¹ Ak kimanda eng oloto; ak konyo agoi emennyi, ak kiirub inendet alamalyennyi. ² Ak kingoit sabato, kotoi konetis eng sunagogit. Kigas biko che chang inendet ak kokwong'io. Komwa kolen, "Kinyorune ano chichi kanetisiosiechui?" "Ago nee ng'omnatoni kigigochi chichi?" "Nee kwong'utichu che yae eng eunikyii?" ³ "Tos ma muswogindetab bakoinik nito, weritab Maria, ago ne tupcho ak Jakobo, Joses, Juda, ak Simon? Tos ma kimite tugul kobo tibiikwai?" Ak kinyor kanagutiet eng Jeiso. ⁴ Ak kileji Jeiso icheket, "Mabetyini maotio teegisto, kobate eng emennyi, ak eng chebo orennyi, ak che bo gonnyi." ⁵ Ak kimata komuch koyai boisiet age tugul ne kim eng oloto, kobate bik che ng'ering che kimiandos che kigonoor eunekyii ak kisoob icheket. ⁶ Ak kikwong inendet amu bistoengwai. Ak kiwendot nganasok konetisioti. ⁷ Ak kiguur anyun choto taman ak aeng ak kotoi koyokto kobee aeng aeng ak kiigochi kimnatet koterter tamirmirik che muruonen, ⁸ ak king'at icheket kole, amat koib kiy nebo bandangwai agot makatiat, anan ko lolet, anan chepkondok eng lolet kobate kirokto kityo--- ⁹ ago kolaach kweonik, ak amat kolaach sumotik aeng. ¹⁰ Ak kileji icheket, "Got age tugul ne obendi, otebi eng yoto agoi obe eng oloto. ¹¹ Ak oldo age tugul ne mataachak, ama cham kogasak, ye omande eng oloto, olelekte temburiek che mi kelyekwok si kobiit koek baornatet eng icheket." ¹² Kimanda anyun ak kobarasta kole kanyol kosik biko. ¹³ Ak kion oik che chang, ak koile mwaita che chang che kimiandos, ak kosoob icheket. ¹⁴ Ak kigas laitoriat Herod agobo noto, amu kiga konaak kainetab Jeiso. Ak kole alak, "Kagong'eet Johana Kabatisanindet eng che kibek, noto anyun boisiei kimnatosiechu eng orinnyi." ¹⁵ Ago kimwaei alak kole, "Elija inendet." Ak kile alak kora, "Maotio inendet, anan u age eng maotik che ki mi keny." ¹⁶ Ago ye kingogas Herod, kole, "Johana nito, ne kiatile katit; ne kageng'eet." ¹⁷ Amu kiga koyokto Herod kenam Johana ak kerat eng korgoret agobo Herodias (chepyosetab Pilip wering'wai), amu kiga kobaige tuwai. ¹⁸ Amu kimwochi Johana Herod koleji, "Ma chamat eng ng'atutik iib chepyosetab wering'wong". ¹⁹ Ak kinerech Herodia inendet ak kicheng kobar inende, ago ma imuch, ²⁰ amu kiiywei Herod Johana; amu kiingen kole inendet ko chi nebo imanda ak ko tilil, ak kirib inendet. Ak kingogas Herod ng'alekyii, koiimngei mising, ago kigasyi inendet eng boiboiyet. ²¹ Ak kibiit kasarta eng betut ne kiyai Herod igorta ne bo betutab sigennyi ak koyachi bikchi che eechen, kiptainik, ak che toogunotin che ki mi Galili. ²² Ak kichut got orit cheptab Herodia ak koureren kobaibai Herod ak icheket che kitebsot eng' amisiet koboto inendet. Ak kitebe laitoriat cheboto, koleji " Soma kiy age tugul ne imache, si agonin." ²³ Ak kimurto kole, "Kiy age tugul ne isoma, agonin, agot kebebertab bounatennyu." ²⁴ Ak kimanda, ak koleji kamet, "Asom nee?" Ak kileji, "Metit ne bo Johana kabatisanindet." ²⁵ Ak kilabat cheboto kochakta agoi ole mi laitoriat, ak kosom kole, "Amache ale igona nguno metit ne bo Johana kabatisanindet eng' tageito." ²⁶ Nga nda kiyai noto koimge anyun mising' laitoriat, ko kima kosikchini kotae inendet amu kiga komurto eng taitab icheget che kitebsot eng' amisiet. ²⁷ Ak ngunoto koyokto laitoriat askarindet age eng' che kiripse, ak kong'at keib metitab Johana. Kiwo anyun kotil metit eng' korkoret. ²⁸ Kiib anyun metoto bo Johana eng' tageito ak kogochi cheboto, ak kong'et cheboto kogochi kamet. ²⁹ Ak ye kingogas alamalyennyi agobo ng'olyondonoto, kobwa kosut bortonyi, ak kondeno kererit. ³⁰ Ak kiiyumjigei Jeiso che kiiyoktoi ak komwochi inendet tuguk tugul, kit age tugul ne kiga koyai, ak kiy age tugul ne kiga konet. ³¹ Ak kimwachi icheket koleji, "Obwa akwege taban ole surkwen, si omuuny kitigin." Amu kichang' che kibwanei ak kobendi, ak kima kotinyei agot boroindo ne amisie. ³² Ak kiba anyun ichegei eng' moingetab beko ole surkwen. ³³ Ak kigeeroti biko kobendi, ak kinai che chang' ak kiruai koba oloto kibagenge kobunu nganasok tugul, ak kondoe icheget. ³⁴ Ak kingoit tabandab ainet, kogeer tuiyet ne o, ak korirei icheket, amu ki u kechirek che matinye mestowo. Ak kitoi konet icheket tuguk che chang'. ³⁵ Ak ye kimache koimen, kobwanji inendet alamalyennyi, ak koleji, "Surkwen oli, ak machei koimen nguno. ³⁶ Itiagte biko koba emet ak nganasok che mi komoswek ole legit, si koaljigei tuguk che amei." ³⁷ Ak kiwolji koleji, "Ogochi akwe amitwogik." Ak kileji inendet, "Kibe keal makatinik che bo denariek bogol aeng', si kigochi koam?" ³⁸ Ak kimwoji icheket kole, "Otinye makatinik ata? Oba ogeer. "Ak kingo kagonai, kole, "Makatinik mut ak njirenik aeng." ³⁹ Ak king'at biko tugul kole kotebi ng'weny eng' suswek che nyalilen. ⁴⁰ Ak kiteb ng'weny korurugotin ak kotetatge, kobee bogol ak kobee konom. ⁴¹ Ak kinam makatinichoto mut ak njirenik aeng,' ak kochile kipsengwet koberur ak kotonaton makatinik ak kogochi alamalyennyi si kondeno taitab biko. Ak kipchechi icheget tugul kora njirenichoto aeng'. ⁴² Ak kiamis tugul koto biyong'io. ⁴³ Ak koyum katuganikab makatinik, konyi kerebonik taman ak aeng', ak che bo njirenik agichek. ⁴⁴ Ak icheget che kiam makatinichoto ko ki murenik elfusiek mut. ⁴⁵ Yeityo kochirchir alamalyennyi kolany moingetab beko, kondoe inendet koba bitonin agoi Betsaida, kingomi kosaisereti inendet tuiyet koba. ⁴⁶ Ak ye kingo kagobagakta icheket, kwo tulwet barak kosa. ⁴⁷ Ak kiit koskoleng ago kiga koit moinget kwenutab araraita, ak kimi inegei emet ne yaamat. ⁴⁸ Ak kingogeer icheget konyalildos eng' boisietab mugangok che kikwerie moinget, amu kigirgireni koristo. Ak kingo legit sait angwan ne bo kemoi, konyonji icheket, kowendote araraita barak, ak kimache kosiirtoe icheget. ⁴⁹ Ago kingogeer icheket inendet kowendoti eng' araraita barak, kolen icheget tamirmir, ak kowokcho, ⁵⁰ amu kigeer inendet, ak kocholyo. Ak ngunoto anyun kotwekyi icheket, ak koleji, "Onyiganitu! anendet! amoiyweisie! ⁵¹ Ak kilany moinget kwo ole mi icheket, ak kisis koristo mako kirgireni. Kikwong'io mising icheket. ⁵² Amu kima nai icheket agobo makatinik. Amu ki uuen mugulelwekwai. ⁵³ Ak ye kingo kagolanda, koit emetab Genesaret, korat moinget eng' ngegut. ⁵⁴ Ak ye kingomong' eng' moinget konai biko inendet eng' sainoto, ⁵⁵ ak koruaai eng' koronoto komugul, ak kotoi komut che miandos eng' kitogusiekwai, koba ole kiga kasyi kele mito inendet. ⁵⁶ Ak oldo tugul ole kimong'ji kochut nganasok che mengechen, anan ko che eechen, anan emet, ko kindenoi che miandos oldab sirosie. Kisaisai inendet kole kochamji kotiiny agot tabandab ngoriennyi, ak kisopcho tugul che kitiiny inendet.