¹ Kiyumjingei inendet Parisaik, ak alak eng sirik, che kibunu Jerusalem. ² Ak kigeer alak eng alamalyennyi koamei makatinik eng eunek che muruonen, noto ko, eunek che ma kiun. ³ (Amu maamisie Parisaiik ak Yahudik ngot ko maiun eunekwai komie, korube biteetab boisiek. ⁴ Ngo bunu Parisaiik oldab aldaisiet, ko ngot ko maiungei, ko maamisiei: ak mitei bitonwek alak che chang, che kitaach si korib komie, ko u kaunetab kikombok, ak terenik, ak tuguk che bo sugunwet kobot che kiamisie.) ⁵ Ak kiteebe Jeiso Parisaik ak sirik kole, "Kainee si mabendote alamalyeng'ung korube biteetab boisiek, ago ame makatinik eng eunek che muruonen?" ⁶ Kimwachi icheket koleji, "Kisib komaoten Isaia iman agobo akwe chombilik. Ko u ye sirat, kole, "Teegiso bichu eng kutuswekwai, ago looen mugulelwekwai eng ane. ⁷ Ago iloswo buch, koneti ng'atutikab biko koek konetisiosiek che inetisie.' ⁸ Obagaktoi ng'atutietab Jehova ak onam mising biteetab biko." ⁹ Ak kileji icheket, "Ochei, ongen otaiye iman ng'atutietab Jehovah, si kobiit oriib biteengwong! ¹⁰ Amu kile Musa, 'Tegis kwandang'ung ak komet', ak, 'Inendet ne mwaitae yaitio agobo kwandanyi anan kamet, kebare ne matiny.' ¹¹ Ago omwae akwe ole, 'Ngoleji chi kwandanyi anan ko kamet, "Kito ne kata atoretenen ko Korban," (ye kiweech ko, Kagochinet), ¹² ko u noto ko mata ochamji anyun inendet kotoret kwandanyi anan kamet. ¹³ Oyae ng'olyotab Jehovah koek buch eng biteeng'wong ne kiong'at ak oyapte. Ak oyae tuguk alak che chang che u choto. ¹⁴ Ak kiguur tuiyet kogeny kobwa ye mi inendet, ak koleji, "Ogasa, akwe tugul ak oguiye. ¹⁵ Mami kiy ne bunu chito sang ne imuchi kong'wanit inendet ngo chut orinnyi. Ago tuguk che mong'une chito, ko choto che ing'waniti chi. ¹⁶ Ngo tinyei chi itik che kastoe, kogas. ¹⁷ Ak kingobagakta Jeiso tuiyet ak kwo got orit, koteebe alamalyennyi agobo kalewenonoto. ¹⁸ Ak kileji icheket, "Tos tomo onyoru kaguiyet ak akwee? Mongen ole kiy tugul ne mi chi sang ak kwo orit, ko magoi imuch kong'wanit chi; ¹⁹ amu ma chute muguleldanyi, ago chute moet, ak komanda koba kertit?" Ak eng ng'olyondoni kobarasta Jeiso kole tililen amitwogik tugul. ²⁰ Ak kimwa kole, "Kito ne mong'une chito ko noto ne ing'waniti chito. ²¹ Amu mong'une orit eng muguleldab chi kabwatutik che yaachen, sokset, chorset, rumisiet, ²² ibetab ge, ng'etkongda, yaitiet, kenisiet, maget ne ya, kong ne ya, ng'alek che yaach, menotet, ak berberyet. ²³ Mong'une orit tuguchuto tugul yaachen ak kong'wanit chito." ²⁴ Ak king'eet eng oloto kwo tabanwekab Turo ak Sidon. Kingoit ko kiwo got, ago kima mach konai chi, ago kima imuch koung'ak. ²⁵ Ak ngunoto konyo chepyoso age ne kitinyei chepto ne mining ne kiga nam tamirmiriet ne muruon, kingogas agobo inendet, konyo kobutyi kelyekyii. ²⁶ Ak ki bo Yunanik chepyosonoto, ne kisalu bororietab Suropoinike. Ak kisom inendet kole koon oindet eng cheptanyi. ²⁷ Ak kilechi inendet, "Ingobiyongyo leguk korok. Amu ma nyalu kenam amitwogikab leguk ak kewirji sesenik." ²⁸ Ak kiwolji inendet koleji, "Eeh, Kiptaiyandani, agot sesenik koamei eng kureretab meset, amitwogik che iroroi che bo leguk." ²⁹ Ak kileji chepyosonoto, "Amu tuguk che kemwa, itiagat iwechige. Kagomanda oindet eng cheptang'ung." ³⁰ Ak kiwektage gonnyi ak konyor lakwet koruei eng kitokut, ako kagomong'une oindet. ³¹ Ak kimanda kogeny eng tabanwekab Turo, ak kobun Sidon kot koit araraita ne bo Galili, ak kiwo agoi kwenutab tabanwekab Dekapoli. ³² Ak kigimutyi inendet chi agenge ne ki ming'at, ak ko uui kut, ak kosom si kobiit kogonoor inendet eunnyi. ³³ Ak kiimut chichoto kwo taban eng tuiyet, ak kichukta morikyi itikab chichoto, ak kong'utyi ak kotwa ng'elyeptanyi. ³⁴ Ak kinyal anyun kipsengwet, kombus, ak koleji, "Epata," noto ko kakile, "Yatage." ³⁵ Ak kiyatogis anyun itikyi, ak kotiagak kit ne kiratei ng'eleptanyi, ak kong'alal komie. ³⁶ Ak king'at icheket kole amat komwachi chi. Ago kingoteshi kong'at icheket, koteshi anyun bichoto komwaitaat. ³⁷ Ak kikwong'io mising, kolen, "Kagoyai tuguk tugul komie. Igochini kogasta agot che ming'otin ak kong'alalyo che namotin kut."