¹ Kingobata betusiek che ng'ering, komongji kogeny Kapernaum, ak kogas biko kele, mito gaa. ² Ak kiiyumgei biko che chang, kot ko mang'et boroindo agot eng kurgat: ak koamchi icheket ng'olyot. ³ Ak kibwonji biko alak komutu chito ne kitinye miando ne meat borto, konyo ole mi inendet; kogesenu biko ang'wanu. ⁴ Ago kingo mata komuch korikyi amu ki chang biko, kosuul kot barak ole ki mi Jeiso, ak kingo kagobut, kochoortae kitogut ne kirue chito ne ki tinye miando ne meat borto. ⁵ Ak kingogeer Jeiso kayaneng'wai, koleji chito ne tinyei miando ne meat borto, "Weri, kagenyoun kaat tengekwogiguk". ⁶ Ago kimito yoto sirik alak che kitebsot, ak kiibwat eng mugulelwekwai kolen, ⁷ "Imuktoi ano komwa chichi ko u ni? Mwaei ne ya mising! Ngo ne imuchi konyochi chi kaat tengekwogik kobate Jehovah inege?" ⁸ Ak eng yoto konai Jeiso eng tamirmirienyi kito ne kibwati eng oriting'wai. Komwoji icheket kole, "Kainee si obwat tuguchu eng mugulelwekwok? ⁹ Nee ne keigei, amwachi chito ne tinyei miando ne meat borto kele, 'Kagenyoun kaat tengekwogiguk; anan kele, 'Ng'eet, ib itogung'ung ak iwendote'? ¹⁰ Ago si onai ole tinye Weritab Chi kimnatet eng ng'weny konyochi kaat agobo tengekwogik," koleji chito ne kitinye miando ne meat borto, ¹¹ "Amwaun ale, ng'eet, ib kitogungung ak iwe gong'ung." ¹² King'eet anyun ko u noto, ak koib kitogunnyi, ak komanda eng taitab biko tugul, ak kikwong'io tugul, ak kotoror Jehovah, kolen, "Tomo kegeere kiy ne u nito." ¹³ Ak kiwo kogeny tabandab araraita, ak kibwa tuiyet komugul ole mi inendet, ak kinet icheket. ¹⁴ Ak ye kiisirtoi, kogeer Lawi weritab Alphayo kotebche eng ole kitaage aisurut, ak koleji inendet, "Rubwa." Ak king'eet ak korub inendet. ¹⁵ Kiamisie Jeiso eng kotab Lawi ak kimi taagikab aisurut che chang ak kiptengeginik koboto koboto inendet ak alamalyennyi, amu kimi che chang, ako kirub inendet. ¹⁶ Ak kingogeer sirik, che ki Parisaik koamisiei inendet koboto kiptengeginik ak taagikab aisurut, koleji alamalyennyi, "Kainee si koamisie ak koeeisei inendet koboto taagikab aisurut ak kiptengeginik?" ¹⁷ Ak ye kingogas Jeiso, kolenji ichek, "Mamache chi ne chamege chepkericho; che miandos kityo ch mache chepkerichot. Kima anyo aguur che bo imanda, ago kiptengeginik." ¹⁸ Ak kiirugutege alamalyetab Johana ak che bo Parisaik. Ak kibwa anyun biko alak koleji inendet, "Amune si korugutege alamalyetab Johana ak alamalayetab Parisaik ago mairugutege alamalyeng'ung?" ¹⁹ Ak kileji Jeiso icheket, "Imuktoi ano korugutge che kagiguurji katunisiet ko ta komi sandet koboto icheget? Kota komi sandet koboto ichek ko maimuchi korugutge. ²⁰ Ago bwanei betusiek che keistoe sandet ichek, ako eng betusiechoto, korugutege anyun. ²¹ Mami chi ne napchini ngoriet ne leel ngoriet ne os. Si magerer ne leel ne os, ak kotesak ole kagerer. ²² Ama mi chi ne indenoi divaik che leelach lolotinwek che osen. Amu ngo yai ko u noto kogereri divaik lolotinwek, ak kobetyo divaik koboto lolotinwek. Ago kindenoi divaik che leelachen lolotinwek che leelach." ²³ Ak eng betutab Sabato ko kibunei Jeiso mbarenikab beeka, ak kitoi alamalyennyi kobor mesisekab beeka ak kotese tai kobendi. ²⁴ Ak kileji Parisaik inendet, "Keero, kaine si koyai eng betutab sabato kito ne kigitai eng ng'atutik?" ²⁵ Ak kileji icheget, "Tos kitomo osoman kito ne kiyai Daudi ye kima kotinye kiy ako kiamei rubet--- inendet, ak che kimi koboto inendet--- ²⁶ kiwo gotab Jehovah eng betusiek chebo tisindet ne o Abiathar, ak koam magatinikab kabartaet, che tayotin eng ng'atutik kele makiamei kobate tisiik ichegei, ak kogochi che kimi koboto inendet agichek?" ²⁷ Ak kile Jeiso, "Kigiyai Sabato agobo chi, kima kiyai chito agobo Sabato. ²⁸ Noto anyun, Weritab Chi ko Kiptaiyat, agot ne bo Sabato."