¹ Kimanda anyun Jeiso eng' oloto ak kwo komaswekab Judea agoi bitetab Ainetab Jordan, ak kiiyumjige inendet tuiyosiek kogeny. Ak kiineti icheket kogeny ko u ye kicham koyaei. ² Ak kibwonji inendet Parisaik, koteebe kotieme inendet, kole, "Tos chamdaat eng' ng'atutik koon chi kwondonyi?" ³ Ak kiwolji Jeiso koleji, "Nee ne king'atak Musa?" ⁴ Ak kile icheket, "Kichamji Musa muren kosir siret ne bo besiet ak si koon indet kwo." ⁵ Ago kileni Jeiso icheket, "Kisirwak ng'atutionoto Musa amu uuindab mugulelwekwok, ⁶ ago kong'ete taunetab yaetab ng'weny, ko 'kiyai Jehova icheket muren ak tie.' ⁷ Ak amu noto kobagaktoi chi kwanda ak kamet, ak konamgei ak osotiondennyi, ⁸ ak koek choto aeng' borto agenge. ⁹ Choto anyun che kagotuiyo Jehova, ko mat kobesio chi." ¹⁰ Ak kiteebe alamalyennyi inendet kogeny agobo tuguchuto eng' got orit. ¹¹ Ak kileji icheket, "Chi age tugul ne onei chepyosennyi, ak kotun age, ko kayai ibetabge. ¹² Agot chepyosonoto agine ngo bagakta boiyondennyi, ak kotun age, ko ka yai ibetabge." ¹³ Ak kigimutyi inendet leguk che mengechen, si kobiit kotiny icheket, ak kiger kong' alamalyennyi. ¹⁴ Ago kingogeer Jeiso, konyit ak koleji icheket, "Ochamji leguk che mengechen kobwonjo, amoete icheket, amu bo baunatetab Jehova che u chu. ¹⁵ Amwawok iman ale, chi age tugul ne mataachei bounatetab Jehovah ko u lakwet ne mining' ko machute oloto matiny." ¹⁶ Ak kiganab leguk eng eunekyi ak koberur kogonori eunekyi icheket. ¹⁷ Ak ye kiwendi eng' oret, kolabatyi chito age inendet, ak kogutungji ak koteebe kole, "Konetindoni kararan, ayai nee si anyor sobondo ne bo koigeny?" ¹⁸ Ak kileji Jeiso inendet, "Kainee si iguureno ne kararan? Mami chi ne kararan, kobate agenge inendet Jehova inege. ¹⁹ Inget inye ng'atutik: 'Amerumisie, amoipge, amechorse, amebaorianji lembech, Amekenisie, Tegis kwandang'ung ak komet." ²⁰ Ago kileji chichoto, "Konetindoni, kiarib tuguchuto tugul kong'ete a mining." ²¹ Kigeer anyun Jeiso inendet, ak kocham. Ak koleji, "Ta ko rartaat kito agenge eng' inye. Uui, alde tuguk tugul che itinye ak igochi kibananok, si inyoru magornatet eng' kipsengwet. Ak inyo iruba." ²² Ago kigerer met agobo ng'olyondonoto, ak kwo eng' arogenet amu kitinye inendet tuguk che chang'. ²³ Ak kigeer Jeiso komoswek tugul, ak koleji alamalyennyi, "Korom ne tia koit bounatetab Jehovah che tinyei magornatosiek!" ²⁴ Ak kikwong'io alamalyennyi eng' ng'alekchi. Ago kimwochi Jeiso kogeny koleji, "Legochu, korom ne tia eng' ichek che tiiegei magornatosiek koit bounatetab Jehovah! ²⁵ Nyumnyum eng' tambesiet kochut kondab katet ne kinobisie, kosiir komongji magoriot bounatetab Jehovah." ²⁶ Ak kikwong'io icheket mising' ak kolejige ichege eng ichege, "Ara ng'o anyun ne imuchi konyor sorunet?" ²⁷ Ak kigeer Jeiso icheket ak kole, "Maimugaksei eng' biko, ago ma u noto eng' Jehovah." Amu imugaksei tuguk tugul eng' Jehovah." ²⁸ Kitoi anyun Petero koleji, "Geero, kigebagakte tuguk tugul ak kigerubin." ²⁹ Ak kile Jeiso, "Amwawok iman ale, mami chi ne kibagach got, anan werikwai, anan tibikwai, anan kamet, anan kwanda, anan leguk, anan mbarenik, agobo ane, ak logoiwek che tililen, ³⁰ ne manyoru konyil bogol nguno eng' butusiechu, gorik, ak werikwai, ak tibikwai, ak kametishekwai, ak leguk, ak mbarenik, koboto usisiosiek, ak eng' betusiek che tun bwanii, sobondab koigeny. ³¹ Ago tun egu che chang' che bo tai che bo let, ak koek che bo let che bo tai." ³² Ak kimi ichek eng' oret kotogostoi Jerusalem, ak kiindoi Jeiso. Ak kikwong'io alalmalaik, ak kicholyo che kirube icheket. Ak kiitaban kogeny Jeiso choto taman ak aeng' ak kotoi komwachi icheket tuguk che ityini inendet kolegit. ³³ "Ogeero, kitogostoi Jerusalem, ak kigoitoi Weritab Chi kwo eunekab tisiik che eechen ak sirik. Ak koruokyi kiruoget ne bo meet, ak kondeno inendet eunekab bororiosiek. ³⁴ Ago churochuri inendet, ak kong'utyi, ak kobire kipcharitit, ak kobar inendet. Ak ye ibata betusiek somogu kong'eet kogeny." ³⁵ Ak kirikyi inendet Jakobo ak Johana, werikab Sebedi, ak koleji, "Konetindoni, kimache iyaiywech kiy age tugul ne kisomin." ³⁶ Ak kileji icheket, "Omache ayaiywok nee?" ³⁷ Ak kileji, "Konech ketebee, age eung'ung' ne bo tai, ak age eung'ung' ne bo katam, eng' torornateng'ung'." ³⁸ Ago kiwolji Jeiso icheket, "Mongen kit ne osome. Tos omuchi oee kikombet ne aee? anan kibatisanenak kabatisanet ne kibatisanena?" ³⁹ Ak kileji inendet, "Kimuchi." Kolenji anyun Jeiso icheket, "Kikombet ne aee ko tun oee ak akwe, ak kabatisanet ne kibatisanena ko tun kibatisanenok. ⁴⁰ Ago ma ane ne igoitoi kotebe chi eunnyu ne bo tai anan eunnyu ne bo katam, ago bo icheget che kigechopchi." ⁴¹ Ak ye kingogas alamalyet chun tamanu, kotoi konerekyi mising' Jakobo ak Johana. ⁴² Ak kiguur Jeiso icheget kobwa ole mi, ak koleji icheket, "Ongen ole icheget che kiiti kele bou Bororiosiek, koyaegei koek kiptainik eng' icheket, ak chekwai che eechen kobou icheket. ⁴³ Ago ma u noto eng' akwe. Ago age tugul ne machei koek ne o eng' akwe agoi koek ne boisiewok, ⁴⁴ ak chi age tugul ne mache koek ne bo tai eng' akwe agoi koek otwogindetab tugul. ⁴⁵ Amu kima nyo Weritab chi si keboisiechi, ago si kobois inendet ak kogoito sobondanyi koek kito ne kitiage che chang." ⁴⁶ Ak kiit anyun Jeriko. Ak kingomanda eng Jeriko, koboto alamalyennyi ak tuiyet ne o, ko kitebche eng' oret taban, Bartimayo weritab Timayo, inendet kipkoratiat ne somsei. ⁴⁷ Ak ye kingogas kole, nito ko Jeiso ne bo Nasaret, kotoi kowaach ak kole, "Jeiso, Weritab Daudi, rirena!" ⁴⁸ Ak kiger kong' che chang' kole, kosis. Ago kites kowaach mising' kole, "Weritab Daudi, rirena!" ⁴⁹ Ak kitonon Jeiso ak kong'at keguur inendet. Ak kigiguur kipkoratiandanato, keleji, "Nyiganitu! Ng'eet, Kuurin inendet." ⁵⁰ Ak kiwirta ngoriennyi, ak koriakta, kwo ole mi Jeiso. ⁵¹ Ak kiwolji Jeiso inendet koleji, "Imache ayaun nee?" Ak kile chichoto korat, "Rabboni, amache ageerto." ⁵² Ak kilenji Jeiso inendet, "Ui bandang'ung' kagosoobin kayaneng'ung'. Ak kigeerto kasarata anyun, ak korub inendet eng' oret.