¹ Ak kigigona tegat ne u kirokto aboisie koek ne kikwoisie. Ak kikilejo, "Ngeet ak ikwaa hekalutab Jehova ak kapkorosut, koboto icheget che saei eng’ oloto orit. ² Ago bagakte, amat ikwaa kiyeng'ut ne mito hekalut sang, amu kigegochi Bororiosiek. Ak kotiechatiechi eng’ kelyekwai nganaset ne tilil eng arawek artam ak aeng. ³ Agochini baorinikyu aeng’ komaoten betusiek 1,260 kolachi kuniook." ⁴ Baorinichuto ko ketik aeng’ che bo emitic ak kelyek aeng’ che bo taisiek che kotonondos eng’ taitab Kiptaiyet ne bo ng’weny. ⁵ Ak komache chi konyalil icheket, komong’une mat kutuswekwai ak kotar bunikwai. Ak ngot ko mache chi konyalil icheket, kebare ko u nito ne matiny. ⁶ Tinye baorinichuto kimnatet koger kipsengwet si marobon eng’ betusiekab maoinatengwai. Ak kotinye kimnatet kowal beko koek korotik ak kobir ng’weny eng’ koroita age tugul ko u ole maktoi. ⁷ Ak ye tun kagotar baornatengwai, koyai luget agobo icheket tiondo ne mong’une kebenet ne loo ama tinye let. Iterteri ak kobar icheket tionyoto. ⁸ Ak tebsot muswekwai eng’ oretab nganaset ne o, (ne kiguure eng’ tamirmiriet Sodom ak Misiri) ole kiga kigartate Kiptaiyandengwai. ⁹ Ak keerei muswekwai alak eng’ biko tugul che bunu ortinwek, ak kutuswek, ak bororiosiek, eng’ betusiek somok ak kebebertab betut. Ama chamdoi ketub muswekwai eng’ kererit. ¹⁰ Ak boiboitu che menye ng'weny ogobo icheget ak kogasge. Ak koyokyige konunoik agenge eng age amu kinyalili maotichuto aeng’ icheket che menyei ng’weny. ¹¹ Ak ye kingobata betusiechoto somogu ak kebeberiat kochut icheket kambusetab sobondo ne bunu Jehova, ak kotononio eng’ kelyekwai. Ako name cholatet ne o ichek che keere icheket. ¹² Ako kase tuget ne o ne bunu kipsengwet kolejini icheket, "Olong’u oli!" Ak kolanye koba kipsengwet eng boldet, kogeeroti icheket bunikwai. ¹³ Ak eng kasarata kobiitu kiprengreng’iet, ak kolul kebeberta agenge eng’ taman ne bo nganaset. Ak kobare kiprengreng'ianato biko elfusiek tisab, ak kicholsot che ng'etu ak kogochi torornatet Jehova ne bo kipsengwet. ¹⁴ Kagosiirto nyalilda ne bo aeng. Keer anyun! Nyoni Nyalilda ne bo somok kochogu. ¹⁵ Ak kiguut malaikaiyatab tisab iriambunyi, ak kibiit tugosiek che eechen eng’ kipsangwet ak komwa kole, "Kagobunji bounatetab ng’weny Kiptayandenyu, ak ko bo Kristo nenyi, ak kobou koigeny ak koigeny." ¹⁶ Ak kiibutyi ng’weny boisiek tiptemun ak ang’wan, che tebee taitab Jehova eng’ ng’echerokwai che bo torornatet, ak kokutungji Jehova. ¹⁷ Komwae kole, "Kiwegun kongoi, ee Kiptaiyat Jehova kamuktaindet, ne imi, ak kiimi, amu kainam kamuktaeng’ung ne o ak kaitou ibou. ¹⁸ Kinerekcho bororiosiek, ak kakonyo nereknateng’ung. Ak kakoit betut ne kiruokyine biko che kigomeiyo ak betut ne kigochine kiboitiniguk maotik melekwekwai, ak biko che tililien, ak icheket che kiiywei kaineng’ung, che mengechen ak che eechen. Kakoit kasarta nengu'un ing’em icheket che ngemei ng’weny." ¹⁹ Ak kigiyaat hekalutab Jehova eng’ kipsengwet ak kitook eng’ hekalunnyi moingetab arorutioenyi. Ak kibiit kalyelosiek ak kutuswek, ak tulosiek ak kiprengreng'osiek, ak koik che eechen che bo ropta.