¹ Ak kiit bitet age ne bo araraita, agoi emetab Gerasenik. ² Ak kingo kangomong' eng moingetab beko, eng yoto anyun kotuiyo ak chito ne bunu oldab kererisiek ne tinyei tamirmiriet ne muruon. ³ Kimenyei chichoto oldab kererisiek. Kima komi chi ne kita komuchi korat inendet, agot eng sirimdo; ⁴ Amu kiga kerate inendet mugurek ak sirimwek konyil che chang, ago king'etyei sirimwek ak kotonaton mugurek. Kima komi chi ne kiimuchi koboi inendet. ⁵ Ak kiwaagoti betusiek tugul, kemoi ak bet, eng kererisiek ak tulonok, ak kiwogei ak kotilegei koik che ng'atiben. ⁶ Kingogeer Jeiso eng ole loo, kolabat ole mi ak kogutungji inendet. ⁷ Kowaach eng kutit ne o kole, "Ating'enen nee inye Jeiso, Weritab Jehovah ne Toror Mising? Asomin eng Jehovah inendet, ale amenyalila." ⁸ Amu kilejini inendet, "Mong'une chichi, inye tamirmiriet ne muruon." ⁹ Ak kiteebe inendet koleji, "Kigurenen nee?" Ak kileji inendet, "Kainennyu ko Chang'indo,amu kichang." ¹⁰ Ak kisom inendet mising kole, ama on komanda eng emonoto. ¹¹ Ak kimi tegeiyatab tulwet akwet ne o nebo torok che kiagetos, ¹² ak kisom inendet koleji, "Chamwech kechut torok." ¹³ Kichamji anyun; ak kimanda tamirmirik che muruonen koba kochut torok, ak kiruai akwet kochortaege chemng'esut koba araraita, ak ki olo bo elfusiek aeng torochoto ak kibekchi araraita. ¹⁴ Ak rweiyo anyun che kiiyagi torok komwaita eng nganaset ak eng emet, ak kiba anyun biko kogeer kit ne kigagoyaak. ¹⁵ Ak kibwa ole mi Jeiso, ak kogeer chito ne kitinye oik, inendet ne kitinye oik che chang,' kotebchinige, ko kagolaach ngoroik ak kagong'omit, inendet ; ak kiiyweis bichoto. ¹⁶ Icheket che kigeerei tuguk che kiyaakis eng chito ne kitinye oik komwachi icheket kiy tugul ne kiyaak, koboto ole katepto torok. ¹⁷ Ak kitoi kogaigai inendet kole kwo eng kiwotosiekwai. ¹⁸ Ak kingomi kolanyei moingetab beko, kogaigai inendet ne kitinye oik kole kotebi tuwai. ¹⁹ Ago kima chamji Jeiso, ago kileji, "Ui gong'ung ak ole mi chebo oreng'ung, ak imwoji tuguk che kagoyaun Kiptaiyat, ak ko u ole kagorirenen." ²⁰ Ak kinam banda anyun ak kotoi koamda eng Dekapoli tuguk che eechen che kigayachi inendet Jeiso, ak kikwong'io biko tugul. ²¹ Ak kingo kagolanda Jeiso kogeny eng moinget kwo bitonin, koyumjigei inendet tuiyet ne o, amu kimi tabandab araraita. ²² Ak kinyo age eng bounikab sunagogit, ne kiguure Jairo, ak kingogeer inendet, kobutyi kelyekyi. ²³ Ak kisom inendet mising kogeny ak kogeny, koleii, "Legit kome cheptannyu ne mining. Asomin inyo igonor inendet euneguk inendet si kosob, ak kotebi kochamegei." ²⁴ Ak kiwo koboto inendet, ak kirub inendet tuiyet ne o ak kiigiich inendet. ²⁵ Kimi anyun chepyoset age ne kiga komandae korotik kenyisiek taman ak aeng. ²⁶ Kiga konyalil mising eng eunekab chepkerichinik, ak kiga koboisie tugukyi tugul che kitinye, ama toret kiy ago kitesak miando koyait. ²⁷ Ak kingogas agobo Jeiso, kocho let ne bo inendet eng tuiyet ak kobisingchige biko che ki chang ak kotiiny ngoriennyi. ²⁸ Amu kile, Ngatiiny mbo ngoroiky kityoi, asobe." ²⁹ Ak kingo tiiny inendet, kosis ole kabunu korotik ak kigas eng bortannyi kole, kagisoob eng koroitannyi. ³⁰ Ak eng kasarata konai Jeiso inegei kole kagomanda kimnatet eng inendet. Kowelelgei eng tuiyet ak kole, "Ng'o ne katiiny ngoroikyu?" ³¹ Ak kileji alamalyennyi inendet, "Igeere ko kaigichin tuiyet, ak ilen, "Ngo ne katinyo?"' ³² Ago kigusgong Jeiso si kobiit kogeer kole ng'o ne kayai kioto. ³³ Ak king'et Chepyosonoto, kongen kito ne kigagoyaak eng inendet, kobutyi tainnyi, koiyweisie ak kobotani, ak komwachi imanit tugul. ³⁴ Ak kileji inendet, " Cheptonnyu, kagosoobin kayaneng'ung. Ui eng kalyet ak isob eng miandang'ung." ³⁵ Kingo ta kong'alali inendet, kobwa biko che bunu oldab bounindet ne bo sunagogit, ak kole, "Kagome cheptang'ung. Amu nee asi ta iimii kanetindet?" ³⁶ Ago kingo kas Jeiso ng'olyondonoto ko ma mage kiy, koleji bounindetab sunagogit, "Amechol. Iyan kityo." ³⁷ Ak ma chamji chi korub inendet, kobate Petero, Jakobo ak Johana weritab mbo Jakobo. ³⁸ Kiit anyun gotab bounindetab sunagogit ak kigeer biko che ki boldos, koboto che rirtos ak koteeitos mising. ³⁹ Ak ye kingo kochut got, koleji bichoto, "Kai nee si owasege ak orirtosi? Ma me lekwet, ago inuuchi." ⁴⁰ Ak kirorichi inendet ak kochot. Ago ye kingo kagoon inendet bichoto tugul koba sang, komut kwandab lakwet ak kamet koboto che kimi ak inendet ak kwo go ole mi lakwet. ⁴¹ Ak ye kingo kagonam eutab lakwet, koleji, "Talita koumi! ye kiwal ko, "Chebi mining', amwaun ale ng'eet." ⁴² Ko u noto kong'eet cheboto ak kowendot (amu ki bo kenyisiek taman ak aeng). Eng yoto anyun kokwong'io eng kwong'et ne o. ⁴³ Ak king'at icheket mising kole amat konai chi ng'olyondonito. Ak kileji icheket kogochi ki ne amei.