¹ Noto anyun agot arorutionoto ki bo tai ko kitinye ng'atutikab saet ak komastanyi ole tilil ne bo ng'wenyuni. ² Amu kiga kichob emainoto komie. kiteut ne bo tai ko ole kimi keldab tait, ak meset, ako makatinik che bo kabartaet ko kigigure ole tilil. ³ Ak kingesiirtoe anget nebo aeng ne kigikite got, ko kimi got age eng' emait ne kigiguure ole tilil missing kosiir tugul. ⁴ Ne kitinye kapkorosutab tahabu ak moingetab arorutiet ne kigiliige tahabu komoswek tugul. Orit ko kimi teret ne bo tahabu ne kitinye mana, ak kiroktab Aron ne kiing'ati, ak koikab arorutiet. ⁵ Ak eng baragutab moingetab arorutiet, ko kimi kerubisiekab lilindo che kiiuri kereiwotab rirenet, tuguk che magimuchi keng'alale raa agenge agenge. ⁶ Ak kingo kagechob anyun tuguchuto, ko u noto, kobendi tisiik kotugul emainoto bo tai koyaei boisionikwai. ⁷ Ago kiwendi tisiindet ne o inegei emait ne bo aeng, konyil agenge eng' kenyit, ak kima wendi ama tinye korotik che igoitoijinige ak agobo lelutikab biko. ⁸ Kiboru anyun Tamirmiriet Ne Tilil eng' ng'olyondoni kole, kitomo keng'any oret ne mongjini ole tilil mising kosiir ye kita kotononi emait ne bo tai. ⁹ Nito ko ki kalewenetab betusiechu. Nebo eng kagochinoik ak eng' tiseiywek che kimaimuchi koyai chito ne saei koek ne igesunotge eng' kabwatenyi. ¹⁰ Amu kiribe mising agobo amitwogik ak che kiee ak kaunosiek che terotin, choto ko ng'atutik che bo borto kityo che kiging'at agoi betusiekab tetutik che leelachen. ¹¹ Kinyo anyun Kristo ne inendet tisiindet ne o ne bo tuguk che kororon che kikobwa. Kibun anyun emait ne o ago ne igesunotge kosiir, ne magiyae eunek, ago che ma bo ng'wenyuni. ¹² Ama eng' korotigab kwesik ak moek, ago eng' korotikchi ichegei ak kiwo anyun ole tilil mising konyil agenge ak koem ak konyorwech katiaget ne bo koigeny. ¹³ Amu ngot ko kitilili kaunetab borto korotikab kwesik ak kirugik, aronikab roriat che kikiise icheget che tinye muruonindo, ¹⁴ kotililii anyun ne tia korotikab Kristo, ne eng' Tamirmiriet ne bo koigeny ago matinye tisia ko kiigochige Jehovah, kotilili kabwatennyo eng' boisionik che meiyotin si keboisiechi Jehovah ne sobe? ¹⁵ Ak amu nito, inendet ko katuiyoindetab koyomiset ne leel. Si kobiit konyor che kigeguur kayomisetab borotet ne bo koigeny', ye kingo kagobiit meet agobo katiagetab chalwogik, che kimito eng' arorutiet ne bo tai. ¹⁶ Amu ole mito arorutiet, ko ne matiny agoi komito meetab inendet ne yae. ¹⁷ Amu tinye arorutiet kimnatet ye kabiit meet, ago matinye kimnatet kota kasobe inendet ne kiyae. ¹⁸ Eng' noto anyun agot arorutiet ne bo tai ko kima kilumda ko mami korotik. ¹⁹ Amu ye kingo kagomwachi Musa biko tugul ko u eng' ng'atutiet, konam korotikab moek ak che bo kwesik, koboto beeko ak kororik che biriren ak husop ak koise bukuit ak biko tugul. ²⁰ Ak komwae kolen, "chu ko korotik che bo arorutiet ne king'at Jehovah agobo akwe." ²¹ Ak ko u noto, koisee korotik emait koboto tuguk tugul che kiboisie. ²² Eng' ng'atutiet, ko u kele kitilile tuguk tugul korotik. Ak ngo mami tumdaetab korotik ko mami nyoetab kaat. ²³ Kinyolu anyun kitilile itonwekab tuguk che bo kipsengwet eng korotik chuto bo tiong'ik. Ago anyun kitilile tuguk che bo kipsengwet tiseiywek che kororon kosiir chuto. ²⁴ Amu ki machut Kristo ole tilil missing ne kigiyae eunek, ne kaborunetab kito ne mito ago bo iman. Ago kimongji inendet kipsengwet, si kotook eng' taitab Jehovah agobo ache. ²⁵ Ma si kogoitoge konyil che chang', ko u yo wendi tisiindet ne o ole tilil eng' kenyit age tugul, koibe korotik che ma chechii. ²⁶ Amu nda ki u noto, ko kinyoljini anyun kinyalil konyil che chang kong'ete ngelumda ng'weny. Ago kong'ang'ak raa konyil agenge eng' kagesunetab kenyisiek si kobiit koisto tengekto eng tiseiywot ne inendet. ²⁷ Ak ko u yo kiging'at agobo chito kome konyil agenge, ak ye ibata korub kiruoget, ²⁸ ko u noto, Kristo agine kingo kagigoito konyil agenge si koib tengekwogikab che chang, ko tun toogu ne bo aeng' ma agobo tengek , ago eng' icheket che iganyi inendet agoi yetunet.