¹ Ak kiwo sunagogit kogeny, ak kimi chito ne ki resot eut. ² Ak kirib biko alak inendet kole kogeer ngo tos isoob chichoto eng betutab sabato si kobiit komwaita inendet. ³ Ak kileji chito ne resot eut, "Ng'et ak itonon eng yu kwenutab chi tugul." ⁴ Ak kileji biko, "Tos chamdoi ng'atutik keyai ne kararan eng betutab Sabato anan keyai ne ya; kesor sobet, anan kebar?" Ago kisisyo. ⁵ Kigeer icheget che kimi komoswek tugul eng neregek, koimgee amu uuindab mugulelwekwai, ak koleji chichoto, "Chuul eung'ung." Kichuul anyun, ak kisob eunnyi. ⁶ Ak kimanda sang Parisaik ak kotoi anyun kochob ng'alek ak Herodik agobo inendet, si konai ole bortoi. ⁷ Ak kiitabangei Jeiso ak alamalyennyi, ak koba araraita, ak kirub tuiyet ne o ne kibunu Galili ak ne kibunu Judea ⁸ ak che bunu Jerusalem ak Idumea ak bitetab Jordan ak komoswekab Turo ak Sidon. Kibwonji inendet tuiyet ne o ,ye kingogas agobo tuguk che eechen che kiyae. ⁹ Ak kimwachi alamalyennyi kochobji moinget ne mining ne bo beeko amu chang'indab biko, si machiil inendet. ¹⁰ Amu kiga kosoob che chang, kot kochonji inendet age tugul ne kitinyei korotwek che yaachen si kobiit kotiiny inendet. ¹¹ Ak eng uitugul ye kageer inendet tamirmirik che muruonen, kobutyi ng'weny eng tainyi ak koteiyo kole, "Inye ko i Weritab Jehovah." ¹² Ak king'at icheket mising si mamwaita inendet. ¹³ Ak kilany tulwet anyun, ak kiguurjigei che kimache, ak kibwonji inendet. ¹⁴ Ak kilewen taman ak aeng (che kiguure che kiyoktoi) si kotebi ak inendet, si kobit koyokto icheket koba amdaetab logoiyot, ¹⁵ ak konyor kimnatet ne onee oik. ¹⁶ Kilewen taman ak aeng: Simon, ne kigochi kainet Petero; ¹⁷ Jakobo weritab Sebedi, ak Johana wering'wai, che kiigochi icheket kainet koguure Boarnerges, noto ko werikab ilat; ¹⁸ ak Andrea, Pilipu, Bartolomayo, Matayo, Tomas, Jakobo ne bo kap Alpayo, ak Tadayo, ak Simon ne Kananindet, ¹⁹ ak Judas Iskariot, ne king'wektoi inendet. ²⁰ Ak kiwo gaa, ako kiiyumge tuiyet kogeny, kot ko mata komuch agot koamis. ²¹ Ak ye kingogas bikab konyi, koba konam inendet eng kimnatet amu kimwa kole, "Kagosogor met." ²² Ak kimwa sirik che kichorunegei Jerusalem, kole, "Tinyei inendet Beelsebul" ak "Onei oik eng kimnatet ne o ne bo oik." ²³ Ak kiguur Jeiso icheket kobwanji inendet, ak koleji eng kalewenaik, "Imuktoi ano Setani koon Setani?" ²⁴ Ak ngo pcheak bounatet inegei eng inegei, ko maimuchi bounotonoto kotonon. ²⁵ Ago ngo pcheak got inegei eng inegei, ko maimuchi goyoto kotonon. ²⁶ Ak ngo ng'eet setani koboriegei inegei, ak ngo pcheak inegei, ko maimuchi kotonon, ago kagoit kagesunenyi. ²⁷ Ago maimuchi chi kwo got orit ne bo chito ne kim ak kosare tugukyi ngot ko ma rat korok chi choto kim, si kong'em gonnyi anyun. ²⁸ Amwawok iman ale, kinyochini kaat werikab biko tengekwogikwai tugul, agot ng'alek alak tugul che yaachen che mwaaei, ²⁹ ago age tugul ne chubei Tamirmiriet ne Tilil ko magoi kenyochi kaat koigeny, ago tinyei ng'ogisto ne bo koigeny." ³⁰ Ak kimwa Jeiso ko unoto amu kimwoe icheget kole, "Tinyei inendet tamirmiriet ne muruon." ³¹ Ak kicho anyun kamet ak werikwai ak kitononio eng sang. Ak kigiyokto keguur inendet. ³² Ak kitebchei tuiyet ko kaimut inendet, ak kileji inendet, "Mito sang kameting'ung ak werikwok ak tibikwok kochengin." ³³ Ak kiwolji icheket, koleji, "Ng'o kamennyu ak che kitupche?" ³⁴ Ak kigeer che kiimut inendet, ak koleji, "Ogeero, chu mi yu ko kamennyu ak che kitupche! ³⁵ Amu chi age tugul ne yaei magetab Jehovah, noto ko werit ne kitupche, ak chepto ne kitupche, ak kamennyu."