¹ Ak kiageer tiondo kolong'u kong'etune araraita. Ak kitinye kuinoik taman ak metewek tisab. Ak eng' kuinoikyi ko kitinye kutwesiek taman, ak eng metit age tugul ko kimi kainetab chubisiet. ² Ak tionyi kiogeer ko ki kerge ak cheplanget. Kelyekchi ko ki u kelyekab chebogerit, ak kiu kutinyi kutitab ng’etundo. Ak kiigochi chesawilyet inendet kimnatenyi, ng'echerennyi, ak bounatet ne o asi koboi. ³ Ak kiageer agenge eng' metewekchi ko u yo kagikwer ak kitinye moet ne ya, ak kigakosob moet. Ak kikwong ng'weny komugul ak korub tiondo. ⁴ Ak kora kogutungji icheket chesawilyet, amu kigochi bouinatenyi tiondo. Ak kigutungji icheket kora tiondo ak kotestai komwa kole, "Ng’o ne kerge ak tiondo?", ak "Ngo ne imuchi koborio ak inendet?" ⁵ Ak kigigochi tiondo kutit kong'alal tuguk che bo laskeita che eechen ak chubisiet. Ak kigigochi inendet kimnatet koboisie arawek artam ak aeng. ⁶ Ak kiyaat kutinyi kochub Jehova, ak kochub kainenye ak gonyi, ak icheket che menye kipsengwet. ⁷ Ak kigigochi tiondo chamjinet kobarge ak bikab Jehovah che tililen ak kotur icheket. Ak kigigochi kora kimnatet koboi oret age tugul, ak biko tugul, ak kutit age tugul ak bororiet age tugul. ⁸ Ak kogutungji inendet tugul che menye ngweny, chi agetugul ne ma kisirchi kainenyi Bukuitab Sobondo, ne bo Aruet ne kigieny kong'etee taunetab ng’weny. ⁹ Ngo tinye chi age tugul itit, kogas. ¹⁰ Ngot kemuti chi kerat, kerate ne matiny. Ngot kebare chi eng rotwetab chok, ko eng rotwetab chok kebare nematiny. Mi yu muitaet ak kayanetab biko che tililen. ¹¹ Ak kiager tiondo age kolong'u eng ng'weny. Kitinye kuinok aeng ko u aruet, ak king'alali ko u chesawil. ¹² Ak koboisie kimnatet tugul ne bo tiondo nebo tai eng tainyi, ak kogochi ng'weny ak che menye ng'weny kogutunji tiondo ne kibo tai----noto ne kigisoob ole kitinye moet ne ya. ¹³ Ak kiyai inendet kaborunoik che eechen. Kiyai agot mat kororok ng'weny kong'ete kipsengwet eng taitab biko. ¹⁴ Ak kiken icheket che menye ng'weny eng kaborunoik che kigigochi inendet kamuget koyai eng taitab tiondo, koleji icheket che menye ng'weny komuswogenji kanamwet tiondo--- ne tinye lomutietab rotwetab chok, ako kisob kogeny. ¹⁵ Ak kigichamji inendet kombushi kanamwetab tiondo si komuch kong'alal kanamwetab tiondo, ak kotil kole kebar tugul che ma kutungjini kanamwetab tiondo. ¹⁶ Ak king'at tugul, che mengechen ak che eechen, mogorek ak kibananok, che itiogotin ak che ratotin, kotaach ng'okset eng eutab tai anan ko eng toget. ¹⁷ Ak kima imugakse eng chi age tugul koalis anan koaldois ngo matinye ng'okset ne bo tiondo, noto ko koitetab tiondo ne koitet ne teleldochini kainenyi. ¹⁸ Ni ko mache ng'omnatet. Inendet ne tinye Kaguiyet, koiit koitetab tiondo. Amu koitetab chi. Ako koitenyi ko bogol lo ak tamamwogik Lo ak Lo (666).