1 Nito ko taunetab logoiwek che tililen che bo Jeiso Kristo , Weritab Jehovah. 2 Ko u ye kigisir eng maotiot Isaia kole, "Keero, ayoktoi kiboitiondennyu kondoenen, inendet ne chobei orengung. 3 Kutitab chi ne kursei eng surkwen, 'Ochob oretab Kiptaiyat; olitit ak ochuul ortinwekchi."' 4 Kinyo Johanna, kobatisanishe eng surkwen ak koamdoi kabatisanet ne bo sigunet agobo nyoetab kaat ne bo tengekwogik. 5 Ak kiba ole mi inendet emet komugul ne bo Judea ak tugul che bo Jerusalem. Ak kibatisan icheget eng ainet ne kiguure Jordan, kong'anyei tengekwogikwai. 6 Ak kiilochi Johana sambut ne bo tambesik ak kiratee suwenyi birirwetab muito, ak kiamei cherengendet ak kumiatab tumin. 7 Ak kiamda kole, "rubwo inendet ne kim kosiiro; ak manyolunot ang'uruuk atiach anokab kweonikyi. 8 Kiabatisanak eng beko , ako ibatisanok eng Tamirimiriet ne Tilil." 9 Ak eng betusiechoto ko kinyo anyun Jeiso kobunu Nasaret ne bo Galili, ak kiibatisan Johana inendet eng ainet ab Jordan. 10 Yeityo ko mi kolong'u eng beko, kogeer kipsengwetisiek koyatogis, ak kochorjigei inendet Tamirmiriet ko u cheptuget. 11 Ak kimong' tuget eng kipsengwet kole " ii Werinnyu ne achame. Abaibai missing agobo innye". 12 Ak eng kasarato kochirchir Tamirmiriet inendet kwo surkwen. 13 Ak kitebi eng surkwen betusiek artam kotieme Chesawilyet. Ak kitebche ak tiongik che bo tumin, ak kiboisiechi inendet malaikaisiek. 14 Ako kingo kakenam Johana, konyo Jeiso Galili koamdoi logoiwek che tililen che bo Jehova. 15 Kimwa kole "Kagosulda betusiek, ak kakorik bounatetab Jehovah, osigu ak oyan logoiywek che tililen. 16 Ak ye kiwendi kobunei tabandab Araraita nebo Galili, kogeer Simon ak Andrea weringwai kowirjini araraita regereiywot ne kinamee njirenik, amu ki ramikab njirenik icheket. 17 Ak kileji Jeiso, "Obwaa, orubkaa, si ayaak oegu ramikab biko." 18 Ak kobagakta regereiywekwai eng yoto ak korub inendet. 19 Ak kingo wendi Jeiso kitigin, kogeer Jakobo weritab Sebedi, ak Johana weringwai, che kimi moinget agichee kochobei regereiywekwai. 20 Ak kiguur icheket ak kibagakta kwandang'wai Sebedi komi moinget koboto otwogik, ak korub inendet. 21 Kiba anyun Kapernaum, ak kiwo inendet sunagogit orit betunoto bo Sabato ak konetis. 22 Ak kikwong'io eng kanetisienyi, amu kineti icheket ko u ne tinye kimnatet ama ko u sirik. 23 Ak kimi eng sinagoging'wai chi ne kitinye tamirmiriet ne muruon ak kiwaach, 24 kole, "Kiting'ege nee ak inye, Jeiso ne bo Nazareth? Kenyo ing'emech? Angenin ale ii ne Tilil Ne bo Jehovah!" 25 Ak kiger kong Jeiso inendet kole, "Sis ak imong'u eng inendet." 26 Ak ye kimandoi tamirmiriet ne muruon eng inendet, kobirobirto inendet, ak kowachei eng tuget ne o. 27 Ak kitang'angyo tugul, ak koteebegei ichegei kole, "Nee ni? Konetisiet ne leel ne tinye kimnatet! Ng'atei agot tamirmirik che muruonen ak kasei it inendet!" 28 Ak kiba ng'alekyi oloo tugul agoi koratinwek tugul che bo Galili. 29 Ak ye kingomong' eng sinagogit, kobwa gotab Simon ak Andrea, koboto Jakobo ak Johana. 30 Kikanam cheptigoniet kametab osotiot ne bo Simon ak kirueiinendet kiyo, ak komwachi icheket Jeiso agobo inendet. 31 Ak kinyo, konam eunyi ak kong'eet inendet; ak kimeto cheptigoniet inendet, ak kotoi koboisiechi icheket. 32 Ak eng koskoleng'unoto ko kakorokta asista, komutyi inendet tugul che kimiandos ak che kitinye oiik. 33 Ak kiiyumjige nganaset komugul eng kurgat. 34 Ak kiisoob che chang che kimiandos eng mianwogik che terter ak koon oik che chang komanda, ak kima chamji kong'alalyo amu kiingen oichoto inendet. 35 Ak karon mising kota kotui, kong'eet ak komanda sang kwo surkwen kosa eng ole ma mi chi. 36 Kicheng anyun inendet Simon ak che ki mi koboto inendet. 37 Ak kinyor inendet ak koleji, " Cheng'in biko tugul." 38 Ak komwochi ichek kole, "Ongebe oldo age, nganasok alak, si kobiit aamda eng oloto agine amu kianyo agobo nito." 39 Ak kiwa sinagogisiekwai che bo Galili komugul, koamdoti ak koonei oik. 40 Kinyonji anyun inendet chito ne kitinyei mogondosik. Kogutungji ak koleji, "Ngicham imuchi, itililo." 41 Ako amu kirire inendet, ko kiiyogoito eunnyi Jeiso ak kotwa inendet, kolejini, "Achame. tililitu." 42 Ak eng kasarata kobagakta mogondosaik chichoto, ak kotililit inendet. 43 Ak king'at inendet mising, kobagakta inednet kowechige. 44 Ak kilenji, "Amat imwachi chi ng'olyo, ago wui bandang'ung ak iborjige tisiindet, ak igoite agobo tililindang'ung tuguk che king'at Musa, si koek baornatet eng icheket." 45 Ago kiwo ak kotoi komwaitaat mising ak kobarastaat ng'olyondonoto, kot komata komuch Jeiso kwo nganaset kegeeroti, ago kitebote sang eng komoswekab surkwen. kibwonji anyun inendet che bunu komoswek tugul.