¹ Ak ye kimandoi eng' hekalut, koleji age eng' alamalyennyi, "Konetindoni, keero, kit ne u koichu ak ole u teeksoni!" ² Ak kileji Jeiso, "Tos igeere teeksosiechu eechen? Matun ng'etu koita agenge eng' baragutab age, ne magiwirjini ng'weny." ³ Ak kingotebchei ng'weny eng' tulwetab Emitik ye tokyindos ak hekalut, koteebe inendet Petero ak Jakobo ak Johana ak Andrea komi ichegei, kole, ⁴ "Mwawech, yaaksei tuguchuto auiyo? Ak nee kaborunet ne tun iboru kole karik kosulda tuguchuto tugul?" ⁵ Ak kitoi Jeiso koleji, "Oribge si maibeetok chi. ⁶ Bwanii tun che chang' eng' kainennyu, kolen, 'Aii inendet,' ak kobeeti che chang'. ⁷ Ak ye tun ogas agobo bariosiek ak ng'alek agobo baretabge, ko mocholie; yaakistos tuguchuto ne matiny , ago tomo koit kagesunet. ⁸ Amu setyini bororiet age bororiet age, ak setyini bounatet age bounatet age. Ak kobiit botanetab ng'weny eng' orisiek che chang' ak kobiit rubosiek. Tuguchoto ko taunetab ng'woninwek che uu che bo sigisiet. ⁹ "Ago oribge akwee. Amu tun kimutyinok kapkiruok, ak kebirok eng' sunagogisiek. Ak oteleli eng' taitab bounik ak laitorinik agobo ane, si koek baornat eng icheket. ¹⁰ Ak kanyol keamji korok logoiywek che tililen bororiosiek tugul. ¹¹ Ak ye tun kimutak kapkiruok, ak kindenok eunekab biko, ko mat ogerer met agobo kito ne tun omwae. Ago kit age tugul ne kigonok eng' sainato; ko noto ne omwae: amu ma akwee che ong'alali, ago Tamirmiriet ne Tilil. ¹² Ak kong'wektai chi wering'wai kebar, ak kong'wekta kwanda lakwennyi. Ak kong'eetyi leguk sigikwai, ak kogoito kebar. ¹³ Ak kosasak biko tugul amu kainennyu. Ago ne muitoi agoi let, kesoru noto. ¹⁴ "Ago tun ngogeer kito ne kisasei ne bo ng'emisiet kotonone ole ma nyoljini kotonone," (ingoguiyo ne somani), ingomwechi anyun che mi Judea tulonok, ¹⁵ ama chortage chi ne mi got barak anan kwo go, si kobiit konem kiy eng' gonnyi, ¹⁶ amat koweektage chi ne mi mbar kwo koib ngoriennyi. ¹⁷ Bwo eng icheket che manakotin ak che chuchuni eng' betusiechoto! ¹⁸ Ak osa si matun ko yaak choto eng' betusiek chebo kaititindo. ¹⁹ Amu egu nyalilda eng' betusiechoto, ne kitom koegu ko u noto kong'ete taunetab yaetab ng'weny ne kiyai Jehovah, agoi nguno, ama kobiitu ko u noto kogeny agoi. ²⁰ Ak nda kima til kiptaiyat betusiek konwagitu, ta ma kisoru chi. Ago kitil betusiechoto amu che lewenotin. ²¹ Ak ngolejok chi eng' betusiechoto, 'Ogeero, mi Kristo oli!' anan, 'Ogeero, mito olin!' ko mat oyan. ²² amu ng'eetos kristoisiek che bo lembech, ak maotik che bo lembech, ak kobortoi kaborunoik ak kwong'utik, si kobeet, agot che kigelewen, nda imugaksei. ²³ Ago oribge! Ogeero, kasib amwawok tuguchu tugul. ²⁴ "Ago eng' betusiechoto ko kagobata nyalilata, 'kotuuit asista, ama koluu arawet, ²⁵ ak kororok kokelik eng' kipsengwet, ak kotumdumgei kimnatosiek che mi kipsengwetisiek.' ²⁶ Eng' sainato kogeer anyun Weritab chi kochonii eng' bolik koboto kimnatet ne o ak torornatet ne o. ²⁷ Yeityo koyokto malaikaisiekchi ak koyum lewenikyii, kobun usonaik ang'wan, kobunu tabandab ng'weny agoi tabandab kipsengwet. ²⁸ Onetge kelewenetab mogoiywet. Ngong'arng'aritu temenikyii ak kong'atyo sogek, onai kole karik kesisiet. ²⁹ Ko u noto ak akwee, ye ogeer kosuldoi tuguchu, onai kole kagorik inendet, mi kurget. ³⁰ Amwawok iman ale, masiirtoi ebeni, ama isulda tuguchoto tugul. ³¹ Siirtoi kipsengwet ak ng'weny, ago masiirtoi ng'alekchu. ³² Ago mami chi ne naei agobo betunoto anan sainato, agot malaikaisiek che mi kipsengwet, agot Werit, kobate Kwanda inegei. ³³ "Oripse anyun! Okang'isie ak osae amu mongen ole sait ata. ³⁴ U chi, ne kibagach gonnyi, ak koruto emet age, ak kogochi otwogikyii kimnatet, chi age tugul ak boisiennyi, ak kong'at ribindet koripso. ³⁵ Oripse anyun amu mongen ye itu chitab kobo got; ngo koskoleny, anan kemoi kwen, anan ye iteei kipsoiywet, anan karon. ³⁶ Si ma nyachak ak konyoruok orutosi. ³⁷ Ak ng'olyot ne amwawok akwee amwachini tugul, ale: Oripse!"