¹ Ak ye kingorikta Jerusalem, ak Betpage ak Betania, eng' tulwetab Emitik, koyokto aeng' eng alamalyennyi ² ak koleji, "Oba nganaset ne mi taing'wong'. Ak onyoru eng' sainato oite, moitab sigiriet ko ratat, ne tomo koket chi. Otiach, ak ogetwo. ³ Ak ngo teebenak chi kole, 'Kainee si oyai ko u ni?' oleji, 'Makyinige Kiptaiyat ak kogonok ogetu anyun ngunoto."' ⁴ Kiba anyun, ak konyor moitab sigiriet ko ratat, eng' sang'utab ormarich, eng' ole besiechin ortinwek ak kotiach. ⁵ Ako kitebee alak che kitonondos eng oloto koleji, "Oyae nee, ngotiachi moitab sigiriet?" ⁶ Komwachi icheket ko u ye kiga mwachi Jeiso, ak kibakach bichoto icheget kobechige. ⁷ Ak kiket moitab sigiriet konyo ole mi Jeiso, ak kiito ngoroikwai eng sigiriet; ak kitebe Jeiso sigirionoto. ⁸ Ak kiito biko che chang ngoroikwai eng' oret, ak kiindenoti alak temenikab ketik che kitilei eng' mbarenik. ⁹ Ak kimwaoti eng' kutit ne o che kiindoi, ak che kiirube, kolen, "Hosanna! Iberurot inendet ne nyonei eng' kainetab Kipataiyat. ¹⁰ Iberurot laitornatet ne nyonii, ne bo kwandanyo Daudi! Hosanna eng' ole toror mising!"' ¹¹ Ak kimong'ji Jerusalem ak kwo hekalut orit ak ye kingo kagogeerot tuguk tugul. Ak amu kiga koek koskoleny kwo anyun Betania ak taman aka aeng'. ¹² Ak kingomong' icheget karon eng' Betania, koam rubet inendet. ¹³ Ak kingogeer eng' ole loo mogoiwet ne tinyei sogek, kwo kolen tamangab konyorji logoiyat, ak kingoit ye mi ketoto, ko ma konyorji kiy kobate sogek kityo, amu kitomo koit betusiek che rure logoekab mogoonik. ¹⁴ Ak kileji ketoto, "Kong'ete nguno ko ma koamenen chi logoek agoi koigeny." Ak kigasei alamalyennyi. ¹⁵ Ak kiit Jerusalem, ak kiwo hekalut orit, ak kotoi koon che kialdaisiei ak che kialisie eng hekalut. Ak koabuch mesosiek che bo walikab silingisiek, ak ng'echerok che bo che kialdoi cheptugenik. ¹⁶ Ak kima chamji chi age tugul kobun hekalut koibe kiy ne imuchi kealda. ¹⁷ Ak kiinet koleji icheket, "Tos ma sirat kole, 'Kiguure gonnyu gotab saet ne bo bororiosiek tugul'? ago kaoyai akwek koek kebenetab chorik. ¹⁸ Ak kigas tisiik che eechen ak sirik, ak kocheng ole bartoi inendet. Amu kiiywei inendet amu kiga kwong'io tuiyet komugul agobo kanetisiennyi. ¹⁹ Ak kingoek koskoleny, komanda eng' nganaset. ²⁰ Ak kingosiirtoi icheket karon, kogeer mogoiywonoto ko ka koyaam kot koit tigitik. ²¹ Kobwat anyun Petero ak koleji, "Konetindoni, keero! kakoyaam mogoiywondoni koichube." ²² Kowolji Jeiso koleji, "Oyan Jehovah. ²³ Amwawok iman ale chi age tugul ne lejini tulwoni, 'Kitutin ak kewirjin araraita,' ako mabistoe eng' muguleldanyi ak koyan kole isuldoi tuguk che kamwa kosuldoi, ko noto ne yae Jehovah ak konyoru tuguchoto. ²⁴ Noto anyun amwawok ale: Tuguk alak tugul che osome eng' saet, oyan ole kaotaach, ak onyoru. ²⁵ Ak ye otonon osae, ko chi ne tinye chi ng'olyo ko agoi onyochi kaat, si konyoiywok kaat lelutikwok Kwandang'wong' agine Kwandang'wong' ne mi kipsengwet. ²⁶ Ago ngo monyochi kaat akwe ko manyoiywok kaat lelutikwok Kwandang'wong' agine ne mi kipsengwet." ²⁷ Ak kibwa kogeny Jerusalem. Ak kingota kowendoti eng' hekalut, kobwanji inendet tisiik che eechen, ak sirik, ak boisiek. ²⁸ Ak kiteebe kole, "Nee kimnatet ne iyae tuguchu, anan ng'o ne kigonin kimnatoni iyae tuguchoto?" ²⁹ Ak kilenji Jeiso icheket, "Ateebenok ak ane ng'olyot agenge. Owolwo, si amwawok kimnatet ne ayae tuguchoto. ³⁰ Tos kibunu kabatisanetab Johana kipsengwet anan kibunu biko? Owolwo." ³¹ Ak kitebege ichege eng icheke kolen, "Ngele, 'Kibunu kipsengwet,' kole inendet, 'Kiyai nee anyun si moyan?' ³² Ago ngot kele, 'Kibunu biko,'....Ko kiiywei biko, amu kiga koyan biko tugul kole maotiot Johana. ³³ Ak kiwolji Jeiso kole, "Magingen." Ak kileji Jeiso anyun, "Mamwawok agot ane kimnatet ne ayae tuguchoto."