Ak kiyaamnyo beekyi si kobiit kochobok oretab laitorinik che bunu kong'asis. ¹³ Ak kiageer tamirmirik somok che muruonen che kerge ak morororchik komong'une kutitab chesawil ak eng kutitab tiondo ak eng' kutitab maotiot ne bo lembech. ¹⁴ Amu choto ko tamirmirikab oik che yae kwang'utikab kaborunoik. Che kibendi ole mi laitorinikab ng'weny komogul, si koruruch icheket koba lugetab betut ne o ne bo Jehova Kamuktaindet. ¹⁵ ("Ogeer anyun! Anyoni ko u chorin! Iberurot inendet ne ripsei, ak koribei ngoroikyik si ma wendot aach ngor ak kegeer kalilanennyi.") ¹⁶ Ak kirurukchi icheket eng' orit agenge ole kiguure Har-Magedon eng' kutitab Hebranik. ¹⁷ Ak kironji malaikaiyat ne bo tisab ketubenyi eng' soet. Ak kimong' tuget ne o eng' hekalut ak kobun ng'echeretab laitornatet, kole, "Kagosulda!" ¹⁸ Ak kibiit kalyelosiek che bo ilet, ak kung'unyng'unyet, tulosiek, ak kiprengreng'iet ne kim--kipengreng'iet ne sirei tugul kong'etee kotoi komeny chito eng' ng'weny, ak eng iman ko ki o kiprengreng'iet noto. ¹⁹ Ak kipcheak nganaset ne o koek komoswek somok, ak kilulyo nganasokab bororiosiek. Ak kiinan Jehovah Babulon ne o, ak kiigochi inendet kikombet ne nyiitat divaikab koromnatetab neregekchi. ²⁰ Ak kibet emet age tugul ni kiikwen beko, ama keroo tulondok. ²¹ Ak kirorokyi biko koikab ropta che eechen kobun barak che te nyigisindang'wai talentait. Ak kichub biko Jehovah amu koroitab koichoto bo ropta amu ki yaa mising' koroito noto.