¹ Ak kileji icheket, "Amwawok iman ale, mito yu alak eng' chu tonondos che magoi chamcham meiyat kotomo kogeer bounatetab Jehova konyonii eng' kamuktaet." ² Ak kingobata betusuiek lo, komut Jeiso Petero ak Jakobo ak Johana kotogosta tulwet ne koi, koba koek ichegei. Ak kiwalak eng' taingwai. ³ Ak kilil bich ngoroikchi mising', kolelagitu mising kosir teluchi; mami mwetindet ngweny ne imuchi komwet koleelagitu ko u choto. ⁴ Ak kitook eng' taingwai Elija ak Musa, ak king'alalsot koboto Jeiso. ⁵ Ak kiwol Petero koleji Jeiso, "Konetindoni, kararan amu ki mi yu, kararan keteech keriosiek somok neng'ung age, ko bo Musa age, ko bo Elija age." ⁶ (Amu kima kongen kiy ne mwae amu kicholyo mising.) ⁷ Ak kinyo boldet kotuch ichek. Ak kimong anyun tuget eng boldet, kole, "Ni ko werinnyu, chamanennyu. Ogas iit akwee inendet." ⁸ Ago kigusgong' ngunoto kogeer komoswek tugul, ago mageer chi, kobate Jeiso inegei ak icheget. ⁹ Ak kingoregu eng' tulwet, kong'at icheket koleji, amat komwachi chi age tugul tuguk che kogeer agoi kong'eet Weritab chi eng' che kigomeiyo. ¹⁰ Ak kirib ng'olyondonoto, ago kitebege ichege eng ichege agobo " keng'eet eng' che kigomeiyo" kole tos nee. ¹¹ Ak kiteebe inendet kole, "Amunee si ko mwae sirik kole agoi konyo Elija korok?" ¹² Ak kileji icheket, "Iman nyonii Elija korok ak koweek tuguk tugul. Amu nee anyun si kesir agobo Weritab Chi kele agoi konyalili eng tuguk che chang' ak kiit koek buch? ¹³ Ago amwawok ale kigocho Elija, ak kigiyachi agine kito age tugul ne kimachei icheket, ko u yo kigisir agobo inendet." ¹⁴ Ak ye kigabwa ole mi alamalyet, kogeer tuiyet ne o ko kaimut icheket, ak sirik che kitebtepse icheket. ¹⁵ Ak ye kingogeer Jeiso, kokwong'io tuiyet komugul mising', ak koruai kotorokta inendet ak kogat. ¹⁶ Ak kiteebe alamalyennyi kole, "Ong'usang'usige agobo nee? ¹⁷ Kowolji chito age eng' tuiyet, kolenji, "Konetindoni, kaamutun werinnyu. Tinye inendet tamirmiriet ne namakse kut, amemuji kong'alal. ¹⁸ Ak olo tugul ole kanamji kowirjinoti ngweny eng' kimnatet, ak komong'une bugaat kutinyi, ak konyeei kelek, ak yamta. Kaamwochi alamalyeng'ung koon komanda; ago ma imuch." ¹⁹ Ak kiwolji anyun icheket koleji, "Ee, ebendo ne matinye kayanet, atebje kobotok kot kotianit? Amuitojinok agoi au? Omutwa inendet." ²⁰ Ak kiimutyi icheket inendet Jeiso. Ak ye kingogeer tamirmiriendonoto Jeiso, kobirobirto weroto mising'. Ak kibutyi weroto ng'weny, komilmilgei ak komong' bugaat eng kutinyi. ²¹ Ak kitebee Jeiso kwandanyi koleji, "Kinamei kong'etee au kiito?" Ak kile, "Kong'ete ko lekwa. ²² Ak kigowirji konyil che chang' mat ak ole mi beok, komache kobar inendet. Ak ngimuchi iyai kiy age tugul irirenech ak itoretech." ²³ Ak kilenji Jeiso, "Ngimuchi? Imugaksei tuguk tugul eng' inendet ne iyani." ²⁴ Ak kiwach anyun kwandab lekwanoto, ak kole, "Ayani! toreto eng bistoennyu." ²⁵ Ak kingogeer Jeiso tuiyet koruou tugul, koger kong' tamirmiriet ne muruon, koleji, "Inye tamirmiriet ne namat kut ak ko ii ming'at, kang'atin ale, mong'u eng inendet, ak amatata ichut inendet kogeny." ²⁶ Ak kingo kagowaach ak kobirto weroto mising', komanda. Ak kigergeitge werotoak ne kogome, kot komwa che chang kole" Kagome." ²⁷ Ago kinam Jeiso eut ak kong'eet kotonon, ak kitonon anyun weroto. ²⁸ Ak ye kingo kakwo got Jeiso, koteebe alamalyennyi inendet komi ichegei, kole, "Amu nee si ma kimuch ache keon?" ²⁹ Ak kileji icheket, maimuchi komanda ne u ni eng kiy age tugul kobate saet ak karugutetab amitwogik." ³⁰ Kiba anyun eng' oloto, ak kobun kwenutab Galili. Ak kima mach konai chi age tugul. ³¹ Amu kiineti alamalyennyi. Kolejini, "Kigoitoi Weritab chi kwo eunekab biko, ak kobar inendet. Ak ye kagebar, kong'eet kogeny, ko kagobata betusiek somogu." ³² Ago kima nai icheket ng'olyondonoto, ak kiiywei koteebe inendet. ³³ Ak kibwa Kapernaum. Ak kingo ka kochut got koteebe icheket koleji, "Ka nee ng'alek che komwaonu eng' oret?" ³⁴ Ago kisisyo. Amu king'usang'usige ichege eng' ichege eng' oret kolen ng'o ne o. ³⁵ Kitebee ng'weny anyun, ak koguur choto taman ak aeng' ak koleji icheket, "Ngo mache chi koeg ne bo tai, koeg ne bo let eng' tugul ak koek otwogindetab tugul." ³⁶ Ak kinam lekwa ne mining ak kondeno kwenung'wai. Ak kogeleb eng eunekyi ak koleji, ³⁷ "Age tugul ne taache lekwa ne u ni eng' kainenyu, ko kataacha; ak age tugul ne kataacha, ko mataacha ane, ago inendet ne kiiyokwo." ³⁸ Kileji Johana inendet, "Konetindoni, kogigeer chi koonei oik eng' kaineng'ung' ak kogitae, amu koma ko rubech." ³⁹ Ago kile Jeiso, "Amotae amu mami chi ne yaei boisiet ne bo kimanatet eng' kainennyu ak komuch kochepchebit komwaitaena yaitio. ⁴⁰ Amu inendet ne magirindoech ko nenyo. ⁴¹ Amu age tugul ne konok beekab kikombet oee eng kainenyu amu o bo Kristo, amwawok iman, ale, mabetyini melektanyi. ⁴² Ago chi age tugul ne inachi agenge eng' che mengechen che iyana, ko kaigai eng' inendet kerotyi kaatinyi koitab bai ne o, ak kewirji araraita. ⁴³ Ak ngong'wilin eung'ung', itilte. Keigei eng' inye imong'ji sobondo iboe mugung' kosir itinye eunek aeng' ak iwe gehena, mat ne ma imisokse. ⁴⁴ Ole mabegu kutikwai, ama misokse mat. ⁴⁵ Ak ngong'wilin keldang'ung', itilte, keigei eng' inye imong'ji sobondo iboe kelok kosiir kewirjin Gehenna ibo kelyek aeng'. ⁴⁶ Ole mabegu kutikwai, ama misokse mat. ⁴⁷ Ak ngong'wilin kondang'ung', ibalu. Kaegei eng' inye iit bounatetab Jehova iboe kong'ak, kosir kewirjin Gehenna itinye konyek aeng', ⁴⁸ Ole mabegu kutikwai ama misokse mat. ⁴⁹ Amu kindenoi chi age tugul munyek eng' maat. ⁵⁰ Kororon munyek, ago ngobet anyinyindang'wai munyuk, ko ta ondenoi nee si kochom kogeny? Ingotebe munyek eng kwenung'wong', ak otebi eng' kalyet akwege eng' akwege."