¹ Ak kiiboruo malaikaiyat ainetab beekab sobon, ne tilil ko u krustalo. Kirong'uge kobunu ng'echeretab laitornatet ne bo Jehova ak ne bo Aruet ² eng kwenutab oretab nganaset.. Ak kimi ketitab sobon ainonoto komosi ak komosin ak koiei logoek taman ak aeng che magerge, ak koiei logoekchi eng arawet age tugul. Ak kobo kasoobetab bororosiek sogekab ketoto. ³ Ama komi chubisiet age tugul kogeny. Ak tun ko mi orit ne bo nganaset ng'echeretab laitornatet nebo Jehova ak ne bo Aruet, ak atwogikchi che boisiechini inendet. ⁴ Ak kogere togenyi, ak ko mi kainenyi togochikwai. ⁵ Ama komi kemout kogeny; ama mache lapkeijetab tait anan ko lapkeiyetab asista, amu lapkeiyet Kiptaiyat Jehova eng icheket. Ak koegu laitorinik icheket koigeny ak koigeny. ⁶ Ak kilejo malaikaiyat, "Ng'alechu ko che kiyoni ak ko bo iman. Inendet Kiptaiyat, ne Jehova ne bo tamirmirikab maotik, ko kiyok malaikayandenyi koborji otwogikchi tuguk che bitu ko legit ne matiny." ⁷ Ogeero! Achoni kolegi! Iberurot ne inendet ne ribe ng'alekab maoinatetab bukuini." ⁸ Ane, Johona, ne kiagas ak ageer tuguchu. Ak yo Ago ki ngagas ak ageer, abutyi ng'weny si akutungji eng kelyekab malaikaiyat ne kiboruo tuguchuto. ⁹ Ak kolejo, "Meyai ko u noto! Aii otwogikindet ko u inye, koboto tupchosieguk maotik, ak koboto icheket che ribe ng'alekab bakuini. Kutungji Jehova!" ¹⁰ Ak kilejo, "Amat ituch ng'alek che bo maoinatetab bukuini, amu kagorik betusiek. ¹¹ Inendet ne ma bo imanda, kotestai koyai che ma bo imanda kosiir. Inendet ne bo atebto ne ya, ingoek ne bo atebto ne ya kosiir. Ak inendet ne bo imanda, koyai che bo imanda kosiir. Ak inendet ne tilil, ko ingotililit kosiir. ¹² "Ogeero! Achoni achagu. Ating'anu melektanyu, si agochi chi age tugul ko u boisionikchi. ¹³ Aii Alpha ak aii Omega, ne bo tai ak ko ne bo let, tauntet ak kagesunet. ¹⁴ Iberurotin icheket che iuni ngoroikwai si komuch konyor chamjinet koam che bunu ketitab sobondo ak kochut nganaset kobune kurgotik. ¹⁵ Mi sang' sesenik, ak bonik, ak che sokse, ak rumik, ak che sae kanamonik ak age tugul ne chame lembech ak koboisie. ¹⁶ Ane, Jeiso, ne kayogu malaikayandenyu si kobaorianwok agobo tuguchu bo kanisosiek. Aii tigitiot ak kesuwotab Daudi, kokelyet ne bo kariron ne ikwengtoi. ¹⁷ Mwae Tamirmiriet ak Mureret kole, "Nyo!" Ako inendet ne kase, komwa kole, "Nyo!" Ago age tugul ne ame melelda, kocho, ak inendet ne mache, koee beko che bo sobon buch. ¹⁸ Abaorianjini chi age tugul ne kase ng'alek che bo maoinatetab bukuini ale: Ngot kotesyi chi age tugul ngalechu, ngalek alak, kotesyini Jehova korotwek che kigisirji bukuini. ¹⁹ Ako ngoisto chi age tugul ng'alek che mi eng bukuitab maoinatoni, konemu Jehova kebebertanyi eng ketitab sobondo, ak eng nganaset ne tilil, che kigisirji bukuini. ²⁰ Inendet ne baorianjini tuguchu komwae kole, "Eeh! Anyoni achogu." Amen! Nyo, Kiptaiyat Jeiso! ²¹ Ingotebi mieindab Kiptayat Jeiso koboto tugul. Amen.