¹ Ak eng kariron ko kaech, kotet nga'lek tisiik che eechen koboto boisiek ak sirik, ak kapkiruoget komugul. Ak korat Jeiso, ak komut kwo. Ak kigochi inendet Pilato. ² Ak kitebe Pilato kole, "Tos ii Laitoriatab Yahudik?" Ak kiwolji koleji, "Kaimwa." ³ Ak kiitaam inendet tisiik che eechen eng' tuguk che chang'. ⁴ Ak kitebee Pilato kogeny, kole, "Mewolu kiy? Keero tuguk che chang' che kagotaamjin bichu! ⁵ Ago mata kowol ng'olyo Jeiso, kot kokwong' Pilato. ⁶ Kicham kotiakyini Pilato biko kimonjororiot agenge eng' betutab igorta, ne kagosom icheket inendet. ⁷ Ak kimi chito age ne kigiguure Baraba, ne ki ratat koboto ichek che kichaamsei, icheget che kiga ko rumis eng' chaamsonoto. ⁸ Kitogosta tuiyet ak kotoi kosom inendet koyachi ko u ye cham koyaei kotugul. ⁹ Ak kiwolji Pilato ichek, koleji, "Tos omache atiakwok Laitoriatab Yahudik?" ¹⁰ Amu kiga nai kole, kiigoito tisiik che eechen inendet amu ng'etkong'. ¹¹ Ak kiilal tisiik che eechen tuiyet komwa kole, kitiakyi Baraba. ¹² Ak kiwol Pilato kogeny kole, "Aite nee anyun Laitoriatab Yahudik?" ¹³ Ak kibolyo ichek kogeny, kole, "Igartat inendet eng' kimurtoiyot." ¹⁴ Ak kileji Pilato icheket, "Koyai yaitio nee?" Ago kibolyo icheket mising' kole, "Igartat inendet eng' kimurtoiyot." ¹⁵ Ak amu kimache Pilato kobaibai tuiyet, kotiakyi anyun Baraba. Ak kibire Jeiso kipcharitishek ak kogoito si kobiit kigartat. ¹⁶ Ak kiimut askarik inendet kwo kapkiruok orit, ne kiguure Praitorium; ak kiguur askarik tugul kobwa. ¹⁷ Ak kiilaakyi ngoriet ne arus ne birir, ak kikesen kutwetab katok, ak kondeno metinnyi. ¹⁸ Ak kitoi kogat inendet kopirjini surut kole, "Kigatin, Laitoriatab Yahudik!" ¹⁹ Ak kikwer metinnyi eng'kiroktab tegaat, ak kosing'ilji inendet. Ak kogutung'io ak kolos inendet. ²⁰ Ak kingo kagotachatach inendet, koreegune ngoriet ne arus ne birir, ak kolaakyi ngoroikyi, ak kiimut kwo sang' kogartat eng kimurtoiyot. ²¹ Ak kibirji chito ne kisiirtoi, Simonne ne bo Kurene, kwandab Aleksandro ak Rupo, kobunu koret age, koib kimurtoiyotab Jeiso. ²² Ak kimut inendet kwo oldo ne kiguure Golgota, ye kiweech kelen, Oldab terta (rokyetab metit). ²³ Ak kiigochi divaik che ng'olot ak tuguk che u igomoik, ago ma eei inendet. ²⁴ Ak kigartat inendet ak kopchechigei ngoroikyi, ak koser barbarek, konai ne te ne ibei askarindet age tugul. ²⁵ Ak kiigartat inendet inendet, ko kait sait somok. ²⁶ Ak kigisirji ng'alekab kataamset agobo inendet metinnyi barak kele, "LAITORIAT NE BO YAHUDIK." ²⁷ Ak kiigartat chorik aeng koboto inendet; agenge eng' eunnyi ne bo tai ak age eng' eunnyi ne bo katam. ²⁸ Ak kiisulda anyun siret ne mwaei kole, Ak kigiit inendet koboto kiptengeginik. ²⁹ Ak kichurochur che kisiirtoi, kowirwiri metigoikwai, ak kolen, "Haa! Inye ne ibute hekalut, ak iteeche eng' butusiek somok, ³⁰ soruge, ak ichoruge eng' kimurtoiyot!" ³¹ Ak kichurochur inendet ko u noto tisiik che eechen agichek, koboto sirik kole, "Kisoru alak, ago maimuchi kosorgei. ³² Ingochorgei nguno Kristo, Laitoriatab Israel, eng' kimurtoiyot, si kobiit kegeer ak keyan." Ak kimor inendet kora agichek che kigigartat koboto inendet. ³³ Ak kingoit sait lo, koimenit emet komugul agoi sait sogol. ³⁴ Ak eng sait sogol kowaach Jeiso eng kutit ne o kole, "Eloi, Eloi lama sabaktani?" ye kiweech kelen, Jehovah nenyu, Jehovah nenyu, kebagakta amu nee?" ³⁵ Ak kingogas alak che kitonondos eng' ye legit, kole, "Ogeer anyun, kuurei Elija." ³⁶ Ak kilabat chito age, konyiit siki *sibonjit, ak kondeno tegat, ak kogochi koee. Ak kole, chichoto "Ingotebi ko u noto; ongegeer ngo nyonii Elija kochorge konyo ng'weny." ³⁷ Kowaach anyun Jeiso eng tuget ne o, ak kochamji tamirmiriet kwo, ak kome. ³⁸ Kigerer anget ne kiga kibesie hekakut kwen kong'ete barak agoi ng'weny. ³⁹ Ak kingogeer kiptaiyat ne bo kenyisiek bogol; ne kitononi eng' ole legite, inendet, kogoitoi tamirmiriet kwo ko u noto, kole, "Iman ko Weritab Jehovah chichi." ⁴⁰ Ak kimi agichek chebiosok che kigerei eng' ole loo. Eng icheget ko kimi Maria Magdalena ak Maria kametab Jakobo ak ne bo Joses ak Salome. ⁴¹ Che kirube ak koboisiechini inendet ye kimi Galili. Koboto chebiosok alak che chang' che kitogosune Jerusalem koboto inendet. ⁴² Ak kingoit koskoleng , amu ki betutab chobet, amu ki noto ko betut ne indoune sabato, ⁴³ konyo Josep ne bo Arimatea. Ki chito ne konyitot ne bo kapkiruok, ne kiigeni agine bounatetab Jehovah. Ak kiwo gab Pilato eng' nyiganatet kosom bortab Jeiso. ⁴⁴ Ak kikwong' Pilato amu kiga kome; ak kiguur kiptaiyatab bogol, koteebe ngo kagome Jeiso. ⁴⁵ Ak kingo kagonai eng eng' kiptaiyandanato kole kagome Jeiso, kogochi anyun Josep borto. ⁴⁶ Ak kiga kwal Josep anget ne bo katanit. Ak kichoor inendet kong'ete kimurtoiyot, ak kotae anganato bo katanit, ak kondeno kererit, ne kiga kebal eng' koita ne o; ak kimilji koita kogere kurgetab kererit. ⁴⁷ Ak kigeerei Maria kametab Joses ole kagindeno bortab Jeiso.