¹ Ak kiageer kogeny anyun malaikaiyat age ne kim kochorugei eng kipsengwet. Kikakilaagchi boldet, ak kimi kibembeit baragutab metinyi. Ak ki u togenyi asista, ak ki u kelyekyi toloiwekab mat. ² Ak kikanam eng’ bukuit ne mining, ne kikiyat eng eunyi. Ak kiindeno keldanyi ne bo tai nyanjet ak kondeno ne bo katam emet. ³ Ak kiwaach eng’ tuget ne o ko u yo morori ng’etundo. Ak ye kingo kagowaach, kong'ololyo ilotik tisab eng' tulosiekwai. ⁴ Ak ye kingo kogong'ololyo ilotik tisabu, amach asir, ako kiagas tuget ne bunu kipsengwet kole, " Ng’och tuguk che kamwa ilotik tisabu. Amesir." ⁵ Ak Kinamji barak eunyi ne bo tai kotokyi kipsengwet malaikaiyat ne kiageer kotonone araraita ak emet. ⁶ Ak kimuro eng inendet ne sobei koigeny ak koigeny, inendet ne kiyai kipsengwet ak tuguk che mito orit, ng’weny ak tuguk che mi orit, ak araraita koboto tugul che mito orit, ak komwa malaikaiyat kole, "Makomii kaenetabge. ⁷ Ago eng’ betut ye machei koguut iriambunyi malaikaiyatab tisab, kosulda anyun ung’otietab Jehova, ko u logoiywek che tililen che kimwochi kiboitinikyi maotik." ⁸ Ak tuget ne kiagas kobunu kipsengwet kong’alolwo kogeny: kole, "Ui, nam bukuit ne yataat eng eutab malaikayat ne tononi eng araraita ak eng’ ng’weny." ⁹ Awe anyun ole kimi malaikaiyat ak aleji kogona bukuinoto mining. Ak kolejo, "Nam bukuit ak iaam. Igochini moeng’ung kong’wanit , ago anyinyitu eng’ kuting’ung’ ko u kumiat." ¹⁰ Ak kianam bukuit ne mining eng’ eutab malaikaiyat ak aam. Ak ki anyin eng' kutinyu ko u kumiat, ak kingo kaam, kong’wanit eng’ moennyu. ¹¹ Ak kimwowo kole, "Kanyoljin imaoten agobo bik che chang,’ bororiosiek, kutuswek, ak laitorinik.