¹ Kitook kaborunet ne o eng kipsengwet: chepyoso ne kiilaachi asista, ak komi arawet ng'wenyutab kelyekchi ak kimi metinyi kutwetab kokelik taman ak aeng. ² Kitomono inedet, ak kiwaache kotinye ngw'anindab sigisiet, ak eng’ ng'wanindo komache kosigis. ³ Ak kitook kaborunet age eng kipsengwet: Ogeer anyun! Kimi tiondo ne o ne borir ne kitinye metewek tisab ak kuinok taman, ak kimi metewekchi kutwesiek tisabu. ⁴ Ak kibukto saruryenyi kebeberta agenge eng somok ne bo kokelikab kipsengwet ak kowirji ng'weny. Ak kitonon tionyoto eng taitab chepyosonoto kimache kosigis, kole si ye sigis, koam lekwet. ⁵ Ak kisich lekwet ne werit, ne tun ko bou bororiosiek tugul eng kiroktab karnet. Ak kigimut kechaktae lakwenyi kwo ole mi Jehova agoi nyecherenyi ne bo laitornatet. ⁶ Ak kimwei chepyosonoto kwo tumoo kwen, ole kitinye komosta ne kiga kochopchi Jehova, si komuch kobai inendet eng oloto betusiek 1,260. ⁷ Ak kibiit boryet eng kipsengwet. Kiwo Mikol Koboto malaikaisiekchi kobarge ak tiondo, ak kiyai boryet tionyoto ak malaikaisiekchi. ⁸ Ago kima ko kim tionyoto komuch koterteris. Ak ki mata konyor olda ngwai kogeny eng kipsengwet. ⁹ Ak kigiwiir tionyoto O konyo ng'weny erenet ne bo keny, ne kigiguure Chesawil anan ko Setani, keberberindetab ngweny komugul- kigiwir konyo ngweny, ak kigiwir malaikaisiekchi koboto inendet. ¹⁰ Ak kiagas kutit ne o eng kipsengwet: kole, "kagocho raa sorunet ak kamuktaet ak bounatetab Jehova nenyo, ak kimmatetab Kristo nenyi. Amu kagewirta kataminetab che kitupche kwa ngweny, kiitami icheket eng taitab Jehova nenyo bet ak kemoi. ¹¹ v 11 Ak kiiterter inendet amu korotikab Aruet ak amu ng'olyotab baornateng'wai ama cham sobonwekwai agoi meet. ¹² Noto anyun oboiboitu, akwe kipsengwetisiek, ak akwe che omenye oloto! Ako mutyo agobo ng'weny ak araraita, amu kachorge chesawilyet kocho ole omite! Kotinye nereknatet ne ya ako ingen kole tinye kasarta ne kitigin kityo! ¹³ Ak ye kingogeer chesawilyet kole kagewir kocho ng'weny, korub chepyoset ne kasiche lakwet ne werit. ¹⁴ Ak kigigochi chepyosonoto kebebaik aeng chebo chepsireret ne o si komuch kotiriren kwo oldanyi ne kigichopchi eng ong'atet. Nito ko ole kigiribee, betusiek ak kebebertab betusiek koistoege erenet. ¹⁵ Ak kirong erenet beeko eng kutinyi che teno ainet korubee chepyosonoto kole si komuch koib inendet bechoto. ¹⁶ Ak kitoret ng'weny chepyosonoto. Kiyaat kutinyi ng'weny ak kolugui ainet ne ki rang'uge eng kutitab chesawilyet. ¹⁷ Ak kinerekchi chesawilyet chepyosonoto ak kwo kobarge akch bo orenyi, icheket che ribe ng'atutikab Jehova ak kotinye baornatetab Jeiso. ¹⁸ Ak kitonon tiondo eng kipsiaiyet ne mito tabandab araraita.