1 Ak kingo kagosirto sabato, koal Maria Magdalena, ak Maria kametab Jakobo, ak Salome, nyamdutik si kobwa koiil bortab Jeiso. 2 Ak eng' karonet nebo betutab tai ne bo wigit, koba kererit ko kachor asista. 3 Ak king'alaljinige ichegei kole, "Mildoiywech ng'o koita eng' kurgetab kererit?" 4 Ak kingong'et met, kogeer ko kagemilda koita, amu ki o mising'. 5 Ak kingochut kererit, kogeer muren kotebche eng' komostab tai, ne ilaachi ngoriet ne leel; ak kikwong'io. 6 Ak kileji icheket, "Amokwong'ie. Ocheng'e Jeiso, Nasaretindet, ne kiga kigartat. Kagong'eet! Ma komi yu. Ogeer ole kiga kimokonji inendet. 7 Ago oba, omwachi alamalyennyi ak Petero, oleji, 'Kagondoenak kwo Galili. Ogeere inendet eng' oloto, ko u ye kiga komwawok."' 8 Ak kimanda sang' eng' kererit ak korwei; amu kibotanso ak kokwong'io. Ak mamwachi chi kiy amu kiiywei. 9 Ak kingong'eet Jeiso anyun karon mising', eng' betutab tai ne bo wigit, kochonji korok Maria Magdalena, inendet ne kiga kocherune Jeiso oik tisab. 10 Kiwa komwachi icheget che kimi koboto inendet, ye kita korirtos ak koteitos. 11 Ak kingogas icheket kole sobei, ak kole kagogeer inendet chebiosonoto, ko ma iyan. 12 Ak kingobata tuguchu, kong'angjige eng' itondo age aeng' eng' icheket kingobendi eng' koret age. 13 Kiba anyun ak komwachi chun alak, ak kima iyan choto agiche. 14 Ak kingobata noto, kong'ang'jige icheget taman ak agenge kotebsot eng' amisiet ak koger kong' amu bistoeng'wai ak uuindab mugulelwekwai, amu kima iyan icheget che kigeer inendet ko kagong'eet. 15 Ak kileji, "Oba ng'weny komugul, oamjinote logoiywek che tililen biko tugul. 16 Inendet ne iyani ak kibatisan kesoru, ago inendet ne maiyani ko tun kiruokyini. 17 Kaborunoichu ko rube icheket che iyani: Onei oik eng' kainennyu. Ak kong'alalsot kutuswek che leelachen. 18 Namei erenok eng eunekwai, ago ngo ee tuguk che barei bich, ko manyoru ng'wanindo ne matiny. Igonoori eunekwai biko che miandos ak kosopcho." 19 Ye kingo kagong'alal ak icheget, Kiptaiyat Jeiso, kimut anyun inendet, kwo kipsengwet, ak kotebe eutab tai ne bo Jehovah. 20 Ak kiba anyun, koamdaat eng' olo tugul, kobois Kiptaiyat koboto icheket, ak kogimit ng'olyot eng' kaborunoik che kiruboti icheket.