¹ Ak kitoi konet icheket eng' kelewenaik. Ak kole, "Kiminji chito age sabibuk mbaret, ak kong'ot, ak kobal keringet ole kirurung'e sabibuk. Ak kiteech got ne koi ak komanakyi kolikab sabibuk (meek), ak kwo emet age. ² Ak kingoit betusiekab kesisiet, koyokto otwogindet kwo ole mi meek, si kobiit konyorune meechoto logoek che bo mbaretab sabibuk. ³ Ak kinam inendet, ak kobir, ak koon kwo buch. ⁴ Ak kiiyokyi kogeny otwogindet age, ak kibir metinnyi ak kotewer. ⁵ Ak kiiyokto age, ak kobar inendet. Ak kiiyokto alak che chang', kobir alak ak kobar alak. ⁶ Kita kotinyei anyun chito agenge ne iyoktoi, noto ko werinnyi ne chemat. Kolejige, 'Konyiti werinnyu.' Kiiyoktto inendet eng let kwo ole mi icheket. ⁷ Ago king'alalso meechoto ichegei, kolen, 'Nito ne namu tuguk. Obwa, kebar inendet, si kindii tuguk.' ⁸ Ak kinam inendet, ak kobar, ak kowirta komanda eng' mbaret ne bo sabibuk. ⁹ Yaei ne anyun chitab kobo sabibuk? nyonii anyun kobarei meechoto ak komanakyi meek alak mbaranato ne bo sabibuk. ¹⁰ Tom osoman sirutichu? 'Koita ne kitoiyo tegiik, kigiyai noto koek koitab luita. ¹¹ Kibunu ng'olyondoni Kiptaiyat, ak ko bo kwong'ut eng' konyekyok"' ¹² Ak kingobata nito ko kicheng'ei Yahudik ole namdoi Jeiso amu kinai kole kamwa kalewenoni agobo icheket. Ago kiiywei tuiyet. Ak kibagakta inendet ak koba. ¹³ Ak kiiyokyi Parisaik alak ak che bo Herodik, si korate ng'alekyi. ¹⁴ Ak kingobwa, koleji inendet, "Konetindoni, kingen kele i bo iman, ameiti chi age tugul, amu megeere itondab chi, ago ineti iman oretab jehovah. Tos chamdoi ng'atutik kigochi kodi Kaisari, anan machamdoi? ¹⁵ Kigoite anan olo?" Ago kinai inendet chombilileng'wai, ak koleji icheket, "Kainee si otiema? Oibwa denarit ageer." ¹⁶ Ak kiipchi Jeiso denarit agenge. Ak kileji icheket, "Bo ng'o itoni ak sironi?" Ak koleji, "Bo Kaisari." ¹⁷ Ak kileji Jeiso, "Ogochi Kaisari tuguk che bo Kaisari, ak ogochi Jehovah tuguk che bo Jehovah." Ak kikwong'io mising agobo inendet. ¹⁸ Ak kibwanji inendet Sadukaik, che mwaei kole mami ng'eetyet. Ak koteebe inendet, kole, ¹⁹ "Konetindoni, kisirwech Musa kole, 'Ngo me werit ne tupcho ak chi, ak kobagakta chepyosennyi, ama sich lekwa, kondii wering'wai chepyosonoto, si kobiit kolalji maat wering'wai.' ²⁰ Kimi werik tisabu che kitupcho, ak kiitunis werit ne o, kome ama sich lekwa. ²¹ Ako kiindi agine ne bo aeng', kome ama sich lakwa, ak kiindi noto agine ne bo somok. ²² Ak ma biitune tugul tisab lekwa. Let kome agine chebiosonoto. ²³ Tun eng' ng'eetyet kobunjini ng'o eng' icheket chepyosonoto? Amu kiga kobunji choto tisab." ²⁴ Ak kileji Jeiso icheket, "Tos ma noto ne kigonok olel, amu mongen sirutik anan ko kimnatetab Jehovah?" ²⁵ Amu ye tun ng'eetyo icheket komong' eng' che ki komeiyo, ko maitunisie, ama kituni, ago u malaikaisek eng' kipsengwet. ²⁶ Ago agobo bik che kigobek kele tun ng'eetos, ko tomo osoman eng' bukuitab Musa, eng' ole kimi kertit, ko u ye kimwachi Jehovah inendet, koleji, 'Aii Jehovah ne bo Abraham, ak aii Jehovah ne bo Isak, ak aii Jehovah ne bo Jakobo'. ²⁷ Inendet ko ma Jehovah ne bo che kigobek, ago bo che soptos. Olele mising." ²⁸ Ak kinyo age eng' sirik ak kogas koteebegei, ak kinai kole kawolji ichek Jeiso komie. Koteebe inendet, kole, "Nee ng'atutiet ne bo tai eng' tugul?" ²⁹ Kowolji Jeiso koleji, "Ne bo komonut ko ni, "Ogaso, ee, Israel; Kiptaiyat Jehovah nenyo ko Kiptaiyat agenge. ³⁰ Ak icham Kiptaiyat Jehovah neng'ung' eng muguleldang'ung' komugul, ak eng' sobondang'ung' komugul, ak eng ng'omnateng'ung' komugul, ak eng kimnateng'ung' komugul.' ³¹ Nebo aeng' ko ni, 'Cham chitab kokweng'ung' ko u yo ichamege.' Mamito ng'atutiet age ne o kosir chu." ³² Ak kileji sirindet, "Iman, Konetindoni! Kaimwa komie, ile inendet ko agenge ama mi age kobate inendet. ³³ Ak kecham inendet eng muguleldo komugul, ak eng' kaguiyet komugul, ak eng' kimnatet komugul, ak ngocham chi chitab kokwenyi ko u yo chamege kosiirei noto kagochinoik tugul che kibeelei ak tiseiywek." ³⁴ Ak kingogeer Jeiso kole kawol eng' ng'omnatet, koleji, "Ma i loo eng' bounatetab Jehovah." Ak kingobata noto ko mata kogany chi koteebe ng'olyo age tugul. ³⁵ Ak ye kiinetisie Jeiso eng' hekalut, komwa kole, "Kainee si komwaei sirik kole, Kristo ko weritab Daudi? ³⁶ Kimwa Daudi inendet, eng' Tamirmiriet ne Tilil, kole, 'Kimwachi Kiptaiyat Kiptaiyandennyu, kole, "Tebee eunnyu ne bo tai, agoi andene buniguk keldebesaikab kelyeguk."' ³⁷ Kuure Daudi inendet 'Kiptaiyat,' koegundoi ano anyun Kristo weritab Daudi?" Ak kiepchi iit tuiyet ne o inendet eng' boiboiyet. ³⁸ Ak eng' konetisiennyi koleji Jeiso, "Oribge sirik, che chamei kobendat kolaachi ngoroik che koen ak kagatosiek eng' oldinwekab aldaisiet, ³⁹ ak ng'echerok che bo tai eng' sunagogisiek ak oldinwek che bo tai eng' igorwek. ⁴⁰ Ak korebe icheket mosogik gorikwai, ak kosaei sautik che koen si kogeer biko. Nyoru bichu kiruoget ne o kosiir." ⁴¹ Ak kitebee ng'weny Jeiso kotokyigei ole kiyumjini tuguk che kigoitoi; kogeer ole indoitoi tuiyet chepkondok ole kiyumjini. Ak kiindeno magorek alak chepkondok che chang'. ⁴² Ak kinyo mosoget age ne kibanania ak kondeno sendeisiek aeng', che u kebeberta ne mining' ne bo denarit. ⁴³ Ak kiguur alamalyennyi kobwa anyun ole mi inendet, ak koleji, "Amwawok iman ale, kagonde mosogani banan che siirei che kagondeno biko tugul che kendeno tugukwai ole kiyumjini. ⁴⁴ Amu kagondeno icheket tugul che bo chang'indab tugukwai. Ago kagondeno inendet che bo banandannyi tugul, che katinyei, agot che kosobee."