¹ Ak kigang'et betusiek aeng'u si kobiit igortab pasaka ak makatinik che ma kindenoi mermerek. Ak kicheng'e tisiik che eechen ak sirik ole imuktoi konam Jeiso eng' ng'alset, si kobiit kobar inendet. ² Amu kile icheget, "Ama tokany kenam eng' igorta, si mabolyo biko." ³ Ak ye kimi inendet Betania eng' gotab Simon ne kiamei mogondosik, kota kotebche eng amisiet, konyo chebioset ne kitinye chubait ne mi mwaita ne nyamdut ne bo kamanutiet ne o. Ak kitui chubainoto, ak korong'ji metinnyi. ⁴ Ak kimi alak che kinerektos eng' orit kolen, "Amu nee si kibeet buch mwai? ⁵ Amu kata yamei kealdae mwai che siirei denarisiek bogol somok, ak kigochi kibananok." Ak kibolji inendet. ⁶ Ago kile Jeiso, "Obagakte. Kainee si oiim inendet? Kagoyaiywa boisiet ne kararan. ⁷ Amu otinye kotugul kibananok, ak eng' olo tugul ngomache, omuchi oyachi ne kararan, ago mami ane kobotok agoi. ⁸ Kagoyai ne imuchi. Kasib koiil bortanyu agobo tubenyu. ⁹ Ak amwawok iman ale, oloo tugul ole kiamjini logoiywek che tililen eng' ng'weny komugul, kemwaitoi agine ne kayai chebiosoni si kobiit koek kabwatet agobo inendet." ¹⁰ Ak kiwa Judas Iskariot, ne ki age eng' taman ak aeng', ole mi tisiik che eechen, si kobiit kong'wekyi icheget. ¹¹ Ak kingab kagas icheket tisik che eechen, koboiboitu, ak koarorji kole igochini inendet fedaisiek. Ak kitoi kocheng' sait ne yamei si kong'wekta inendet. ¹² Ak eng' betutab tai ne bo makatinik che ma kindeno mermerek, ye kienyei aruetab Pasaka, koleji alamalyennyi, "Imache kebe ano si kechobun ole iame Pasaka?" ¹³ Ak kiiyokto aeng' che bo alamalyennyi, koleji, "Oba nganaset, ak otuiye chito ne ibu teretab beko. Orub inendet. ¹⁴ Ak oldo tugul ole mong'jini inendet, oleji chitab kobo got, 'Kale konetindet, "Mi ano gonnyu ne bo toek, ole anyone aame igortab Pasaka koboto alamalyennyu?"' ¹⁵ Ak koboruok inendet got ne o ne bo barak ne tetat komie. Ochobwech oloto." ¹⁶ Kiba anyun alamalyet, kot koit nganaset, konyor ko u ye kaga kemwachi, ak kichob anyun Pasaka. ¹⁷ Ak kingoek koskoleng, kocho koboto taman ak aeng. ¹⁸ Ak ye kitebche eng' amisiet, kole Jeiso, "Amwawok iman ale, ng'wekto agenge eng' akwe, inendet ne kiamisiei tuwai." ¹⁹ Kotoi anyun koimgee icheket tugul, ak koleji inendet agenge agenge, "Tos ane?" ²⁰ Ak kileji icheket, "Noto ko agenge eng' taman ak aeng', ne kiroktoi tuwai makatiat eng' bakulit. ²¹ Amu wendi Weritab Chi, ko u ye sirat agobo inendet. Ago bwo eng chichoto king'wektae Weritab Chi! Kita keigei eng' chichoto ko ma kisich." ²² Ak kingo amisiei icheget, konam makatiat, ak kingo kagoberur, kobutul. Kiigochi icheket ak kole, "Oam ni. Nito ko bortanyu." ²³ Ak kinam kikombet, ak kingo kagomwa kongoi, kogochi icheket ak koee tugul. ²⁴ Ak kileji, "Chu ko koroktikchu che bo arorutiet, che tumdogei agobo che chang'. ²⁵ Amwawok iman ale, ma aee kogeny che bo logoekab sabibuk, agoi betunoto ne aee che leelach eng' bounatetab Jehovah." ²⁶ Ak kingo kagotien tiendo, komanda koba tulwet ne bo Emitik. ²⁷ Koleji Jeiso icheket, "Kinachok akwee tugul ak ometoo anege, amu kigisir kele, 'Akwere mestowot, ak koyesta kechirek.' ²⁸ Ago, ye kaging'eeta, andoenak awe Galili." ²⁹ Ago kileji Petero, "Agot ngo meten tugul, ko mameten anee." ³⁰ Ak kileji Jeiso inendet, "Amwaun iman ale, rani---- kemouni--- kotomo kochei kipsoiywet konyil aeng', itaiyo konyil somok." ³¹ Ak kimwa eng' kimnatet ne o kole, "Mbo nda makat kemeiye tuwai, ko magoi atain." Ak kimwa agichek tugul ko u noto. ³² Ak kiit koret ne kiguure Getsemane, ak kileji alamalyennyi, "Otebe yu, ye asae." ³³ Ak kiimut Petero ak Jakobo ak Johana, ak kitoi koimge ak ko orogen mising. ³⁴ Ak kileji icheket, "Iimegei sobondanyu mising,' agoi meet. Otebe yu ak oripse." ³⁵ Ak kiwo tai kitigin, ak kobutyi ng'weny Jeiso ak kosa kole ngomugaksei kosiirtoe inendet sainato. ³⁶ Ak kimwa kole, "Abba, Kwanda, imugakse tuguk tugul eng' inye. Istaeno kikombani. Ago, ma ko u ye amache, ago ko u ye imache." ³⁷ Ak kiwechge ak konyor icheket koruitos, ak koleji Petero, "Simon, imi irue? Ma imuch iripse agot sait agenge? ³⁸ Oripse ak osae si mochut tiemutik. Mache tamirmiriet iman, ago nyalulat borto." ³⁹ Ak kiwo kogeny ak kosa komwa ng'alekita. ⁴⁰ Ak kinyo kogeny ak konyor koruitos, amu kiga nyigisitu mising' konyekwai. Ak kima kongen kit ne wolji inendet. ⁴¹ Ak kinyo ne bo somok ak koleji icheket, "Toruitosi ak omuunyi? Kagoem! Kagoit sait. Ogeero! Kageng'wekyi Weritab Chi eunekab kiptengeginik. ⁴² Ong'etye, ongebe. Ogeer anyun, kagorik inendet ne ng'wektaa." ⁴³ Ak ngunoto kota kong'alali, kocho Judas age eng' taman ak aeng', koboto tuiyet che tinyei rotonikab chok ak siarisiek, kobunu ole mi tisiik che eechen ak sirik ak boisiek. ⁴⁴ Ak kiga koarorji ng'wektaindet icheket, koleji, "Inendet ne ang'ututi, ko inendet noto. Onam, ak omut ak oribote." ⁴⁵ Ak kingoit Judas, kwo eng' sainato ole mi inendet, ak kole, "Rabbi," ak kong'utut inendet. ⁴⁶ Ak kiiyogoito bichoto eunekwai ak konam inendet. ⁴⁷ Ago king'us rotwennyi bo chok age eng' ichek che kitonondos eng' ye legit, ak kotil ititab otwogindetab tisiindet ne o. ⁴⁸ Ak kiwolji Jeiso koleji, "Komong'u ak rotonikab chok ak siarisiek, ko u ye osetyini chorindet, si onama? ⁴⁹ Ko ngomii kobotok betusiek tugul eng' hekalut ak anetisiei, ak kima onama. Ago kayaak ni si kobiit kosulda sirutik." ⁵⁰ Ak kibagakta icheket tugul che kimi ak Jeiso inendet, ak korweiyo. ⁵¹ Ak kirub inendet mureno age, ne kiilaachi anget inegei ne bo katanit. Ak kingonam bichoto inendet, ⁵² kometo ngorionoto bo katanit, ak kolabat ach ngor. ⁵³ Kiimutyi Jeiso anyun kwo ole mi tisiindet ne o. Ak koyumjigei inendet tisiik tugul che eechen, ak boisiek ak sirik. ⁵⁴ Ak kirub Petero inendet eng' ole loo, agoi koit kieng'utab gotab tisiindet ne o. Ak kitebche koboto ng'atiik, koue maat. ⁵⁵ Kicheng anyun tisiik che eechen ak kapkiruoget komugul baornatet eng' Jeiso si kobiit kobar inendet. Ago kimanyor agot agenge. ⁵⁶ Amu kibaorinji che chang' lembech agobo inendet, ak ma namgei baornateng'wai. ⁵⁷ Ak kitononio alak kobaorian lembech agobo inendet; kole, ⁵⁸ "Kigigas komwaei inendet kolen, 'Abute hekaluni kigiyae eunek, ak ateech age eng' betusiek somok ne magiyae eunek."' ⁵⁹ Ago eng' noto ko ma namgei baornateng'wai. ⁶⁰ Kitonon anyun tisiindet ne o eng kwenung'wai ak kotebee Jeiso, kole, "Mewolu kiy? Nee ni baorianjinin bichu?" ⁶¹ Ago kisis ama wol kiy. Kitebee kogeny tisiindet ne o, kole, "ii Kristo inye, Weritab Ne Iberurot?" ⁶² Ak kile Jeiso, "Aii inendet; ak tun ogeere Weritab Chi kotebche eng' eutab tai ne bo kamuktaet, konyonei eng' bolik che bo kipsengwet." ⁶³ Ak kigerer ngoroikyi tisiindet ne o, kolen, "Tos ta kemage nee baorinik alak? ⁶⁴ Kaogas ng'alek che yaach che mwaei. Obwati nee?" Ak kiiruokyi tugul che ki mito kole nyoljini meet. ⁶⁵ Ak kitoi alak kosingilji inendet ak kotuch togennyi ak koluche ak koleji, "Ng'orse!" Ak kinam ng'atiik inendet ak kobir. ⁶⁶ Ak kingota komi Petero kieng'ut ole bo ng'weny, konyo age eng' tibiik che bo otwogikab tisiindet ne o. ⁶⁷ Ak kingogeer Petero koue mat, kochilji kong inendet, ak koleji, "Koimii aginye koboto Nasaretindonoto, Jeiso." ⁶⁸ Ago kitai kole, "Mangen, amaguitosi choto imwae." Ak kimanda kwo kotokchige kurget. Ak kochei anyun kipsoiywet. ⁶⁹ Ak kigeer cheboto inendet, ak kotoi kogeny komwachi che kitonondos eng ole legit, koleji, "Chichi ko agenge eng' icheget!" ⁷⁰ Ak kitai kogeny. Ak ne matia koleji icheket kogeny che kitonondos eng ole legit Petero, "Iman ii agenge eng' icheket, amu ii Galilindet." ⁷¹ Ak kitoi kochubge, ak komurtoi, kole, "Mangen chichi omwae." ⁷² Ak ngunoto kochei kipsoiywet ne bo aeng'. Ak kiinan anyun Petero ng'alekab Jeiso, ko u ye kiga komwachi Jeiso inendet kole, "Kotomo kochei kipsoiywet konyil aeng', itayo konyil somok". Ak kingonan ng'olyondonoto, korir mising.