¹ Ak kichilte, ak ki ageer anyun Aruet ko tononi eng Tulwetab Sion. Ak koboto inendet ko kimi biko alfusiek bogolu ak artam ak ang’wan (144,000) che kitinye kainenyi ak kainetab kwandanyi che kigisirchi togochikwai. ² Kiagas kutit kobun kipsengwet ne u bolatetab beko che chang ak ko u tuletab ilet ne bolei mising. Ak tuget ne kigagas ko ki u nebo butik che bute kibukandisiekwai. ³ Ak kitien tiendo ne leel eng taitab ngechenetab laitornatet, ak eng’ taitab tiongik ang'wan che saptos ak boisiek. Ama mi chi ne kimuchi konetge tienoto kobate icheget 144,000 che kigimutu kong'e ng'weny. ⁴ Chuto ko icheghet che ma nyerege eng chepkukonik, amu bergeinik icheget. Chuto ko icheget che rube Aruet eng’ oldo tugul ole wendi. Kigial chuto eng’ kwenutab biko koek logoekab tai eng Jehova ak eng Aruet, ⁵ Ama kinyorji kutuswekwai lembechta; ama tinye tisia. ⁶ Ak kiageer malaikaiyat age kotirireni eng kwenutab barak, kotinye logoiywek che tililen che bo koigeny asi koamchi icheket che menye ng'weny--- ak bororiet age tugul, oret, kutit, ak biko. ⁷ Ak kigurso eng kutit ne o, kole, "Oiywei Jehova ak ogochi torornatet. Amu kagoit kasartab kiruogenyi. Ogutungji inendet, ne kiyai kepsengwet, ak ngweny, ak araraita neo ak ole kosunee beeko." ⁸ Ak korub malaikaiyat ne bo aeng, ne mwae kole, "Kagolul, kagolul Babulon ne o, ne kisaisai bororiosiek tugul koee divaikab koromnatetab soksennyi." ⁹ Ak korub icheket malaikaiyat age--ne bo somok ne mwae eng tuget ne o kole, "Ngot ko kutungji chi age tugul tiondo ak kanamwenyi ak kotaach ngokset eng togenyi nda ko eng eunyi, ¹⁰ koee agine divaik che bo neregek che koromen che bo Jehova, che kigichob ama king'ool eng tabetab (kikombetab) nerekekchi. Chito ne eei kenyalili eng mat ak koik che laidos eng taitab malaikaisiek che tililen ak eng taitab Aruet. ¹¹ Ak lonye iyetab ngwanindongwai koigeny ak koigeny, ama tinye kamuung'et bet ak kemoi--- icheket che ilosu tiondo ak kanamwenyi, ak age tugul ne taache ngoksetab kainenyi. ¹² Mi yu Muitaetab bikab Jehovah che tililen, icheget che ribe ng’atutikab Jehovah ak kayaneng'wai eng Jeiso." ¹³ Ak kiagas tuget kong'ete kipsengwet kole, "Sir chu: Boiboen icheket che meisot eng Kiptaiyat." "Eeh," mwae Tamirmiryet, "Si komuch komuuny eng boisionikwai, amu rube icheket boisionikwai". ¹⁴ Ak kiatobende, ak ageer anyun boldet ne leel. Ako ne kitebe boldanato ko chito ne u weritab chi. Kitinye eng’ metinyi kutwet ne bo tahabu ak kimi eunyi ringet ne ng'atib. ¹⁵ Ak komong' malaikaiyat age eng kapkorosut ak koguur eng kutit ne o inendet ne kitebe boldet: Ak koleji, "Naam ringeng'ung ak itou igesisie. Amu kogoit kasartab kesisiet, amu kagoruryo kesutikab ng’weny." ¹⁶ Ak kiwirchi ng'weny ringenyi inendet ne kitebe boldet, ak kigiges ng'weny. ¹⁷ Ak Kimong malaikaiyat age eng kapkorosut ne mi kipsengwet; kotinye agine ringet ne ng'atib. ¹⁸ Ak kimong’ kora malaikaiyat age eng kaptisisiet ole kibelee nyamdutik, inendet ne kitinye kimnatet eng mat. Kiguur anyun inendet eng kutit ne o, inendet ne kitinye ringet ne ng'atib, koleji, "Naam ringeng'ung ne ngatib ak iruruch sabibukab ketik che bo ng'weny, amu kagoruryo sabibukchi." ¹⁹ Ak kiwirchi malaikaiyat ringenyi ng'weny ak kokes sabibukab ng'weny. Ak kowirji kenut ne o, ole kitue sabibuk che bo neregekab Jehova. ²⁰ Ak kigitiech ole kitue sabibuk eng nganaset sang’, ak komong korotik eng ole kituisie kot koit karikab kutitab mbartanyisiek, ne ite olo bo mailisiek bogol aeng.