¹ Eng betusiechoto, ko kimi kogeny tuiyet ne o, ak kima kotinyei kiy ne amei. Koguur Jeiso alamalyennyi kobwa ole mi inendet ak koleji, ² "Arire tuiyet amu kagotebi koboto nguno ko betusiek somok ama tinyei kiy ne amei. ³ Ak ngot atiagte koba korikwai ama am kiy, kotanuitos eng oret. Ak kobunu alak ole loo." ⁴ Ak kiwolji alamalyennyi kole, "Kimuchi kenyorji ano makatinik eng emoni surkwen che imuch kobai bichu tugul kot kobiyongyo?" ⁵ Ak kiteebe icheket koleji, "Otinye makatinik ata?" Ak kole, "Tisab." ⁶ Ak king'at tuiyet kotebee ng'weny. Kinam anyun makatinichoto tisab, komwa kongoi, ak kobutul. Ak kogochi alamalyennyi, si kondeno taing'wai, ak kogochinot tuiyet. ⁷ Ak kitinye kogeny njirenik che mengechen che ng'ering, ak kingo kawekta kongoi, kong'at kondeno choto agichek taing'wai. ⁸ Kiamis anyun kot kobiongyo, ak kiiriach katuganik, ak kinyi lolotinwek tisab. ⁹ Ak ki biko olo bo elfusiek ang'wan. ak kisaiseret koba. ¹⁰ Ak yeityo anyun kolany moingetab beko koboto alamalyennyi, koba komoswekab Dalmanuta. ¹¹ Ak kibwa Parisaik, ak kotoi kotebtebee inendet ng'alek. Komache kaborunet ne bunu kipsengwet, kotiemei inendet. ¹² Ak kiimbus ne nyigis eng tamirmirennyi, ak kole, "Amu nee si kocheng'ei ebeni kaborunet? Amwawok iman ale, magoi kigochi ebeni kaborunet." ¹³ Ak kibagakta icheket, ak kolany moingetab beko kogeny, ak kolanda bitet age. ¹⁴ Ak kiutie alamalyennyi koib makatinik. Ak kima kotinyei kiy eng moinget kobate makatiat agenge kityo. ¹⁵ Ak kiitigon ichek, koleji, "Oripge, ak oribege mermerekab Parisaik ak mermerek che bo Herod." ¹⁶ Ak king'alaljige alamalyet ichegei, kolen, agobo makatinik che kimakotinye. ¹⁷ Ak kingonai Jeiso, kotebe icheket kole, "Kainee si otebegee agobo makatinik che motinye? Tomo onai, anan tomo oguiye? Tos uuen mugulelwekwok? ¹⁸ Otinye konyek, amogeere kiy? ak otinye itik, amogastoi? Amaonani? ¹⁹ Kingabutulji makatinik mut bik elfusiek mut, ko kinyi kerebonik ata katuganik che kigoyum? Koleji inendet, "Taman ak aeng." ²⁰ "Kingabutul makatinik tisab eng biko elfusiek angwan, ko kinyi lolotinwek ata katuganik che kigoyum?" Ak koleji, "Tisab." ²¹ Ak kimwa kole, "Tomo oguiye?" ²² Ak kiit anyun Betsaida. Ak kigimutyi inendet chi ne korat ak kosom kotiny inendet. ²³ Ak kinam eutab kipkoratiandanato ak komut komanda inendet eng nganaset. Ak ye kingo kagong'utyi konyekyi ak kogonoor eunekyi inendet, koteebe kole, "Tos igeere kiy?" ²⁴ Ak kiinyal barak, ak kole, "Ageere bikoche u ketiik che bendoti." ²⁵ Ak kiigonor eunekyi kogeny konyekyi, ak kiyat konyekchi chihoto, ak kisob, ak kogeer tuguk tugul komie. ²⁶ Ak kitiagta Jeiso kwo gaa, ak koleji, "Amewe nganaset agot kitigin." ²⁷ Ak kiwo anyun Keiso ak alamalyennyi agoi nganasok che bo Kaisaria Pilipi. Ak kiteebe alamalyennyi eng oret, koleji, "Mwaei biko kole aii ng'o anee?" ²⁸ Ak kiwolji inendet koleji, "Len ii Johana Kabatisanindet. kolen alak, 'ii Elija,' ak len alak, "ii agenge ne bo maotik."' ²⁹ Ak kitebee icheget kole, Ago olen okwee a ii ng'o? Kowolji Petero koleji, "ii Kristo" ³⁰ Ak king'at icheket kole, amat komwachi chi age tugul agobo inendet. ³¹ Ak kitoi konet icheket kole matiny agoi konyalil Weritab Chi eng' tuguk che chang', ak kotaiyo inendet boisiek ak tisiik che eechen ak sirik ak kebar, ak ye igesgei betusiek somogu, kong'eet kogeny. ³² Ak kimwa ng'olyondonoto kogase chi tugul. Ak kinam Petero inendet ak kotoi koger kong'. ³³ Ago kiwelelge Jeiso ak kogeer alamalyennyi ak koger kong' Petero ak koleji, "Ui let eng' ane, Chesawilyeni! Amu mebwati tugukab Jehovah, ago tugukab biko." ³⁴ Kiguur anyun tuiyet koboto alamalyennyi kobwa ole ki mito inendet ak koleji icheket, "Ngo machei chi age tugul korubwa, koesioge, ak kogesen kimurtoiyondennyi, ak korubwa. ³⁵ Amu age tugul ne machei kosor sobondanyi kobeeti, ak age tugul ne ibeeti sobondanyi agobo ane ak logoiwek che tililen kosoru. ³⁶ Amu nyoru borot nee chi, ngonyor ngweny komugul, ak kobeet sobondannyi? ³⁷ Tos igoitoi nee chi kowale sobondanyi? ³⁸ Amu age tugul ne ililani agobo ane koboto ng'alekchu eng' ebenito bo sokset ak tengek, ko tun ililandoi agine Weritab chi inendet, ye tun nyonii eng' torornatetab Kwandanyi koboto malaikaisiek che tililen."